Read Kivunjo New Testament 1999 Luka 11 Bible Online

Luka 11 - Kivunjo New Testament 1999 bible

Luka 11

¹Kyasia kyiyeri awei handu halyiwe echiterewa, ammarise, umwi o wanalosho wakye nalemmbia, “Mndumii, luloshe iterewa chandu Yohane alelosha wanalosho wakye.”

²Kawawia, “Kyiyeri muiterewa, gambenyi ‘Awu [oṙu ukyeri ruwewu], rina lyapfo lyitano lyiele, Wumangyi wopfo wuche, [kyindo ukundi, kyiṟundikye iha wuyanenyi cha ipfo ruwewu.]

³Uluenengye kando kaṙu mfiri yoose.

⁴Uluhooṟie ngyuunyamaṟi tsaṙu, kyipfa na soe lokyehooṟia orio mndu ekyeluṙekyio. Na ulaluṙuo kyiyeshionyi indi ulukyiṟe ngyeṟo tsa mmbicho ulya.’ ”

⁵Kawawia, “Nyi wui konyu awoṙe mbuya, kayenda kokye kyio, na immbia; ‘Mbuya-yako, ngyiakuya mkate iṟaṟu,

⁶kyipfa mbuya yako yashika koko, yawuka kyaro, na inyi ngyiwoṙe kyindo kyeienenga-pfo,’

⁷na ulya ai numba namgaluoe echigamba, ‘Maa ulangyiwinishe; moongo omshingo, na soe lomlaa hamwi na wana wako, ngyechiiṙima iamka ngyikuenengye-pfo?’

⁸Ngammbia kye, maa chandu alaiamka namwenengye kyipfa kya ilyi akyeri mbuya yakye, chandu alaiṙa imterewa, nechiamka namwenengye kyilya aiterewa.

⁹Na inyi ngyimmbia, ‘Terewenyi na nyoe mochienengo; pfulenyi, na nyoe mochiwona; kape-kapenyi moongo, na nyoe mochipfunguyo.’

¹⁰Kyipfa orio moterewa nekyeambilyia; na ulya mopfula nekyewona; na ulya mokapa-kapa moongo nechipfunguyo.

¹¹Kyipfa nyi wui konyu akyeri awu, mono-kye kamterewa mkate, echimwenenga igoe? Ang'u kamterewa ikunga, namwenengye njoka?

¹²Ang'u kamterewa iyai, namwenengye kyisheshe?

¹³Kyasia, kokooya nyoe mui wawicho muichi ienenga wana wanyu shisumbo shicha, ngyesa chi ngoseṟa mnu awu onyu akyeri ruwewu echienenga Mumuyo Mweele walya wekyemterewa-pfoe?”

¹⁴Na oe naweiwuta mṟufui mmbicho ko mndu awei ndiṟi. Kyiyeri mṟufui ulya mmbicho alewuka, mndu ulya kaṙeṙa wuingyi wo wandu wukoṟiyio.

¹⁵Wengyi wakagamba, “Naifuna waṟufui wawicho kui pfinya tsa Beelyisebulyi, ang'anyi o waṟufui wawicho.”

¹⁶Wengyi walemyesha wepfula kokye kyiṟingyishio kyiwukyie ruwewu.

¹⁷Na oe kamanya makusaṟo gawo, kawawia, “Orio wumangyi wukowaṙa wuṟiingyi kokyewaṙa wukyiwa; na wandu wa nja imwi wakaṟiingana wekyenyanyaṟika.

¹⁸Kyasia, kokooya Satana nakuṟiinga oe amonyi, wumangyi wokye wochigoṟoka kuṙa? Kyipfa nyoe mugamba kye ngyifuna waṟufui wawicho kui Beelyisebulyi,

¹⁹Kyasia, kokooya ngafuna waṟufui wawicho kui Beelyisebulyi, ngyesa wana wanyu wekyewafuna kui pfinya tsa wui? Kyipfa kya ikyo iwo nyiwo wechimuanduya.

²⁰Kyaindi kokooya inyi ngyifuna waṟufui wawicho kui kyimnyoe kya Ruwa, kyasia Wumangyi wo Ruwa womcha na konyu.

²¹Mndu awoṙe pfinya aṟee shisha shakye, karinga numba yakye, shindo shakye shechikaa necha.

²²Kyaindi mndu awoṙe pfinya kuta oe kyiyeri ayenda kokye na imkapa, nemsoka shisha shakye shoose awekusurie, na igawia wandu wakye shoose awewoṙe.

²³Mndu alai hamwi na inyi naiwingana na inyi; na mndu alaisania hamwi na inyi nekyeola-ola.”

²⁴“Mṟufui mmbicho ilyi awuka ko mndu, nekyeiṙia handu halawoṙe mṟinga, echipfula handu heonyonya, alandewone nekyegamba,

²⁵‘Ngyechiwiyilyia numba yako ngyilewuka.’

²⁶Na kashika, kawona ingyiaie na ichopo, nyi lyo-ng'u ekyeyenda kaṙuo handu hamwi na oe waṟufui wengyi wawicho mfungaaṙe wakyeri wawicho kuta oe amonyi, wakaiṙa na ikaa pfo; na mndu ulya mafurumionyi gakye gekyewiha kuta kulya mawookyionyi.”

²⁷Kyikawa-ng'u kyiyeri aweiṙeṙa mbonyi-tso, mndu mka umwi wandunyi wa kyisanzionyi, naleṙeṙa na ṟui lying'anyi kammbia, “Agusu mndu-mka-cho alekufee na mawee uleonga.”

²⁸Kyaindi oe nalegamba, “Nanga, wagusu walya wekyeicho Ṙeṙo lya Ruwa na iosha shilya lyikundi.”

²⁹Na kyiyeri wuingyi wo wandu wulekuumbia halya-ndu Yesu awei nalewooka igamba, “Rika-lyi nyi rika lyiwicho. Lyipfula kyiṟingyishio, maa lyechienengo kyiṟingyishio-pfo, sile nyi kyiṟingyishio kya Yona.

³⁰Kyipfa, chandu Yona alewa kyiṟingyishio ko Waninawi, nyi wuṙo echiwa Mana o Adamu ko rika-lyi.

³¹Mangyi o kyika o ura lo kyaseri nechigoṟoka mfiri o ianduyo hamwi na wandu wa rika-lyi, na oe nechiwaanduya kye waleṙeko; kyipfa oe nalecha iwuka ngyuura tsa kyishingonyi tsa wuyana kundu naicho wuṟango wo Solomon, na iha hakyeri ai ang'anyi kuta Solomon.

³²Wandu wa Ninawi wegoṟoka mfiri o ianduyo hamwi na rika-lyi, nawo wechiwaanduya kye waleṙeko; kyipfa wo waleṙumbuya wunyamaṟi kyipfa kya mbonyi Yona aleonguo, na iha hakyeri ang'anyi kuta Yona.”

³³“Kuwoṙe mndu ekyekoṟa taa kaiwikyia handu hakuṟiikyie, ang'u wanda ya kyitela-pfo indi nekyeiwikyia handu hakuirie, kundu iwo wechiiṙa napfo wawone ngyeela.

³⁴Taa ya mmbiu nyi riso. Kyasia riso lyapfo lyechiwona necha mmbiu opfo oose ochiwaṙa ngyeela. Kyaindi lyikanyamaṟika, mmbiu opfo oose ochiwaṙa meema.

³⁵Kyasia, ambuya-ng'u, ngyeela iya ikyeri kopfo ilacheewa meema.

³⁶Kokooya ngyeela yaṙunganana mmbiunyi opfo oose, maa kuwoṙe handu hawoṙe meema-pfo, mmbiu opfo oose ochiwaṙa ngeela tupu; chandu na taa yekyekulyimika kui ngyeela yayo.”

³⁷Kyiyeri aweiṙeṙa, Mfarisayo umwi nalemlaga nache na kokye nalye kyelya. Kaiṙa, kaṙamia nalye kelya.

³⁸Kyiyeri Mfarisayo ulya alemmbona, naleṟiyio kyipfa alesamba mawoko kyimṟumoe kuwooka alalya-pfo.

³⁹Mndumii kammbia, “Nyoe Mafarisayo mokyesanja kyiṙoo na kyitela kyanja, indi mrimenyi konyu muichuo wusokyi na wuwicho.

⁴⁰Nyoe matondo; icho aleachikyia isho sha nja chi oe aleachikyia isho shikyeri shiṙoonyi na shitelenyi taa-pfoe?

⁴¹Kyaindi wutenyi kyiano shilya sha kyanumba, na shoose shechiwa shicha konyu.

⁴²“Indi ochia lonyu, Mafarisayo, cha kyipfa mokyewuta shiano shishiwawase na mboka tsa maṟa tsa orio mbaṟe, na kunu mochiṙa shilya shiwaṟi, na ikunda lya Ruwa. Kyamukooya iwuta isho sha kuwooka kulawoṙe iṙa isho sha kawi.

⁴³Ochia lonyu, Mafarisayo, cha kyipfa mukundi iṙamia mbele masinagoginyi na iiṟikyiṟo sangaṙa.

⁴⁴Ochia lonyu, cha kyipfa mukyeri cha shilome shilekyewono, shikyeri kye wandu wakaiṙa mbai yasho waichi mbonyi tsasho-pfo.”

⁴⁵Mndu umwi kyiiṙi kya walosha wa mawawaso kagaluo, kammbia, “Mlosha, kui igamba isho noluṙeṙia uwicho maa soe.”

⁴⁶Kagamba, “Na nyoe walosha wa mawawaso, ochia lonyu, cha kyipfa mokyeṙika wandu maṟio malemeri maa nyoe muwenyi mokyepaaya maṟio-go maa na kyimnyoe kyanyu-pfo.

⁴⁷Ochia lonyu, cha kyipfa muichopa shilome sha weonguo shisuku walya waku wanyu walewawaaga.

⁴⁸Kyasia muṟingyishia na iiṙikyiana na kyilya waku wanyu walewuta; kyipfa wo walewaaga weonguo shisuku-wo, na nyoe muchopa shilome shawo.

⁴⁹Na kyipfa kya ikyo wuṟango wo Ruwa wulegamba, ‘Ngyeṙuma kowo weonguo shisuku na wasu, nawo wewaaga waata kyiiṙi kyawo na iwafuna,’

⁵⁰kundu rika-lyi lyiweso samu ya weonguo shisuku woose, ilepusuka wookyia igumbo lya wuyana;

⁵¹wookyia samu ya Abelyi mṟasa samu ya Sakaria, ulya alewoogio kyiiṙi kya mesa ya Mndumii na hekalu. Yee, ngyimmbia kye rika-lyi lyechiweso samu-yo.

⁵²Ochia lonyu, nyoe walosha wa mawawaso, kyipfa muleṟika upfunguo lo halya-ndu wandu weiṙima iwona wuṟango nyoe muwenyi mulaiṙe napfo, na walya waweiṙa mukowashingyia.”

⁵³Kyiyeri alewuka pfo, walosha wa mawawaso na Mafarisayo walewooka imringyichia uwicho na imsouo kui immbesa shindo shifoi,

⁵⁴wemṙega kundu waicho ṙeṙo lyawuka ṙumbunyi kokye.