Read Kivunjo New Testament 1999 Luka 17 Bible Online

Luka 17 - Kivunjo New Testament 1999 bible

Luka 17

¹Kawia wanalosho wakye, “Shindo shetewe shiwaṟi icha, kyaindi ochia lo mndu ulya shiicha kyipfa kyakye!

²Nanga mndu-cho awepfungyio ikyesa nzingonyi kokye, nandewiyitso ipalyipalyinyi, kuta itewe umwi o iwa watutu.

³Kuṟiisenyi! Kokooya mono-wama opfo akuṙekyio mṙeṙie; kaṙumbuya wunyamaṟi mhooṟie.

⁴Na kokooya akuṙekyio ka mfungaaṙe mfiri umwi, na iwuya na kopfo ka mfungaaṙe, kagamba, ‘Ngaṙumbuya’, mhooṟie.”

⁵Wasu wakammbia, “Mndumii, luengyeṟie iiṙikyia.”

⁶Mndumii kagamba, “Kokooya muwewoṙe iiṙikyia lyitutu cha mbeu ya haradalyi, muwewia mkuu-chu, ‘Kuluka, undeṙongo ipalyipalyinyi’, nakyo kyiwechiwa kuṙo.”

⁷“Kyaindi, nyi wui konyu awoṙe mṟundi moṙema ang'u molyisa umbe, echimmbia ilyi awuka patenyi, ‘Nnjo iwinyi, ṙamia, ulye kyelya?’

⁸Ngyesa emmbia, ‘Ngyiachikyia kyelya, ngyilye; kuṟeyeṟe ungyiṟundie, mṟasa ngyimarise ilya na inyo, nyilyo na iyoe ochilya na inyo-pfoe?’

⁹Ngyesa nemmbia haika mṟundi ulya, kyipfa awuta shilya alewio?

¹⁰Nyi wuṙo maa nyoe, mukommarisa iwuta shoose mulewio, gambenyi, ‘Soe nyi waṟundi walawoṙe kyiira, loṟunda shilya shiweluwaṟi iwuta tikyi.’ ”

¹¹Kyiyeri waweiyenda Yerusalemu, naweiṙa makyiṙi-gawi ga Samaria na Galyilaya.

¹²Na kyiyeri aleiṙa na kyikaṟonyi kyimwi, nalekarisana na wandu ikumi wawoṙo nyi taambo; wakagoṟoka kuleshi.

¹³Wakakuilenga wechigamba, “Hoi Yesu, Mndumii ung'anyi, ulusaṟie!”

¹⁴Kyiyeri alewawona nalewawia, “Yendenyi mundekuloṟa ko makohanyi.” Kyiyeri waweiyenda, waleila.

¹⁵Na umwi owo ammbone kye nachia, nalewuya, echiana Ruwa kui ṟui lying'anyi.

¹⁶Kakuolotsa wanda maṙendenyi gakye, kamwana; na oe nyi-we Msamaria.

¹⁷Yesu kagaluo, kagamba, “Waleilyisho woose ikumi-pfoe? Walya kyenda wookwi?

¹⁸Ngyesa kuwoṙe walewuya icheenenga Ruwa mng'ano sile myenu-chu?”

¹⁹Kammbia, “Goṟoka, yenda, iiṙikyia lyapfo lyakukyiṟa.”

²⁰Na kyiyeri aleweso nyi Mafarisayo Wumangyi wo Ruwa wochicha indi nalegaluo, kawawia, “Wumangyi wo Ruwa wuicha kui iwusoruo-pfo.

²¹Maa wechigamba, ‘Ambuya, wukyeri kunu, ang'u kulya-pfo;’ cha kyipfa Wumangyi wo Ruwa wukyeri kyiiṙi kyanyu.”

²²Kawia wanalosho wakye, “Mfiri iicha kyiyeri mochilanga iwona mfiri umwi kyiiṙi kya mfiri ya Mana o Adamu, mulechiuwona.

²³Lyingyi-se wemmbia, ‘Ambuya, kulya! Ambuya, kunu!’ Maa mulawukye handu mukyeri, maa mulawaoshe.

²⁴Cha kyipfa, chandu mbawa tsekyelyimika iwuka ura-lu mṟasa ura-lu wanda ya ngyina, nyi wuṙo kyechiwa ko Mana o Adamu kyiyeri echicha lya kawi.

²⁵Kyaindi kuwooka, kyamkooya iwona matuuro gafoi, na ilego nyi rika-lyi.

²⁶Na chandu kuwei kyiyeri kya Noe, nyi wuṙo kochiwa mfiri Mana o Adamu echicha lya kawi.

²⁷Waweilya na inyo, waweialyika na ialyiko, mṟasa mfiri ulya Noe aleiṙa na Safinenyi, ngapo ikacha ikawarumatsa woose.

²⁸Nyi wuṙo taa, chandu kuwekyeri mfiri iya ya Loti, weweilya na inyo, waweiguṟa na ikumba, waweiwaaya na iwika numba;

²⁹kyaindi mfiri ulya Loti alewuka Sodoma kuleoloka moṙo na kyipiriti iwuka ruwewu, shikawarumatsa woose.

³⁰Nyi wuṙo kochiwa mfiri ulya o iwoneka lya Mana o Adamu.

³¹Mfiri ulya, akyeri kai na shindo shakye shikyeri numba, alasokye icheshionduo. Nyi wuṙo taa, akyeri mṙemenyi alaambuye numa.

³²Kumbuonyi mka o Loti.

³³Mndu oose echikyiṟa mrima okye, neuṙetsa, na oose echiuṙetsa neukyiṟa.

³⁴Ngyimmbia, kyio-kyo wandu wawi wechikooyo kyitaṟenyi kyimwi; umwi neṙoo na umwi neṙio.

³⁵Waka wawi wekooyo wesaa handu hamwi; umwi neṙoo na umwi neṙio.” [

³⁶“Wandu wawi wekooyo mṙemenyi, umwi neṙoo, umwi neṙio.”]

³⁷Wakagaluo, wakammbesa, “Ny'kwi, Mndumii?” Kawawia, “Handu hawoṙe mnying'a nyi ho-ndu hechikuumbia mtonyi.”