Read Kivunjo New Testament 1999 Luka 21 Bible Online

Luka 21 - Kivunjo New Testament 1999 bible

Luka 21

¹Kapaluo meso kawona wanjama wewika shiano shawo sandukunyi ya shiano.

²Kawona mndu mka umwi mkusu na mkyiwa ewika pfo helo tsiwi.

³Kagamba, “Kyaloi ngyimmbia, mndu mka-chu mkusu na mkyiwa nawika ngoseṟa kuta woose;

⁴kyipfa, iwo woose wawika shindo wawuta ngoseṟenyi ya masaa gawo indi ichu wukyiwenyi wokye nawika shoose awoṙe.”

⁵Na kyiyeri wandu waata waweiṙeṙa mbonyi tsa Hekalu, chandu lyiwelyichope kui magoe mecha na shiano sha wandu, nalegamba,

⁶“Ishi muishiambuya, kuicha mfiri halechiṙio igoe wuye ya igoe lyingyi indi geolo-olo goose.”

⁷Wakammbesa, wechigamba, “Mlosha, shindo-sho shechiwa indi? Na nyi kyiṟingyishio kyiha kyeloṟa kye shindo-sho shikyeri kufuhi na icha?”

⁸Kagamba, “Ambuyenyi, mulachelembo, cha kyipfa wafoi wechicha kui rina lyako, wechigamba, ‘Inyi nyi oe.’ Lyingyi-se, ‘Kyiyeri kyamshika.’ Kyasia, maa mulawaoshe.

⁹Na nyoe kyiyeri mochiicho mbonyi tsa shiṙa na wuṟiingyi, maa mulaowesho; kyipfa isho shoose kyakooya icha kuwooka, indi mafurumionyi galya gecha iwinyi-pfo.”

¹⁰Numa ya iho kawawia, “Isanga lyefuma ikapana na isanga, na wumangyi ikapana na wumangyi.

¹¹Kowaṙa shiriinza shing'anyi na njaa na ndoṟe ya tauni; na shindo sheowesha na shiṟingyishio shing'anyi iwuka ruwewu.

¹²Kyaindi, maa kyiyeri shoose shilandewono, wemmbaṙa na imsuiṟa; wemṙuo mbele ya masinagogi, na immbika kyipfungonyi, mochiṙoo mbele ya wamangyi na wachilyi kyipfa kya rina lyako.

¹³Na isho sheewa kyiṟingyishio konyu.

¹⁴Kyasia, maa mulakusaṟe-saṟe mrimenyi konyu chandu mochiṙeṙa;

¹⁵cha kyipfa inyi ngyemuenenga maṙeṙo na wuṟango watuuri wanyu woose walechiiṙima iwingana nawo maa imulega.

¹⁶Na nyoe mochiṟiingyio nyi wafee wanyu, na wana wa wama wanyu, na wa kanyi konyu, na mbuya tsanyu, na wafoi wanyu mochiwoogo.

¹⁷Na nyoe wandu woose wemusuo kyipfa kya rina lyako.

¹⁸Kyaindi maa uchui lumwi lo mṙoe yanyu loṙeka-pfo.

¹⁹Na nyoe kui wusimiri wonyu mochikyiṟa mrima yanyu.”

²⁰“Kyaindi, kyiyeri-kyo mochiwona mṟi o Yerusalemu umringyichie nyi wamesa, manyenyi-ng'u kye irumatso lyacho lyatikyira.

²¹Nyi lyo-ndu wakyeri urukyenyi lo Uyuda waṙichilyie fumvunyi, na wakyeri makyiṙi-gawi gacho waṙichilyie nja, na wakyeri maṙemenyi walaiṙe na mṟinyi.

²²Cha kyipfa mfiri-yo nyiyo yetaa kyiṟaache, kundu shiafukyie shoose shishiṟeie.

²³Ochia lo iwo wawanene na waionza mfiri-yo! Cha kyipfa kochiwaṙa wukyiwa wung'anyi urukyenyi, na nyashi kyipfa kya isanga-lyi.

²⁴Wechiwoogo kui ushu, nawo wewoṙo na iṙoo masangyenyi koose, na mṟi o Yerusalemu ochichilyio nyi walya walaiṙikyie Ruwa mṟasa kyiyeri kya walya walaiṙikyie Ruwa kyechiafukyia.”

²⁵“Lyingyi-se, kochiwaṙa kyiṟingyishio mnengyeṟinyi, na morinyi, na nyenyerinyi, na urukyenyi wukyiwa wung'anyi wo masanga gechiṟiyio kyipfa kya ndiṟimo tsing'anyi tsa ipalyipalyi.

²⁶Wandu wechiuma wechiweṙelyia shindo shewutikyia wuyana. Cha kyipfa shindo shikyeri ruwewu shekupaaya-paya.

²⁷Iho nyiho wewona Mana o Adamu echicha ipuchinyi hamwi na pfinya na mng'ano ung'anyi.

²⁸Kyasia kyiyeri shindo-sho shechiwooka icha, kaṟamkyenyi mochiira mṙoe yanyu, cha kyipfa wukyiṟo wonyu womtikyira.”

²⁹Kawawia mfano, “Ambuyenyi mfumu na mashiṙi gengyi goose.

³⁰Kyiyeri gamuoṙie, mokyewona na imanya muwenyi kye kyiyeri kyesambuo kyamtikyira kufuhi.

³¹Na nyoe taa, mukowona shindo-sho shewooka icha, manyenyi kye Wumangyi wo Ruwa wukyeri kufuhi.

³²Ny'kyaloi, ngyimmbia, rika-lyi lyechiiṙa-pfo mṟasa isho shoose shiafukyie.

³³Ngyina na uruka shechiiṙa, kyaindi maṙeṙo gako gechiiṙa maa ale-pfo.”

³⁴“Kyasia ringyenyi mrima yanyu ilachelemeṟo nyi shindo shelya, na wunanzi, na iwinia shindo sha wuyanenyi; mfiri ulya ukocha na konyu kyituukyia chandu mṙego okyetalasuka.

³⁵Cha kyipfa nyi wuṙo mfiri ulya ochicha ko wandu woose wakyeri wuyanenyi koose.

³⁶Kyasia, nyoe laenyi kyiṙombo orio kyiyeri, mochiterewa kundu muiṙime ikyia kyiiṙi kya isho shoose shewutika, na igoṟoka mbele ya Mana o Adamu.”

³⁷Kyasia, orio kyingoto nawekyeloshia hekalunyi, na kyio nawekyendelaa fumvunyi lyiwekyelago Mseituni.

³⁸Na wandu woose wawekyeamka ngamenyi utuko iyenda hekalunyi kundu wamwaṙanyie.