Read Kivunjo New Testament 1999 Luka 18 Bible Online

Luka 18 - Kivunjo New Testament 1999 bible

Luka 18

¹Kawawia mfano, kye kyawakooya iterewa Ruwa mfiri yoose, maa walapfiio nyi mṙoe.

²Kagamba, “Kuwewoṙe moanduo moondu mṟinyi mlyiwe, alekyeindia Ruwa, maa iwutia wandu mecha.

³Na ipfo mṟinyi kuwewoṙe mndu mka mkusu, awekyeyenda-yenda kokye, echigamba, ‘Ngyienenga kyilya kyingyiwaṟi inyi na mokyituwa oko.’

⁴Na oe kui kyiyeri kyifuhi nalelega. Numa ya iho kagamba mrimenyi kokye, ‘Maa chandu ngyilaiṙikyie Ruwa, maa iwutia wandu mecha,

⁵kyipfa mka-chu mkusu naingyipfulutsa nyashi ngyemwenenga kyilya kyimmbaṟi, alechengyiwinisha kui icha na koko shiyeri shoose.’ ”

⁶Mndumii kagamba, “Aṙanyienyi chandu aigamba moanduo moondu ulya mmbicho.

⁷Ngyesa Ruwa, echiwaenenga kyilya kyiwawaṟi wasambuṟe wakye wekyemfiiṟia kyio na kyingoto-pfoe? Ngyesa nechikyelyio iwatarama?

⁸Ngyimmbia, newaenenga kyilya kyiwaṟi iwinyi; kyaindi, kyiyeri Mana o Adamu echicha, ngyesa newona iiṙikyia wuyanenyi?”

⁹Kawia mfano wandu walekuloṟa kye wo nyi wandu wawoṙe wusumganyi, wechipiṟa wengyi woose.

¹⁰“Wandu wawi waleṙo iyenda hekalunyi indeterewa, umwi Mfarisayo, na o kawi mosania ukamba.

¹¹Mfarisayo ulya kagoṟoka echiterewa kuṙi mrimenyi kokye, ‘Hoi Ruwa, ngakuana kyipfa inyi chi kyimwi na wandu wengyi, wasokyi, wawicho, waṟui maa cha mosania ukamba-chu-pfo.

¹²Inyi ngyekyekuretekyia kawi ko juma. Ngyekyewuta kyiano iwuka shienengonyi shako shoose.’

¹³Kyaindi mosania ukamba ulya nalegoṟoka kuleshi maa alekaria iambuya ruwewu-pfo, indi nalekapa-kapa kyipoota echigamba, ‘Hoi Ruwa, ungyihooṟie inyi mnyamaṟi.’

¹⁴Ngyimmbia, ichu nalesoka iyenda kanyi kokye amtalyie wusumganyi kuta ulya; cha kyipfa orio mokung'anyisa nechititiṟo, na ulya mokutitiṟa neching'anyiso.”

¹⁵Wakamwendie wana wanangu kundu nawapaaye; kyaindi kyiyeri wanalosho walewona walewatuukyia.

¹⁶Indi Yesu kawalaga wache na kokye, kagamba, “Lekyenyi wana-wa wache na koko, maa mulawashingyie, cha kyipfa wandu cha iwa Wumangyi wo Ruwa nyi wowo.

¹⁷Kyaloi, ngyimmbia, mndu oose alandeambilyie Wumangyi wo Ruwa cha mana mtutu echiiṙa napfo maa kyitutu-pfo.”

¹⁸Lyingyi-se, mndu umwi msongoru nalemmbesa, echigamba, “Mlosha mcha, ngyiwute kyi kundu ngyiiṙime ioṟa moo o mlungana?”

¹⁹Yesu kammbia, “Ny'kyilyi ungyilaga mcha? Kuwoṙe akyeri mcha sile umwi-pfo, na oe nyi Ruwa.

²⁰Nuichi mawawaso: Ulaṟuguye maa Ulaṟuguyo, Ulawaage, Ulaiwe; Maa ulaṟingyishie wongo, India awuyo na womoo.”

²¹Kagamba, “Isho shoose ngyekyeshiosha wookyia wututunyi woko.”

²²Kyiyeri Yesu aleicho ikyo nalemmbia, “Nuwuṟie kyindo kyimwi. Kumba shoose uwoṙe, undegawia wakyiwa, na iyoe nochiwaṙa kyiseyesoe ruwewu, numa ya iho nnjo ungyioshe.”

²³Indi kyiyeri aleicho ikyo nalewihiyo mrimenyi mnu, kyipfa nawewoṙe masaa gafoi.

²⁴Kyiyeri Yesu alewona kuṙo nalegamba, “Nyi kui wukyiwa wo mbaṟe iha wanjama wechiiṙa na Wumangyinyi wo Ruwa!

²⁵Cha kyipfa nyi kyaangu ngamia iiṙa ṟochonyi lya sindanu kuta mnjama iiṙa na Wumangyinyi wo Ruwa.”

²⁶Na walya waleicho walegamba, “Nyi wui-ng'u echiiṙima ikyia?”

²⁷Kagamba, “Shilekyeiṙimika ko wandu shekyeiṙimika ko Ruwa.”

²⁸Petiro kagamba, “Soe luleṙa shindo shoose na ikuosha.”

²⁹Kawawia, “Ny'kyaloi ngyimmbia, kuwoṙe mndu aleṙa numba, ang'u mka, ang'u wana wa wamae, ang'u wafee, ang'u wana, kyipfa kya Wumangyi wo Ruwa,

³⁰alechiambilyia ngoseṟa mnu kyiyeri-kyi na wuyanenyi wuicha moo o mlungana-pfo.”

³¹Kaṙuo walya ikumi na wawi, kawawia, “Luiṙo iyenda Yerusalemu, na mbonyi tsoose tsa Mana o Adamu weonguo shisuku waleṟeia tseafukyia.

³²Cha kyipfa newiko mawokonyi ga wandu walaiṙikyie Ruwa. Wechimwinyala; wemtaluo, na impuchia maṙa.

³³Nawo wemkapa na msharite, na numa ya iho wemmbaaga; na mfiri o kaṟaaṟu neṟuka.”

³⁴Kyaindi walemanya mbonyi-tso maa ale-pfo, na kyindo-kyo kyiwekyiṟikye kowo, maa walemanya kyileṙeṙo-pfo.

³⁵Kyiyeri aleshika kufuhi na Yeriko, mndu umwi kyipfupfuṟe, naweṙamie mbai ya njia, eterewa shienengo.

³⁶Na lyilya aleicho wuingyi wo wandu wochiiṙa, nalewesa, “Kuwoṙe kyikyi?”

³⁷Wakammbia, “Yesu o Nasareti aiiṙa.”

³⁸Kalaga ṟui lying'anyi, echigamba, “Yesu, Mana o Dawidi, ungyisaṟie.”

³⁹Kyasia walya wawesongoi wakamtuukyia kundu natsie; kyaindi oe naleengyeṟa mnu ilaga na ṟui lying'anyi, “Hoi Mana o Dawidi, ungyisaṟie.”

⁴⁰Yesu kagoṟoka, kagamba naendo na kokye, na kyiyeri alecha na kufuhi Yesu nalemmbesa,

⁴¹“Nukundi ngyikuwutie kyi?” Kagamba, “Mndumii, ngyiiṙime iwona.”

⁴²Yesu kammbia, “Enengo iwona. Iiṙikyia lyapfo lyakukyiṟa.”

⁴³Cha ilyi kaenengo iwona, kamwosha kunu echiana Ruwa. Na wandu woose wammbone isho waleṟumisha Ruwa.