Read Kivunjo New Testament 1999 Luka 10 Bible Online

Luka 10 - Kivunjo New Testament 1999 bible

Luka 10

¹Kyasia, numa ya isho Mndumii nalewika wandu wengyi makumi mfungaaṙe, kawaṙuma wawi wawi wamsongoye iyenda orio mṟi na orio handu awekusurie iyenda amonyi.

²Kawawia, “Shilyimu nyi shifoi, kyaindi waṟundi nyi waangu. Kyasia terewenyi Mndumii o shilyimu naṙikye waṟundi shilyimunyi shakye.

³Yendenyi; ngyimṙuma nyoe cha shiondo shikyeri na shisii.

⁴Maa mulaṙuo mkunja, maa kyikuchu, maa shiaṙu. Maa mulaiṟikiṟe mndu njienyi.

⁵Na orio numba mochiiṙa napfo, gambenyi kuwooka kye ufoṟo lukae kunu kanyi.

⁶Na kukowaṙa mndu echiiṙima iambilyia ufoṟo, ufoṟo lonyu lochikaa na oe. Kyaindi kokooya kulawoṙe, ufoṟo lonyu lochiwuya na konyu.

⁷Kyasia, kaenyi ipfo numbenyi, mochilya na inyo sha kowo; kyipfa mṟundi nawaṟi ienengo wori wokye. Maa mulakyame-kyame iwuka numba imwi iyenda numba ingyi.

⁸Na orio mṟi mochiiṙa napfo, wakamuambilyia, lyenyi shelya shechiwikyio mbele yanyu.

⁹Kyiṟenyi wandu woose waluoe wakyeri pfo. Wawienyi, ‘Wumangyi wo Ruwa womtikyira kowo.’

¹⁰Na orio mṟi mochiiṙa napfo, nawo walamuambilyie, wukyenyi pfo, na nyoe mukoiṙa njienyi tsa mṟi-cho gambenyi,

¹¹‘Maa kyilulyi kya mṟi onyu kyikuwoṙe maṙendenyi gaṙu luikyimukutia-kutia.’ Kyaindi manyenyi kye Wumangyi wo Ruwa womtikyira kufuhi.

¹²Ngammbia kye mfiri ulya kyechiwa kyaangu uruka lo Sodoma ihooṟio maṙeko kuta mṟi-cho.”

¹³“Ochia lopfo, Korasini! Ochia lopfo Betisaida! Kyipfa kokooya shiṟiyisho shilewutika konyu shilewutika kulya Tiro na Sidon, wawechiṙumbuya wunyamaṟi wookyia iho, wechiṟaa masaṟa ga makunyia na iṙamia ifunyi.

¹⁴Kyaindi, mfiri o ianduyo kyechiwa kyaangu wandu wa Tiro na Sidon ikarishia ngapo tsawo kuta nyoe.

¹⁵Na iyoe Kaperinaumu, ochienengo kyiṟumi-pfo indi nochisotso mṟasa ko waṟumu.

¹⁶Momuaṙanyia nyoe, nangyiaṙanyia inyi; na amulega nyoe nangyilega inyi; na angyilega inyi nalega ulya alengyiṙuma.”

¹⁷Naaho-ng'u walya makumi mfungaaṙe walewuya na sia, wechigamba, “Mndumii, maa waṟufui wawicho wailuindia kui rina lyapfo.”

¹⁸Kawawia, “Ngyilewona Satana, echioloka iwuka ruwewu cha mbawa.

¹⁹Ngamuenenga pfinya yechuma njoka na shisheshe, na pfinya tsoose tsa mokyituwa ulya, maa kuwoṙe kyindo kyemmbutia kyindo kyiwicho-pfo.

²⁰Kyaindi mulachihiyo kyipfa kya ilyi waṟufui wawicho waimuindia; indi chihiyonyi kyipfa marina ganyu gamaṟeie ruwewu.”

²¹Kyiyeri kyilya kyilya Yesu kachihiyo Mumuyonyi Mweele, kagamba, “Ngakuana, Awu, Mndumii o ruwewu na uruka, kyipfa shindo-shi, uleshitambuluya wandu waṟango-pfo indi nuleshitambuluya wana watutu. Yee, loi Awu, kyipfa nyi wuṙo kyilekuchihiya.”

²²Kagamba, “Ngyimwenengye shoose nyi Awu-yoko, maa kuwoṙe aichi Mana, sile Awu-pfo; maa kuwoṙe aichi Awu, sile Mana-pfo, na orio oose ulya mana akundi imshukuya.”

²³Kaindukyia wanalosho wakye, kaṙeṙa nawo kyiṟika, kawawia, “Wagusu meso ganyu gaiwona isho muwonyi nyoe.

²⁴Cha kyipfa ngammbia kye weonguo shisuku wafoi na wamangyi walelanga iwona ishi muwonyi nyoe walashiwone; na iicho isho mushiichuoe nyoe walashiicho.”

²⁵Na mlosha umwi o mawawaso nalegoṟoka nayeshe Yesu, echigamba, “Mlosha, ngyiwute kyi kundu ngyioṟe moo o mlungana?”

²⁶Kammbia, “Kyikyiṟeie kuṙa uwawasonyi? Nosoma ho kuṙa?”

²⁷Kagaluo, kagamba, “Kunda Mndumii Ruwa opfo kui ngoo yapfo yoose, na kui mrima opfo oose, na kui pfinya tsapfo tsoose, na kui wuṟango wopfo woose; na momṟasa opfo cha iyoe kumonyi.”

²⁸Kammbia, “Nogaluo necha; wuta kuṙo na iyoe nochiwaṙa moo.”

²⁹Na oe akundi ikuloṟa kye nai msumganyi, kawesa Yesu, “Aa momṟasa oko nyi wui?”

³⁰Yesu kagaluo kagamba, “Mndu umwi nalesoka iwuka Yerusalemu echiyenda Yeriko, kakarisana wasokyi, wakammbuta mawale gakye, wakamkapa, wakayenda, wakamṙa kufuhi na ipfa.

³¹Mkohanyi umwi naweiiṙia njia iya; na lyilya alemmbona naleiṙa mbai.

³²Na Mlewi wuṙo, kyiyeri aleshika halya kammbona, kaiṙa mbai.

³³Kyaindi Msamaria umwi echiyenda kyaro naleshika halya-ndu awei; na lyilya alemmbona nalemmbonia wukyiwa.

³⁴Katikyira kufuhi, kampfunga shifaṟa shakye, kashishia mafuṙa na mpfinyo, kamṙosia wuye ya nzoi yakye, kamṙuo mṟasa numbenyi ya wayenu, kamwonduṟa necha.

³⁵Na ilya-ngama kawuta dinari tsiwi, kaenengyia ulya monyi numba ya wayenu, echigamba, ‘Onduṟa necha mndu-chu, na kokooya kuwoṙe kyindo kya ngoseṟa ochimwenenga, ilyi ngyechiwuya ngyekutaa.’

³⁶Nuwonyi kuṙa iyoe, kyiiṙi kya iwo waṟaaṟu, nyi wui awei momṟasa o ulya alekarisana wasokyi?”

³⁷Kagamba, “Nyi ulya alemmbonia wukyiwa.” Yesu kammbia, “Yenda na iyoe undewuta wuṙo.”

³⁸Kyasia kyiyeri waweiyenda naleiṙa kyikaṟonyi kyimwi; mndu mka umwi ekyelago Marita kamlaga na kanyi kokye.

³⁹Na oe nawewoṙe mono-wamae o kyika ekyelago Maria, aleṙamia maṙendenyi ga Yesu, kaaṙanyia maṙeṙo gakye.

⁴⁰Kyaindi Marita naweikuwinisha na maṟunda gafoi, kayenda ko Yesu, kammbia, “Mndumii, uwonyi uwicho chandu mono-wama-chu oko angyiṙa ngyiṟunde ngyimonyi-pfoe? Kyasia mmbie nangyitarame.”

⁴¹Mndumii kagaluo kammbia, “Marita, Marita, nukuwinisha na iiṟewe kyipfa kya shindo shifoi;

⁴²kyaindi nyi kyindo kyimwi tikyi kyikyikunde; na Maria nasambuṟa ṙombo lyicha lyilechiwuto kokye.”