Read Kivunjo New Testament 1999 Luka 14 Bible Online

Luka 14 - Kivunjo New Testament 1999 bible

Luka 14

¹Kyikawa-ng'u kyiyeri aleiṙa na numbenyi ya mndu umwi kyiiṙi kya wang'anyi wa Mafarisayo mfiri o onyonya, nalye kyelya, wawemlaalyia.

²Na mbele yakye hawewoṙe mndu awoṙe ndoṟe ya safura.

³Yesu kagaluo, kawia walosha wa mawawaso na Mafarisayo, “Ngyesa nyi sungusinyi ikyiṟa mndu mfiri o onyonya ang'u chi wuṙo-pfo?”

⁴Wakatsia. Kammbaṙa kamkyiṟa, kamwenenga momu nayende.

⁵Kawawia, “Nyi wui kyiiṙi kyanyu, kokooya umbe yakye ang'u nzoi yakye yaoloka kyisimenyi alechiiwuta-pfo mfiri o onyonya?”

⁶Nawo waleiṙima igaluo maṙeṙo-ga-pfo.

⁷Kawia mfano walya wawewalage, kyiyeri alewona chandu walesambuṟa shitima sha mbele; echigamba,

⁸“Mndu kakulaga na wolyinyi, ulaṙamie kyitimenyi kya mbele. Kyilawe kye mndu ekyeindio kuta iyoe namlage,

⁹na ulya awekulagie iyoe kacha na ikuwia, ‘Seiya ichu!’ Nyi lyo-ndu ochiwooka iṙamia handu ha numa kui sonu.

¹⁰Indi kolago, yenda undeṙamia handu ha numa, kundu ulya alekulaga kacha nakuwie, ‘Mbuya-yako, nnjo na kunu mbele ngoseṟa.’ Nyi lyo-ndu owaṙa kyiṟumi mbele ya woose waṙamie hamwi na iyoe.

¹¹Cha kyipfa orio mokung'anyisa nechititiṟo na ulya mokutitiṟa neching'anyiso.”

¹²Kawia ulya alemlaga, “Kyiyeri okoṟa kyelya kya kyingoto ang'u kya kyukonyi, maa ulalage mbuya tsapfo maa wana wa wama wapfo, maa kyishari kyapfo, maa wamṟasa wapfo wawoṙe masaa; kundu wo walachekulaga iyoe kotoo.

¹³Indi kyiyeri okoṟa shelya laga wakyiwa, wawoṙe shiwungo shifiri, shileeta, shipfupfuṟe,

¹⁴na iyoe nochiwa nanga, cha kyipfa iwo wawoṙe kyekutaa-pfo; kyipfa nochitoo kyiyeri kya iṟuka lya wasumganyi.”

¹⁵Kyasia kyiyeri aleicho isho umwi o walya waweilya hamwi na oe nalemmbia, “Agusu ulya echilya mkate Wumangyinyi wo Ruwa.”

¹⁶Kammbia, “Mndu umwi naleachikyia karama ing'anyi kalaga wandu wafoi.

¹⁷Kaṙuma mṟundi okye kyiyeri kya ilya kyelya nawie walya wawewalage, ‘Nnjonyi, cha kyipfa shindo shoose shamuṟeyeṟo.’

¹⁸Wakawooka woose iloṟa chandu walechiiṙima iyenda: O kuwooka nalemmbia, ‘Ngyileguṟa ṙema, kyangyikooya iyenda ngyindelyiambuya; ngyiterewa ungyihooṟie.’

¹⁹Ungyi kagamba, ‘Ngyileguṟa umbe ikumi tseṙema, ngyindetsiyesha; ngyiterewa ungyihooṟie.’

²⁰Ungyi kagamba, ‘Ngyilealyika mka, na kyipfa kya ikyo ngyechiiṙima icha-pfo.’

²¹Mṟundi ulya kayenda, kaenenga mndumii okye mbonyi tsa shindo-sho. Kyasia, ulya monyi kanyi kasuo, kawia mṟundi okye, ‘Fuma iwinyi, uyende njienyi ing'anyi na shimṟaṟu sha mṟi, uende wakyiwa na iha, na wawoṙe shiwungo shifiri, na shipfupfuṟe, na shileeta.’

²²Mṟundi kagamba, ‘Mndumii, isho ogamba shamṟundika. Kyaindi maa wulalu kuwoṙe ṙaawa.’

²³Mndumii kawia mṟundi, ‘Fuma na nja uyende mtandaṟenyi na mṟasenyi, undewaitika iiṙa na numba, numba yako iiṙime iichuo.

²⁴Kyipfa ngyimmbia kye kyiiṙi kya walya wawewalage, kuwoṙe maa umwi esonja karama yako-pfo.’ ”

²⁵Kyiyeri wuingyi wufoi wo wandu wuweoshana na oe, naleinduka kawawia,

²⁶“Kokooya mndu acha na koko na oe asuuye awuye maa wamae, na mka okye, na wana wakye, na wana wa wamae wa kyisoṟo na wa kyika; yee maa mrima okye amonyi, echiiṙima iwa manalosho oko-pfo.

²⁷Mndu oose alechiṙuo msalaba okye na ingyiosha, echiiṙima iwa manalosho oko-pfo.

²⁸Kyipfa nyi wui kyiiṙi kyanyu, kokooya akundi iwika numba, alechiṙamia na itala woguru, kye nawoṙe sheimarisia?

²⁹Alachelemo iimarisia ammbikye urende, wandu woose wawonyi wakawooka imwinyala,

³⁰wechigamba, ‘Mndu-chu nalewooka iwika numba, kyikawa awoṙe pfinya tseimarisia-pfo.’

³¹Ang'u kuwoṙe mangyi uha, akundi indekapana na mangyi ungyi, alechiṙamia kuwooka na ikusaṟa kye oe na wandu shiku ikumi nechiiṙima ikapana na ulya awoṙe wandu shiku makumi gawi?

³²Na kokooya awona echiiṙima-pfo, nekyeṙuma ndumi iterewa ufoṟo, mndu ulya akyeri kuleshi.

³³Kyasia, na wuṙo orio umwi onyu alandeṙe shoose awoṙe, eiṙima iwa manalosho oko-pfo.”

³⁴“Munyu nyi kyindo kyicha. Kyaindi munyu ukomnyamaṟika owiko-kyi uiṙime ilotsiṟa?

³⁵Ochiwaṙa-se kyiira ko kyindo kyoose-pfo. Wandu wekyeuwiyitsa nja. Awoṙe maṙwi geaṙanyia, naaṙanyie.”