Read Kivunjo New Testament 1999 Luka 16 Bible Online

Luka 16 - Kivunjo New Testament 1999 bible

Luka 16

¹Lyingyi-se nalewia wanalosho wakye. “Kuwewoṙe mndu umwi, mnjama, awewoṙe mringyi okye o masaa. Ichu naleshitakyio kokye kye naiola-ola masaa gakye.

²Kamlaga, kammbia, ‘Nyi mbonyi tsa mbaṟe iha itsi ngyiichuoe tseṙeṙo kyipfa kyapfo? Loṟa matala ga iṟunda lyapfo, cha kyipfa uiṙima iwa-se mringyi o masaa-pfo.’

³Mringyi ulya kagamba mrimenyi kokye, ‘Ngyiwikye kuṙa? Kyipfa mndumii oko naingyifuna kyiṟundionyi kyako. Iṙema ngyeiṙima-pfo, iterewa, ngiwona sonu.

⁴Ngammanya kyindo ngyechiwuta, kundu ngamfuno kyiṟundionyi kyako, wangyiambilyie kanyi kowo.’

⁵Kalaga walya waweriko na mndumii okye, umwi umwi; kawia o kuwooka, ‘Nuriko kyi na mndumii oko?’

⁶Kagamba, ‘Shiyeṟo igana sha mafuṙa.’ Kammbia, ‘Wuta kyiṟeio kyapfo, ṙamia iwinyi, ṟeia makumi gataanu.’

⁷Numa kawia ungyi, ‘Aa iyoe nuiriko kyi?’ Kagamba, ‘Makunyia igana ga nganu.’ Kammbia, ‘Wuta kyiṟeio kyapfo, ṟeia makumi nyanya.’

⁸Mndumii ulya kaṟumisha mringyi ulya mmbicho kyipfa ilyi alewuta kui wuṟango; cha kyipfa wana wa wuyana-wu rikyenyi lyawo wawenyi waṟango kuta wana wa saa.

⁹Na inyi ngyimmbia, waṙenyi mbuya na shindo sha wuyana, kundu kyiyeri shewuṟika wamuambilyie kulya-ndu mochikaa mlungana.

¹⁰Mndu moringa necha kyilya kyitutu amwenengye, neringa necha na shilya shing'anyi taa.

¹¹Kyasia, kokooya nyoe mulechiiṙima iringa shindo sha wuyana, nyi wui emuenenga iringa shilya sha wuloi?

¹²Na kokooya mulechiiṙima iringa shindo sha mndu ungyi, nyi wui echimuenenga shilya shikyeri shanyu muwenyi.

¹³Kuwoṙe mṟundi eiṙima iṟundia wandumii wawi-pfo; cha kyipfa, nechisuo ichu na ikunda ichu, ang'u newaṙana na ichu na imina ichu. Mochiiṙima iṟundia Ruwa na masaa-pfo.”

¹⁴Kyasia Mafarisayo, wakyeri kye wo wawenyi nyi wandu wakundi heleri, waleicho isho shoose, wakamtaluo.

¹⁵Kawawia, “Nyoe mokyekushelyia wusumganyi mbele ya wandu, kyaindi Ruwa naichi mrima yanyu; cha kyipfa kyindo kyang'anyiso ko wandu kyekyewa wusutsu mbele ya Ruwa.

¹⁶Uwawaso na weonguo shisuku shiwekyeri-pfo mṟasa Yohane, wookyia kyiyeri-kyo ulogo lucha lo Wumangyi wo Ruwa lokyeongoyo, na orio mndu nekyeiṙa napfo ko pfinya.

¹⁷Kyaindi nyi kyaangu Ruwewu na uruka shiwukye ho, kuta kyindo kyitung'tu kya uwawaso kyechiwuka ho.

¹⁸Orio mndu echiṙa mka okye na ialyika ungyi naṟuguya; na mndu moalyika ulya aṙio nyi mii okye naṟuguya.”

¹⁹Kagamba, “Kuwewoṙe mndu umwi, mnjama, awekyeṟaa nguwo tsa kyimaande-maande na kyimari-mari kyicha, echilya mfiri yoose kui wunjama.

²⁰Na mkyiwa umwi, ekyelago Lasaro, awewoṙe mapee gafoi, nawekyeṟamiṟo moongonyi o mnjama-cho,

²¹na oe nawekyelanga iigutso kui shelya-sho shiwekyetonyika mesenyi ko mnjama ulya; mṟasa shite shikachemkomba mapee gakye.

²²Kyikawa kye mkyiwa ulya nalepfa, malaika wakamṙuo wakammbikyia kufuhi na Abrahamu. Mnjama ulya na oe kapfa, kaṟiko.

²³Kyasia, akyeri matuuronyi kulya ko wapfu kawona Abrahamu akyeri kuleshi, na Lasaro kufuhi na oe.

²⁴Kafiiṟa, kagamba, ‘Hoi papa Abrahamu, ngyiwonia wukyiwa, uṙume Lasaro nawikye kyimnyoe kyakye mṟingyenyi naoloṟe ulumi loko, kyipfa ngyituuro kunu moṙonyi.’

²⁵Abrahamu kagamba, ‘Mono-ko, kumbuo kye iyoe nuleambilyia mecha gapfo kyiyeri uwekyeri na moo, na Lasaro nyi wuṙo alewona mawicho; na wulalu oe nakyeri iha naiwiyiṟio moo, na iyoe nutuuro.

²⁶Na ngoseṟa ya isho, makyiṙi-gawi gaṙu soe na nyoe hawikye mkuwa ung'anyi, kundu wakundi iwuka kunu wache na konyu walaiṙime; maa wandu wa konyu walaambaṙe icha na koṙu.’

²⁷Kagamba, ‘Kyasia-ng'u papa, ngyikuterewa, uṙume kanyi ko awu oko,

²⁸cha kyipfa ngyiwoṙe wana wa wama wataanu, kundu nawaṟingyishie, kundu maa wo taa walacheecha na handu-ha ha matuuro.’

²⁹Abrahamu kagamba, ‘Wawoṙe Mose na weonguo shisuku; wawaaṙanyie wo.’

³⁰Kagamba, ‘Ote, papa Abrahamu, kyaindi kokooya mndu awukyie ko wapfu ayenda kowo, weṙumbuya.’

³¹Kammbia, ‘Walandeaṙanyie Mose na weonguo shisuku, wesaṟa kyindo maa mndu kaṟuka ko wapfu-pfo.’ ”