Read Kivunjo New Testament 1999 Luka 13 Bible Online

Luka 13 - Kivunjo New Testament 1999 bible

Luka 13

¹Na kyiyeri kyilya kyilya kuwewoṙe wandu walemwendie mbonyi tsa Wagalyilaya walya Pilato alewawaaga kyiyeri waweiṙasa.

²Kawagaluo, kawawia, “Ngyesa mokusaṟa kye Wagalyilaya-wo wawewoṙe maṙeko kuta Wagalyilaya wengyi woose, mṟasa wakawutio kuṙo?

³Ngyimmbia, chi wuṙo-pfo; kyaindi mulandeṙumbuye wunyamaṟi, nyoe moose mowerumatso mbaṟe-yo iyo.

⁴Ang'u walya ikumi na nyanya, waleolokyio nyi numba ipfo Siloamu, ikawawaaga, mokusaṟa kye wawewanyamaṟi kuta wandu woose wawekyeri Yerusalemu?

⁵Ngyimmbia, chi wuṙo-pfo, kyaindi mulandeṙumbuye wunyamaṟi, nyoe moose mochirumatso mbaṟe-yo iyo.”

⁶Yesu kawawia mfano chu: “Mndu umwi nawewoṙe mfumu umṙongye ṙemenyi lyakye lya msabibu, kayenda indepfula pfo ndunda alawone.

⁷Kawia ulya awekyeambuya ṙema-lyo lya msabibu, ‘Maka-i iṟaṟu ngyekyecha ipfula ndunda kunu mfumunyi, ngyilawone kyindo. Umanye, kyipfa uinyamaṟa teri.’

⁸Kagaluo, kammbia, ‘Mndumii uṙe maka-chu, ngyiukawilyie, ngyiuwikye sari;

⁹nacho ukowika ndunda, nyi kyicha, ote, numa ya iho ulandewikye ndunda, uumanye-ng'u.’ ”

¹⁰Mfiri o onyonya naweiloshia sinagoginyi lyimwi.

¹¹Naaho hawewoṙe mndu mka awewoṙo nyi waṟufui wa wufafa kyiyeri kya maka ikumi na nyanya, na oe nalemekyie, eiṙima igoṟoka-pfo.

¹²Kyiyeri Yesu alemmbona nalemlaga, kammbia, “Mama, nowuto wufafenyi wopfo.”

¹³Kayekyia mawoko wuye yakye, na oe kagoṟoka cha ilyi kaṟumisha Ruwa.

¹⁴Kyasia ang'anyi o sinagogi nalesuo kyipfa Yesu nakyiṟa mndu mfiri o onyonya. Kagaluo, kawia walya wawesanzie halya, “Kuwoṙe mfiri iṟaandaṟu iwaṟi iṟunda, kyasia nnjonyi mukyiṟo mfiri-yo, maa chi mfiri o onyonya-pfo.”

¹⁵Kyaindi Mndumii kagaluo, kagamba, “Nyoe wakulembecheṟi, orio umwi onyu, ngyesa ekyepfunguo umbe yakye ang'u nzoi yakye mfiṟigenyi mfiri o onyonya nandeirutsa mṟinga-pfoe?

¹⁶Na mndu mka-chu, akyeri o kyishari kya Abrahamu, ichu Satana alempfunga maka-i ikumi na nyanya, kyiwewaṟi nawuto kyipfungo-kyi mfiri o onyonya-pfoe?”

¹⁷Kyiyeri alegamba ikyo walewoṙo nyi sonu woose wawewingana na oe. Kyisanzionyi kyoose kyikachihiyo kyipfa kya mbonyi tsa mng'ano tsileṟundo nyi oe.

¹⁸Numa ya iho kagamba, “Wumangyi wo Ruwa wukyeri cha kyikyi? Na inyi ngyiwulyingatsane na kyikyi?

¹⁹Wukyeri cha mbeu ya haradalyi mndu alewuta kaiolyia ṙemenyi lyakye; ikaṙo, ikawa ikyiṙi, shileye sha ngyinenyi shikaṙamia mbagenyi tsalyo.”

²⁰Kagamba lya kawi, “Ngyilyingatsane na kyikyi Wumangyi wo Ruwa?

²¹Wukyeri cha chachu mndu mka alewuta kaisanzia shitelenyi shiṟaaṟu sha mso, mṟasa ukotarang'aa woose taa.”

²²Na oe naweiiṙa mṟinyi na shikaṟonyi echilosha, kyaronyi kyakye kya iyenda Yerusalemu.

²³Mndu umwi kammbesa, “Ngyesa Mndumii, wandu waikyiṟo nyi waangu?” Kawawia,

²⁴“Pfuṟukanenyi iiṙia moongonyi msuse, cha kyipfa ngyimmbia kye wafoi wechikunda iiṙa walaiṙime.

²⁵Kyiyeri monyi kanyi echigoṟoka na ishinga moongo, na nyoe mukowooka igoṟoka nja na ikapa-kapa moongo, mochigamba, ‘Hoi Mndumii, lupfunguye moongo’; oe negaluo na immbia, ‘Ngyiichi kundu muwukyie-pfo’.

²⁶Nyi lyo-ndu mowooka igamba, ‘Lulelya na inyo mbele yapfo, na iyoe nulelosha njienyi tsaṙu.’

²⁷Na oe negamba, ‘Ngammbia, ngyiichi kundu muwukyie-pfo; wukyenyi koko nyoe moose mokyeṟunda mawicho.’

²⁸Nyi lyo-ndu kochiwaṙa kyifiiṟo na ilya ngakuru, kyiyeri mochiwona Abrahamu, Isakyi na Yakobo na weonguo shisuku woose Wumangyinyi wo Ruwa, na nyoe muwenyi muwawiyitse nja.

²⁹Na kochicha wandu iwuka ura lo ngamenyi na lo kyukonyi, na iwuka ura lo kyawuye na lo kyaseri, nawo weṙamia wechilya kyelya Wumangyinyi wo Ruwa.

³⁰Kuwoṙe wakyeri wa mafurumionyi wechiwa wa kuwooka, na wa kuwooka wechiwa wa mafurumionyi.”

³¹Kyiyeri kyilya kyilya Mafarisayo waata wakayenda kokye, wakammbia, “Wuka iha, uyende handu hengyi, cha kyipfa Herode nakundi ikuwaaga.”

³²Kawawia, “Yendenyi mundewia ipaara lyilya, ‘Ambuya, inu na ngama ngyiwuta waṟufui wawicho na ikyiṟa waluoe, mfiri o kaṟaaṟu ngyemarisa iṟunda lyako.’

³³Hamwi na isho, ngama na kyilalau, kyangyikooya iengyeṟa iwa mokyaro. Kyipfa chi kyicha moonguo shisuku nawoogo ai nja ya Yerusalemu-pfo.

³⁴Iyoe Yerusalemu, Yerusalemu, uiwaaga weonguo shisuku na ikapa na magoe walya waleṙumo kopfo, nyi kyenga ngyilekunda isania wana wapfo chandu nguku yekyesania shiwana shayo makungonyi gayo, maa mulekunda-pfo.

³⁵Moṙeeyo numba yanyu ilawoṙe mndu! Na inyi ngyimmbia, mochingyiwona-se maa ale-pfo mṟasa kyiyeri mochigamba, ‘Nammbikyie mboṟa ulya aicha kui rina lya Mndumii.’ ”