Read Kivunjo New Testament 1999 Luka 1 Bible Online

Luka 1 - Kivunjo New Testament 1999 bible

Luka 1

¹Kyipfa kya ilyi wandu wafoi waletambagana iṟeia necha mbonyi tsilya tsilewutika koṙu,

²chandu walya waleṟingyishia na iwona mbonyi-tsi waleluongoya, hamwi na waṟundi wa Ṙeṙo lyilya wookyia mawookyionyi,

³ngawona nyi necha inyi, kyipfa kya ilyi ngyilepfula wuṟingyishi wo mbonyi-tso wookyia mawookyionyi, ikuṟeia necha, Tofilo Monyi Kyiṟumni,

⁴umanye necha mbonyi tsilya ulelosho.

⁵Kacha kyiyeri kya Herode, mangyi o Wayuda, kuwewoṙe mkohanyi umwi, ekyelago Sakaria, o kamba lya Abiya, na mka okye nawei umwi o kyishari kya Aron, ekyelago Elyisapeti.

⁶Na woose wewawi wawewoṙe wusumganyi mbele ya Ruwa, wechiosha mawawaso goose ga Mndumii na shilya atutumie kulawoṙe igambo kye wawoṙe kyindo kyoose kyiwicho.

⁷Nawo wawewoṙe mana-pfo, kyipfa Elyisapeti nawei muumba na woose wewawi wawewaku mnu.

⁸Kyasia kyiyeri kya kamba lyakye lyeṟunda cha mkohanyi mbele ya Ruwa,

⁹chandu kyiwekyeri kyiṙo kya wukohanyi, kaolokyio nyi kuṟu kuha iiṙa na hekalunyi lya Mndumii indekoṟa uvumba.

¹⁰Na wuingyi woose wo wandu wawekyeri iterewa Ruwa nja ya hekalu kyiyeri kya ikoṟa uvumba.

¹¹Malaika o Mndumii kacha na kokye agoṟokyi ura lo kulyoe lo mesa ya Mndumii yekoṟia shindo shekyeṙutsa mtsu.

¹²Kyiyeri Sakaria alemmbona naleiṟewe, kawoṙo nyi wuowu.

¹³Kyaindi malaika ulya kammbia, “Ulaowuoe, Sakaria, kyipfa kyiterewo kyapfo kyaaṙanyio, na mka opfo, Elyisapeti, nechifee mana o kyisoṟo, na nochimlaga Yohane.

¹⁴Na iyoe nochiwaṙa sia na ichihiyo lying'anyi, na wandu wafoi wechichihiyo kyiyeri mana-cho echifeo.

¹⁵Kyipfa nechiwa ang'anyi mbele ya Ruwa. Echinyo mpfinyo maa kyindo kya wunanzi-pfo; na oe nechiichuṟo nyi Mumuyo Mweele wookyia wosinyi ko wamae.

¹⁶Na oe nechiwiyiṟa wandu wafoi wa Isiraelyi na ko Mndumii Ruwa owo.

¹⁷Nechisonguo mbele yakye awoṙe pfinya tsa mrima cha tsilya tsa Elyiya, kundu nagaluo waawu wasanze na wana, na ienenga wawicho wuṟango wo wandu wasumganyi, na iṟeyeṟia Mndumii wandu wawaṟeyeṟie Wumangyi wo Ruwa.”

¹⁸Sakaria kawia malaika, “Ngyechimanya kuṙa wuloi wo mbonyi-tsi? Inyi ngyimku na mka oko nyi mkyeku o mfiri ifoi.”

¹⁹Malaika kamgaluo, kammbia, “Inyi nyi Kapreelyi, ngekyegoṟoka mbele ya Ruwa; na inyi ngaṙumo ngyiṙeṙe na iyoe na ikuwia mbonyi-tsi ngyicha.

²⁰Nochiwa ndiṟi, ulechiiṙima iṙeṙa, mṟasa mfiri ulya shechiṟundika isho, kyipfa oiṙikyia maṙeṙo gako-pfo, nago gechiafukyia kui kyiyeri kyago.”

²¹Na wandu walya waweiweṙelyia Sakaria, wakaṟiyio kya ifurumia lyakye kulya hekalunyi.

²²Na lyilya alefuma pfo alaiiṙima iṙeṙa nawo, walemanya kye nalewona shindo shilandewono akyeri cha mndu ailoṙo kulya hekalunyi, na oe kawatsinia kaṙio ai ndiṟi.

²³Kyasia na lyilya mfiri ya kamba lyakye ileafukyia kayenda kanyi kokye.

²⁴Na numa ya mfiri iya mka okye, Elyisapeti, naleira mana kakaa numba mori itanu, echigamba,

²⁵“Kuṙi nyi wuṙo Mndumii alengyiwutia mfiri iya alengyiambuya kundu nangyiwute sonu mbele ya wandu.”

²⁶Mori iṟandaaṟu wookyia kyiyeri Elyisapeti aleira mana, malaika Kapreelyi naleṙumo nyi Ruwa nayende mṟasa mṟi o Galyilaya okyelago Nasareti,

²⁷ko mana mkyega aweṙuṙo nyi mndu awekyelago Yosefu, o kyishari kya Dawidi; na rina lya mana-cho mkyega nyi Mariamu.

²⁸Kaiṙa na kanyi kokye, kagamba, “Ngakuiṟikyiṟa, iyoe umwenengye isaṟia, Mndumii nai hamwi na iyoe.”

²⁹Na oe kaiṟewe mnu mrimenyi kyipfa kya maṙeṙo ga malaika ulya kakusaṟa mrimenyi, “Kyiiṟikyiṟo-kyi nyi kya mbaṟe iha?”

³⁰Malaika kammbia, “Ulaowuoe, Maria, kyipfa nowona isaṟia ko Ruwa.

³¹Nochiira mana na nofee mana o kyisoṟo; na nochimlaga Yesu.

³²Icho nechiwa ang'anyi. Nechilago Mana o ulya ai wuye, na Mndumii Ruwa nemwenenga kyiṙi kya wuchilyi kya Dawidi, awuye.

³³Nechichilyia numba ya Yakobo mlungana, na Wumangyi wokye wochisia-pfo.”

³⁴Maria kawia malaika ulya, “Kyechiwa kuṙa kyindo-kyi, na inyi ngyilamwalyikye?”

³⁵Malaika kagaluo, kammbia, “Mumuyo Mweele necha na kopfo na pfinya tsa icho ai wuye tsekushikyia cha kyirinje. Kyipfa kya ikyo, ikyo kyechifeo kyelago nyi kyiele, Mana o Ruwa.

³⁶Lyingyi-se, mshari opfo, Elyisapeti, na oe naleira mana o kyisoṟo wukunyi wokye; na mori-chu nyi o kaṟandaaṟu ko icho alelago muumba.

³⁷Kyipfa kuwoṙe kyindo kyilekyeiṙimika ko Ruwa-pfo.”

³⁸Maria kagamba, “Inyi nyi kyisinga kya Mndumii; kyiwe koko chandu ogamba.” Numa ya iho malaika kawuka halya kayenda.

³⁹Kyasia, mfiri-yo Maria kafuma, kayenda faṟa mṟasa uruka lo mafumvunyi mṟinyi umwi o Yuda,

⁴⁰kaiṙa na kanyi ko Sakaria, kaiṟikyiṟa Elyisapeti.

⁴¹Na lyilya Elyisapeti aleicho kyiiṟikiṟo kyilya kya Maria, kyikoku kyikakupaaya wosinyi kokye. Elyisapeti kaichuṟo Mumuyo Mweele

⁴²kaṙeṙa kui ṟui lying'anyi, echigamba, “Nummbikyie mboṟa iyoe kyiiṙi kya waka, na mono-pfo nechiwikyio mboṟa.

⁴³Mbonyi-tsi tsangyiwutikyia kuṙa, utane mama o Mndumii oko acha na koko inyi?

⁴⁴Kyipfa ilyi ṟui lyapfo lyeiṟikyiṟa lyileiṙa na maṙwinyi gako, kyikoku kyilekupaaya kui sia wosinyi-koko.

⁴⁵Na agusu icho aleiṙikyia; kyipfa isho alewio nyi Mndumii shechiafukyia.”

⁴⁶Maria kagamba,

⁴⁷“Mrima oko ong'anyisa Mndumii, na ngoo yako yachihiyo kyipfa kya Ruwa, Mkyiṟa oko.

⁴⁸Kyipfa naambuya wufofo wo kyisinga kyakye. Kyipfa, ambuya, wookyia wulalu marika goose gengyilaga ammbikyie mboṟa.

⁴⁹Kyipfa awoṙe pfinya nangiwutia maṟiyisho, na rina lyakye lyilyiele.

⁵⁰Na isaṟia lyakye lyekyekaa marika mṟasa marika ko iwo wekyemwowuo na imwindia.

⁵¹Nawoṙe pfinya yewuta shindo sha maṟiyisho; naleola-ola walekyeicho makusaṟonyi ga ngoo tsawo.

⁵²Naleolotsa wang'anyi shiṙinyi shawo sha wuchilyi, na wafofo kawang'anyisa.

⁵³Wawoṙo nyi njaa kawaigutsa mecha, na wanjama kawaima iwona kyiira.

⁵⁴Naleikanyia Isiraelyi, mṟundi okye; kundu nakumbuo isaṟia lyakye.

⁵⁵Chandu alewia waku waṙu, Abrahamu na ushari lokye mṟasa mlungana.”

⁵⁶Maria kakaa na oe cha mori iṟaṟu, numa ya iho kawuya na kanyi kokye.

⁵⁷Na kyiyeri mfiri ya Elyisapeti yesaṟio mana ileafukyia, naleenengo mana o kyisoṟo.

⁵⁸Wamṟasa na wa kyishari kyakye wakaicho kye Mndumii namwengyeṟia isaṟia lyakye, wakachihiyo hamwi na oe.

⁵⁹Mfiri o nyanya wakacha icheṙina mana; wakakunda imṙumbuya rina lya awuye, Sakaria.

⁶⁰Wamae kagaluo, kagamba, “Chi wuṙo-pfo; nechilago Yohane.”

⁶¹Wakammbia, “Kuwoṙe mndu ekyelago kuṙo kunu kyisharinyi kyapfo-pfo.”

⁶²Wakatsinia awuye wamanye chandu echimlaga.

⁶³Kawawia wamwenenge handu heṟeia, kaṟeia kye rina lyakye nyi Yohane. Wakaṟiyio woose.

⁶⁴Iho iho ṙumbu lyakye lyikatambuluka na ulumi lokye taa, kawooka iṙeṙa echiṟumisha Ruwa.

⁶⁵Woose wawei kufuhi wakawoṙo nyi wuowu; na mbonyi-tso tsoose tsikaongoyo urukyenyi loose lo Uyuda luwewoṙe mafumvu.

⁶⁶Na woose waleicho wakawika mbonyi-tso mrimenyi kowo, wechigamba, “Mana-chu nechiwa o mbaṟe iha? Kyipfa pfinya ya Mndumii iwei hamwi na oe.”

⁶⁷Na Sakaria, awuye, kaichuṟo Mumuyo Mweele kaonguo shisuku, kagamba,

⁶⁸“Naṟumisho Mndumii, Ruwa o Isiraelyi, kyipfa nalecha na ko wandu wakye, na iwakyiṟa.

⁶⁹Nalelugoṟotsia membe ya wukyiṟo moongonyi o Dawidi, mṟundi okye.

⁷⁰Chandu agambie wookyia mawookyionyi kui ṙumbu lya weonguo shisuku wakye waele;

⁷¹Lukyiṟo iwuka ko washituwa waṙu na mawokonyi ga woose walusuuye.

⁷²Kundu nawutie waku waṙu, isaṟia na ikumbuo mma okye mweele.

⁷³Nyamu alelyiia Abrahamu awu-yoṙu,

⁷⁴kye nechilutarama soe, lukyiṟo iwuka mawokonyi ga washituwa waṙu, na imṟundia kulawoṙe wuowu,

⁷⁵ko wuele na wusumganyi mbele yakye mfiri yaṙu yoose.

⁷⁶Na iyoe, mana, nolago moonguo shisuku o icho ai wuye, kyipfa nochisonguo mbele ya Mndumii umṟeyeṟie njia tsakye;

⁷⁷umanyishe wandu wakye wukyiṟo, kyiiṙi kya ihooṟio ngyuunyamaṟi tsawo.

⁷⁸Kui njia ya isaṟia lya Ruwa oṙu, na kui njia-tso ngyeela iwukyie wuye yacha na koṙu.

⁷⁹Ilyimikyia wai meemenyi na kyirinjenyi kya upfu, na isongoya maṙende gaṙu kui njia ya ufoṟo.”

⁸⁰Mana ulya kang'ana, kaengyeṟika pfinya mrimenyi. Kakaa kundu ko nuka kuumu suwaa kulawoṙe maa mṟinga mṟasa mfiri o kuloṟa ko Waisiraelyi.