Read Kivunjo New Testament 1999 Luka 22 Bible Online

Luka 22 - Kivunjo New Testament 1999 bible

Luka 22

¹Mfiri ung'anyi o mkate ilangyitarang'ishe, okyelago Mfiri ung'anyi o Pasaka, uletikyira kufuhi.

²Na wang'anyi wa makohanyi na walosha wa mawawaso waweipfula njia ya immbaaga; kyipfa wawekyeowuo wandu.

³Satana kacha na ko Yuda, ekyelago Isikariote, na oe nyi umwi o walya ikumi na wawi.

⁴Kafuma kandeṙeṙa na wang'anyi wa makohanyi, na wang'anyi wa asikari wa shiṙa, chandu eiṙima immbika mawokonyi gawo.

⁵Wakachihiyo, wakaiṙikyiana na oe imwenenga heleri.

⁶Kaiṙikyia, kapfula ṙaawa lyemṟiinga kowo kyiyeri wandu wa kyisanzionyi walaichi.

⁷Mfiri o mkate ilangyitarang'ishe ukoshika na mfiri-cho kyiwewaṟi ishinja Kyiondo kya Pasaka.

⁸Kaṙuma Petiro na Yohane, echigamba, “Yendenyi, mundeluṟeyeṟia Pasaka luiṙime ilya.”

⁹Wakammbia, “Nukundi lukuṟeyeṟie hanga?”

¹⁰Kawawia, “Ilyi muiṙa na mṟinyi mokarisana msoṟo akuṙikyie kyitongoṟima. Muoshenyi muiṙe na numba-yo echiyenda.

¹¹Na mowia monyi numba, ‘Mlosha nakuwia, kyookwi kyiṟi kya wayenu ngyilyiie-pfo pasaka hamwi na wanalosho wako?’

¹²Na oe nemuloṟa kyiṟi kying'anyi kyikyeri kai, kyamchopo; ṟeyeṟenyi pfo.”

¹³Wakayenda, wakawona chandu alewawia, wakaṟeyeṟa pasaka.

¹⁴Lyilya kyiyeri kyileshika nalewooka ilya, oe hamwi na wasu walya.

¹⁵Kawawia, “Ngalanga mnu ilya pasaka-i hamwi na nyoe ituuro lyako lyilandeshikye.

¹⁶Cha kyipfa ngyimmbia kye ngyechilya-se mṟasa kyiyeri yeafutsio Wumangyinyi wo Ruwa-pfo.”

¹⁷Kaambilyia kyiṙoo, kaana, echigamba, “Ambilyienyi ikyi, mugawane nyoe wenyi ko wenyi.

¹⁸Kyipfa ngyimmbia kye wookyia wulalu ngyechinyo-se kyindo kyawuka msabibunyi sile mṟasa kyiyeri Wumangyi wo Ruwa wochicha-pfo.”

¹⁹Kaambilyia mkate, kaana, kaupeṟenguo, kawaenengyia echigamba, “Ichu nyicho mmbiu oko uiwuto kyipfa kyanyu. Wutenyi kuṙi kui ingyikumbuo.”

²⁰Kyiṙoo nakyo na wuṙo amlye; kagamba, “Kyiṙoo-kyi nyi mma mhya samunyi yako, ipusuka kyipfa kyanyu.

²¹Kyaindi kuwoko ko ulya aingyiṟiinga kukyeri hamwi na inyi iha mesenyi.

²²Cha kyipfa Mana o Adamu naindepfa chandu kyiwaṟi kyaindi ochia lokye mndu ulya momṟiinga!”

²³Wakawooka iwesana wo wenyi ko wenyi, nyi wui kyiiṙi kyawo ewuta kyindo-kyo.

²⁴Kukowaṙa iwingana kyiiṙi kyawo, kye nyi wui aitalo nang'anyi.

²⁵Kawawia, “Wamangyi wa walya walaiṙikyie Ruwa wekyemchilyia, na walya wamchilyie wekyelago nyi wesaṟia;

²⁶kyaindi konyu nyoe chi wuṙo-pfo, indi ang'anyi konyu nawe cha akyeri mtutu; na mochilyia nawe cha ulya aiṟundia wengyi.

²⁷Kyipfa ang'anyi nyi uha? Ulya aṙamie echilya ang'u nyi ulya aiṟundia wengyi? Chi ulya aṙamie echilya-pfoe? Kyaindi inyi kyiiṙi kyanyu nyi cha mndu aiṟundia wengyi.

²⁸Na nyoe muleṙio hamwi na inyi kyiyeri kyoose kya iyesho lyako.

²⁹Chandu alengyienenga inyi Wumangyi, na wuṙo ngyechimuenenga nyoe Wumangyi;

³⁰muiṙime ilya na inyo mesenyi yako Wumangyinyi woko; na iṙamia shitimenyi sha mng'ano, kunu mochianduya wandu wa mbaṟe ikumi na tsiwi tsa Isiraelyi.”

³¹Kagamba, “Simion, Simion; Satana namlanga nyoe namuele cha nganu.

³²Kyaindi ngakuterewia iyoe kundu iiṙikyia lyapfo lyilawe lyifofo; na iyoe ilyi okyiṟo ukarishe wana wa womoo.”

³³Kammbia, “Mndumii, kyiyeri ngyikyeri hamwi na iyoe, ngyikuṟeyeṟie iyenda kyipfungonyi ang'u upfunyi.”

³⁴Kagamba, “Ngakuwia, Petiro, ilying'onyi lyechifuga inu, iyoe ulangyikana kaṟaaṟu kye ungyiichi-pfo.”

³⁵Kawawesa, “Ngyesa lyilya ngyilemuṙuma mulawoṙe kyikuchu, maa mkunja, maa shiaṙu, muleuṟa kyindo?” Wakagamba, “Ote.”

³⁶Kawawia, “Kyaindi wulalu mndu awoṙe kyikuchu nakyiṙuo, na mkunja na wuṙo; na alawoṙe ushu, nakumbe ijoho lyakye nandeguṟa.

³⁷Cha kyipfa ngyimmbia, isho shileṟeio kyakooya iafutsio koko, kye naletalyio hamwi na wanyamaṟi. Cha kyipfa isho shingyiwaṟi shiwoṙe mafurumionyi gasho.”

³⁸Wakagamba, “Mndumii, iha hawoṙe mapanga gawi.” Kawawia, “Lekyenyi, kyishikyie.”

³⁹Kafuma kayenda mṟasa fumvunyi ya Mseituni chandu aweichiwie, wanalosho wakye wakaoshana na oe.

⁴⁰Kyiyeri aleshika handu halya nalewawia, “Terewenyi kundu mulacheṙoo kyiyeshionyi.”

⁴¹Oe amonyi kalekana nawo cha handu hewiyitsa igoe, kapfiria ndi katerewa,

⁴²echigamba, “Hoi Awu, kokooya nyi wuṙo ukundi ungyiwute kyiṙoo-kyi. Indi chi chandu ngakunda inyi-pfo, kyaindi kyilya ukundi kyiwutikye.”

⁴³Malaika iwuka ruwewu kacha na kokye kamkarisha.

⁴⁴Na oe kyipfa awekyeri wukyiwenyi wung'anyi, kaengyeṟa mnu iterewa; msino okye ukowa cha maṙonyi ga samu gechitonyika wanda.

⁴⁵Kyiyeri alewuka kyiterewonyi, kacha na ko wanalosho wakye, kawakooya walee maṙoe kui fowa.

⁴⁶Kawawia, “Ny'kyilyi molaa maṙoe? Amkyenyi, mundeterewa, mulacheiṙa na kyiyeshionyi.”

⁴⁷Kyasia, kyiyeri aweiṙeṙa, wuingyi wo wandu, na ulya ekyelago Yuda, umwi o walya ikumi na wawi, nawewasongoye. Katikyira ko Yesu kundu namkombe.

⁴⁸Yesu kammbia, “Yuda, noṟiinga Mana o Adamu kui imkomba?”

⁴⁹Na walya wawekyeri kufuhi na oe kyiyeri walewona kyindo kyichewutika, walegamba, “Mndumii, lukowakapa na ushu?”

⁵⁰Umwi owo kakapa mṟundi o Mkohanyi ang'anyi kuta woose kamṙumbuo kuṙwi ko kulyoe.

⁵¹Yesu kagaluo, kagamba, “Lekyenyi, kuwoṙe ikapana-se-pfo.” Kampaaya kuṙwi kamkyiṟa.

⁵²Yesu kawia wang'anyi wa makohanyi, na wasongoru wa hekalu, na wasongoru wa wandu, walecha kyipfa kyakye, “Ngyesa mocha muwoṙe ngyuushu na ṟungu cha ilyi muichewaṙa msokyi?

⁵³Orio mfiri ngyiwekyeri na nyoe hekalunyi kyaindi mulengyileshia kuwoko-pfo, indi ikyi nyikyo kyiyeri kyanyu, na wuchilyi wo meema.”

⁵⁴Wakammbaṙa, wakamṙuo, wakayenda na oe kanyi ko Mkohanyi ang'anyi kuta woose. Na Petiro nalemwosha ai kuleshi.

⁵⁵Na kyiyeri wamuatse moṙo makyiṙi-gawi ga pata, waleṙamia handu hamwi, na Petiro kaṙamia kyiiṙi kyawo.

⁵⁶Nyi lyo-ndu kyisinga kyimwi kyilemmbona aṙamie saenyi, kyikamwambuya karii, kyikagamba, “Na ichu nawekyeri hamwi na oe.”

⁵⁷Kakana, echigamba, “Iyoe mndu mka, ngimwichi-pfo.”

⁵⁸Hamwiṙe kyiyeri kyitutu mndu ungyi nalemmbona, kagamba, “Na iyoe nyi umwi owo.” Petiro kagamba, “Iyoe mndu, chi inyi-pfo.”

⁵⁹Numa ya iho cha saa imwi, mndu ungyi kapfuṟukana igamba, “Kyaloi na ichu nawei hamwi na oe, cha kyipfa oe taa nyi Mgalyilaya.”

⁶⁰Petiro kagamba, “Iyoe mndu, ngyiichi kyindo uigamba-pfo.” Na kyiyeri aweiṙeṙa kuṙo, ilying'onyi lyilefuga.

⁶¹Mndumii kainduka kaambuya Petiro. Petiro kakumbuo kyindo kyilya Mndumii alemmbia, “Inu ilying'onyi lyilafuga, nongyikana kaṟaaṟu.”

⁶²Kafuma na nja kafiiṟa mnu.

⁶³Na wandu walya waweiweṙa Yesu walemtaluo na imkapa.

⁶⁴Wakamshikyia meso, numa wakammbesa-wesa, wechigamba, “Manya nyi wui akukapa?”

⁶⁵Wakammbia na shindo shingyi shifoi shemlahia.

⁶⁶Kyiyeri kulekya, wasongoru wa wandu walewaṙa kyisanzionyi na wang'anyi wa makohanyi, na walosha wa mawawaso, wakamwende na mengyenyi kowo, wechigamba,

⁶⁷“Kokooya iyoe nyi oe Kristo, luwie.” Kawawia, “Maa ngammbia, mochiiṙikyia maa ale-pfo.

⁶⁸Lyingyi-se, ngammbesa mongyigaluo-pfo.

⁶⁹Kyaindi wookyia wulalu Mana o Adamu nechiṙamia ura lo kulyoe lo Ruwa Mopfinya.”

⁷⁰Wakagamba woose, “Kyasia, iyoe nyi oe Mono-Ruwa-ng'ue?” Kawawia, “Nyoe mogamba kye inyi nyi oe.”

⁷¹Wakagamba, “Kyasia, lukundi-se wuṟingyishi wokyi? Kyipfa, soe luwenyi loicho maṙeṙo ga ṙumbu lyakye.”