Read Kivunjo New Testament 1999 Luka 12 Bible Online

Luka 12 - Kivunjo New Testament 1999 bible

Luka 12

¹Kyiyeri-kyo, wuingyi wo wandu wulesanza shiku kui shiku, mṟasa wakachumana, kawooka iwia wanalosho wakye kuwooka, “Kuringyenyi na chachu ya Mafarisayo, ya wukulembecheṟi.

²Kyaindi kuwoṙe kyindo kyikuṟiikyie kyilechiloṟo na pata, maa kyikyiṟikye kyilechimanyika-pfo.

³Kyasia orio kyindo muleṙeṙa meemenyi kyemanyika saenyi; na kyindo muleweweṙia mndu shiṟinyi sha numba shegambo iwuka kai.”

⁴“Na inyi ngyimmbia nyoe mbuya tsako, maa mulaowuoe iwo wekyewaaga mmbiu, na numa ya iho wawoṙe kyindo kya ngoseṟa weiṙima iwuta-pfo.

⁵Kyaindi ngyemmbia mochimwowuo. Owuonyi ulya akyeri kye kammbaaga mndu nechiiṙima immbiyitsa Ngyehenenyi. Yee ngyimmbia, owuonyi icho.

⁶Ngyesa shilepuru shitaanu shekyekumbo helo tsiwi-pfoe? Maa kuwoṙe maa kyimwi kyekyewaṙimika mbele ya Ruwa-pfo.

⁷Kyaindi maa njui tsa mṙoe yanyu tsingyitale tsoose. Kyasia mulaowuoe; nanga nyoe kuta shilepuru shifoi.”

⁸“Na inyi ngyimmbia, orio mndu echingyiṟingyishia mbele ya wandu, Mana o Adamu nemṟingyishia mbele ya malaika wa Ruwa.

⁹Na echingyikana mbele ya wandu, icho nekano mbele ya malaika wa Ruwa.

¹⁰Na orio mndu echiṙeṙa kyindo kyiwicho kya Mana o Adamu nechihooṟio, indi mndu alahia Mumuyo Mweele echihooṟio-pfo.

¹¹Na ilyi wemuṙuo mbele ya Masinagogi na wachilyi na wawoṙe pfinya ya ichilyia, maa mulaiṟewe mochikusaṟa maṙeṙo ganyu chandu mogaluo ang'u iṙeṙa.

¹²Cha kyipfa Mumuyo Mweele nemulosha saa iya iya kyilya muwaṟi iṙeṙa.”

¹³Mndu umwi halya kyisanzionyi kammbia, “Mlosha, wia mono-wama oko nangyigawie kyioṟa kyaṙu.”

¹⁴Kammbia, “Iyoe mndu, nyi wui alengyiwika inyi ngyiwe moṙumbuo moondu yanyu ang'u mogawa shindo shanyu?”

¹⁵Kawawia, “Kushowenyi na wuneesi, kyipfa moo o mndu ukyeri shindonyi shakye awoṙe-pfo.”

¹⁶Kawawia mfano, echigamba, “Ṙema lya mndu umwi mnjama lyiwewoṙe shilyimu shifoi mnu.

¹⁷Kawooka ikusaṟa mrimenyi kokye, echigamba, ‘Ngyiwikye kuṙa, kyipfa ngyiwoṙe handu ngyekooma shilyimu shako-pfo?’

¹⁸Kagamba, ‘Ngyewika kuṙi, ngyeunduo shikumbi shako ngyiwikye shingyi shing'anyi kuta ishi, na ipfo ngyechikooma kyilyimu kyako kyoose na shindo shako.

¹⁹Numa ya iho ngyegamba, iyoe mrima oko, nuwoṙe shindo shicha shifoi ukoomie ko maka ifoi. Onyonya-ng'u, ulye, unyo, uchihiyo.’

²⁰Kyaindi Ruwa kammbia, ‘Iyoe tondo, kyio-kyi kya inu wakundi mrima opfo. Na shindo-sho ukoomie shewa sha wui?’

²¹Nyi wuṙo akyeri mndu ekyekoomia mrima okye kyiseyesoe alakusurie Ruwa.”

²²Kawia wanalosho wakye, “Kyipfa kya ikyo ngyimmbia, maa mulawinie moo yanyu, mochilya kyi; maa mmbiu yanyu mochiṟaa kyi.

²³Cha kyipfa iwaṙa moo nyi kyindo kying'anyi kuta kyelya, na mmbiu nyi ngoseṟa kuta nguwo.

²⁴Kusaṟenyi mbonyi tsa makuru, kye gekyewaaya maa isambuo-pfo; gawoṙe shikumbi maa handu hekooma shindo-pfo, indi Ruwa nekyegaenenga kyelya. Nanga nyoe kafoi kuta shileye!

²⁵Nyi wui konyu kakuwinisha echiiṙima iengyeṟa moo okye maa mfiri umwi?

²⁶Kyasia, kokooya mulechiiṙima iwuta maa kyindo kyitutu, ny'kyilyi mukuwinisha kya shilya shingyi?

²⁷Kusaṟenyi mbonyi tsa shiwaṟo chandu shekyeṙo. Shekyeṟunda kyindo kyoose-pfo; indi inyi ngyimmbia kye maa Solomon mng'anonyi okye oose aleṟiko necha cha kyiwaṟo kyimwi kya isho-pfo.

²⁸Kyasia kokooya Ruwa nekyeṟika kuṙo maṟa ga ipfo ṙemenyi, gakyeri ho inu na ngama gakawiyitso moṙonyi ngyesa emmbutia ngoseṟa, nyoe wa iiṙikyia lyaangu?

²⁹Nyoe mulapfule mulye kyi ang'u munyo kyi-pfo. Maa mulaiṟewe mrimenyi,

³⁰kyipfa isho shoose nyisho masanga ga wuyana gekyepfula, kyaindi Awu onyu naichi kye mukundi isho.

³¹Indi pfulenyi Wumangyi wo Ruwa, na isho mochiengyeṟio.”

³²“Maa mulaowuoe nyoe poo lyitutu, cha kyipfa Awu onyu nawona nyi kyicha imuenenga Wumangyi wulya.

³³Kumbenyi isho muwoṙe, muwute kyiano. Achikyienyi shikuchu shilekyekuo, koomenyi kyiseyesoe kyanyu ruwewu handu kyechiengyeṟika, handu halekyeshika mbafu, maa shinu lyilekyenyamaṟa.

³⁴Cha kyipfa handu kyiseyesoe kyanyu kyikyeri nyi ho-ndu na mrima yanyu yechikaa.”

³⁵“Mukuṟeyeṟe, mukuinewie kyitsinyi, na taa tsanyu tsikae tseaka;

³⁶muwe cha wandu waiweṙelyia mndumii owo, ilyi ewuya iwuka wolyinyi, kundu kyiyeri echicha na ikapa-kapa moongo, wampfunguye moongo cha ilyi.

³⁷Wagusu waṟundi walya, kyiyeri mndumii owo echicha nawakooye walee kyiṙombo. Loi ngyimmbia, nekuinewa na iwaenenga kyelya, na iwaṟundia.

³⁸Na oe kacha lya kawi, ang'u kacha lya kaṟaaṟu, na iwakooya kuṙi, wagusu waṟundi-wo.

³⁹Kyaindi manyenyi kyindo-kyi kye monyi kanyi awemanya kyiyeri mbafu yechicha, nawelaa kyiṙombo, maa aweṙa numba yakye ifunjo-pfo.

⁴⁰Na nyoe kuṟeyeṟenyi, cha kyipfa kyiyeri mulaichi nyi lyo-ndu Mana o Adamu echicha.”

⁴¹Petiro kammbia, “Mndumii, mfano-cho noluwia soe tikyi, ang'u wandu woose taa?”

⁴²Mndumii kagamba, “Kyasia, nyi wui-ng'u akyeri mṟundi msimiri, amṟango, ulya mndumii okye echimmbika nasongoye maṟunda gakye goose, naenengye wandu shelya kui kyiyeri kyiwaṟi?

⁴³Agusu mṟundi ulya mndumii okye echicha namkooye echiwuta kuṙo.

⁴⁴Loi ngyimmbia, nemmbika nachilyie shindo shakye shoose.

⁴⁵Kyaindi, mṟundi ulya kagamba mrimenyi kokye, ‘Mndumii oko naikyelyio icha’, kawooka ikapa walya wekyeṟunda na oe, wasoṟo na waka, echilya na inyo na inango;

⁴⁶Mndumii o mṟundi-cho nechicha mfiri alaukusaṟie na kyiyeri alaichi, nemṙumbuo mateng'eta gawi na immbikyia hamwi na walaiṙikyie.

⁴⁷Na mṟundi ulya alemanya kyindo mndumii okye akundi, alakuṟeyeṟe, maa alawute kyilya mndumii okye akundi, nechikapo mnu.

⁴⁸Na ulya alaichi na oe nawuta kyiwaṟi ikapo, nekapo kyitutu. Na orio mndu aleenengo shifoi, icho neweso shifoi, na ulya alekoomio shindo shifoi, kokye werika na ngoseṟa.”

⁴⁹“Ngyilecha iwiyitsa moṙo wuyanenyi; na moṙo-cho wukomwaka ny'kyikyi ngyikundi ngoseṟa?

⁵⁰Kyaindi ngyiwoṙe wupatiso ngyiwaṟi ipatiso, na inyi ngyiwoṙo fowa ing'anyi mṟasa wupatiso-wo wuafutsio!

⁵¹Ngyesa mokusaṟa kye ngyilecha iende ufoṟo wuyanenyi? Ngyimmbia, ote, chi wuṙo-pfo, indi maletsano.

⁵²Cha kyipfa wookyia wulalu numbenyi imwi kowaṙa wandu wataanu walekanyi, waṟaaṟu wewingana na wandu wawi, wawi wewingana na wandu waṟaaṟu.

⁵³Awu na mono-kye wechilekana, na mana na awuye; mama o mndu na mono-kye o kyika, na mana o kyika na wamae; mndu na watoe okye na watoe na watoe o mndu.”

⁵⁴Yesu kawia-se wuingyi wulya wo wandu, “Orio kyiyeri mokyewona ipuchi ura lo kyukonyi cha ilyi mokyegamba, ‘Mvuo iicha’; kyikawa kuṙo.

⁵⁵Na ilyi kokyecha mkuma owuka ura lo kyawuye, mokyegamba, ‘Kowaṙa mrikye’; na nyi wuṙo kyikyeri.

⁵⁶Nyoe wakulembecheṟi mokyeiṙima imanya chandu kochiwa urukyenyi na ngyinenyi; kyasia, kyawa kuṙa-ng'u kye moiṙima imanya kyiyeri-kyi-pfo?”

⁵⁷“Ny'kyilyi nyoe muwenyi kui mrima yanyu mulekyeṙumbuo iwuta shikyeri sha sungusinyi?

⁵⁸Kokooya ooshana na ulya uwoṙe na oe moondu iyenda ko moṙumbuo moondu, ipfo njienyi pfuṟukana isanza na oe, alachekukuruo mṟasa ko mchilyi, mchilyi ulya kakuṙambika mawokonyi ga ulya ekyeṙumbuo moondu, kakuwiyitsa kyipfungonyi.

⁵⁹Ngyikuwia, owuka pfo mṟasa umarise itaa helo ya mafurumionyi-pfo.”