Read Kivunjo New Testament 1999 Luka 24 Bible Online

Luka 24 - Kivunjo New Testament 1999 bible

Luka 24

¹Mfiri o kuwooka o juma, kyiyeri kulewooka ikya, waleyenda kyilomenyi, wechiende mafuṙa galya waweṟeyeṟie.

²Wakakooya igoe lyilya lyilyiimbiṟitsie kuleshi na kyilome,

³wakaiṙa napfo walawone mmbiu o Mndumii Yesu.

⁴Kyiyeri waweiṟewe kyipfa kya kyindo-kyo, wandu wawi walegoṟoka kufuhi nawo, waṟee nguwo tsikyema-kyema.

⁵Nawo kyiyeri walewoṙo nyi fowa na iarama mṟasa wanda, iwo walewawia, “Ny'kyilyi muipfula ai na moo ko wapfu?

⁶Akyeri iha-pfo, amṟuka. Kumbuonyi chandu aleṙeṙa na nyoe kyiyeri awekyeri Galyilaya,

⁷echigamba, ‘Kyakooya Mana o Adamu iwiko mawokonyi ga wanyamaṟi, na iwoogo, na iṟuka mfiri o kaṟaaṟu.’ ”

⁸Wakakumbuo maṙeṙo gakye.

⁹Wakawuka kyilomenyi, wakawuya; wakawia walya ikumi na umwi na wengyi woose mbonyi-tso tsoose.

¹⁰Nawo nyi Maria Makyidalena, na Yoana, na Maria, wama o Yakobo, na waka walya wengyi wawekyeri nawo;

¹¹iwo walewia wasu mbonyi tsa shindo-sho.

¹²Maṙeṙo gawo gakawa cha kyindo kyerooiya kowo, maa walewaiṙikyia-pfo. Indi Petiro nalefuma kakapa mteeṟa mṟasa kyilomenyi, kaarama kaimemia pfo, kawona nguwo iya awemwaṟahie, kayenda echiṟiyio ko isho shilewutika.

¹³Na mfiri ulya ulya wandu wawi kyiiṙi kyawo waweiyenda kyikaṟo kyimwi, kyekyelago Emau, kyiwekyeri kuleshi na Yerusalemu cha handu ha kyaro kya saa tsiwi.

¹⁴Nawo waweiṙeṙa wo wenyi ko wenyi mbonyi tsa shindo-sho shoose shilewutika.

¹⁵Na kyiiṙi kya ikapa sumu na iwesana lyawo, Yesu amonyi naletikyira kufuhi, kaoshana nawo.

¹⁶Meso gawo gakashingo walammanye.

¹⁷Kawawia, “Nyi maṙeṙo ga mbaṟe iha muwiana kuṙi ilyi muichumia?” Wakagoṟoka walemie nzineeri.

¹⁸Kagaluo umwi owo, ekyelago Kyileopa, kammbia, “Ngyesa nyi iyoe kumonyi ukyeri myenu kulya Yerusalemu, mṟasa ulamanye shilewutika pfo mfiri-i?”

¹⁹Kawawesa, “Mbonyi tsiha?” Wakammbia, “Mbonyi tsa Yesu o Nasareti, awekyeri moonguo shisuku awewoṙe wuiṙimi kyiiṙi kya iwuta na iṙeṙa mbele ya Ruwa na wandu woose.

²⁰Lyingyi-se chandu wang'anyi wa makohanyi, na wasongoru waṙu walemwanduya ipfa, wakammbaaga.

²¹Na soe luwekusurie kye oe nyi oe echikyiṟa Isiraelyi. Ngoseṟa ya isho shoose, inu nyi mfiri o kaṟaaṟu wookyia shilewutika isho.

²²Lyingyi-se, waka waata wa koṙu waleluowesha, waleyenda kyilomenyi ngamenyi utuko,

²³walawone mmbiu okye; wakachegamba kye walechio nyi malaika walegamba kye nakyeri na moo.

²⁴Na wengyi wawekyeri hamwi na soe waleyenda kyilomenyi wakawewona kuṙo chandu waka walya walegamba, indi oe walemmbona-pfo.”

²⁵Kawawia, “Nyoe wandu mulaichi, muwoṙe mrima ngyilemeri iiṙikyia shoose weonguo shisuku walegamba!

²⁶Ngyesa kyilekooya Kristo iwona matuuro-ga na iiṙa na mng'anonyi okye-pfoe?”

²⁷Kawooka wookyia Mose na weonguo shisuku woose, kawaongoya shiṟeionyi shoose, mbonyi tsakye oe amonyi.

²⁸Wakatikyira kufuhi na kyikaṟo kyilya waweiyenda, na oe kawa cha ilyi naweiyenda mbele.

²⁹Wakamterewa, wechigamba, “Kaa hamwi na soe, cha kyipfa komiila na kyio kyamcha.” Kaiṙa na numba ikaa nawo.

³⁰Na kyiyeri aweṙamie nawo echilya, naleira mkate, kauwikyia mboṟa, kaupeṟenguo.

³¹Meso gawo gakatambaṟuka, wakammanya; numa ya iho kawuka mbele yawo.

³²Wakawiana, “Ngyesa mrima-i yaṙu yaluloṟa ilyi aweiṙeṙa na soe njienyi, na ilutambuluya shiṟeio-pfoe?”

³³Wakaamka saaiya-iya, wakawuya na Yerusalemu, wakakooya walya ikumi na umwi wakusanie, wo na walya wawekyeri hamwi nawo,

³⁴wechigamba, “Mndumii amṟuka loi loi, na oe nawonekyia Simion.”

³⁵Nawo wakawawia mbonyi tsilya tsa njienyi, na chandu alemanyika kowo kyiyeri alepeṟenguo mkate.

³⁶Na lyilya waweiṙeṙa mbonyi-tso oe amonyi nalegoṟoka makyiṙi-gawi gawo, kawawia, “Ufoṟo lukae konyu.”

³⁷Wakaṙumbuko nyi maṙima wakaowuo mnu, wekusaṟa kye wawonyi mumuyo.

³⁸Kawawia, “Ny'kyilyi muiṟewe? Na kyitewe mokapa kawi mrimenyi konyu ny'kyi?

³⁹Ambuyenyi mawoko gako na maṙende gako, kye nyi inyi ngyimonyi. Ngyiwaṙe-waṙenyi muwone; cha kyipfa mumuyo uwoṙe mmbiu na mafuo chandu mungyiwonyi ngyiwoṙe-pfo.”

⁴⁰Amgambe isho nalewaloṟa mawoko gakye na maṙende gakye.

⁴¹Kyasia kyiyeri walelemo iiṙikyia kyipfa kya sia, na kunu wechiṟiyio, nalewawia, “Muwoṙe kyelya kyoose iha?”

⁴²Wakamwenenga kyipeṟengu kya ikunga kyiwekyikagaṟe.

⁴³Kakyiambilyia, kalya mbele yawo.

⁴⁴Numa ya iho kawawia, “Igo nyigo maṙeṙo gako ngyilemmbia lyilya ngyiwekyeri hamwi na nyoe, kye kyakooya shiafutsio shoose Mose aleṟeia Uwawasonyi kyipfa kyako na shilya weonguo shisuku waleṟeia na shilya shishiṟeie shiimbonyi.”

⁴⁵Nyi lyo-ng'u aletambuluo ngyuuṟango tsawo waiṙime imanya shiṟeio.

⁴⁶Kawawia, “Nyi wuṟo kyiwekyiṟeie, kye Kristo nechituuro na iṟuka mfiri o kaṟaaṟu.

⁴⁷Na kye masanga goose geongoyo mbonyi ngyicha kui rina lyakye, mbonyi tsa iṙumbuya wunyamaṟi na ihooṟio gyuunyamaṟi, iwookyia Yerusalemu.

⁴⁸Na nyoe nyi waṟingyishi wa mbonyi-tsi.

⁴⁹Na inyi ngyimuendie kyaasa kya Awu oko; kyaindi ṙionyi kunu mṟinyi, mṟasa muṟiko pfinya tsiwukyie wuye.”

⁵⁰Kawasongoya mṟasa Betania, kaira mawoko gakye kawawikyia mboṟa.

⁵¹Na kyiyeri aweiwawikyia mboṟa, nalelekana nawo; kaṙoo wuye ruwewu.

⁵²Wakamwindia; numa ya iho wakawuya na Yerusalemu wawoṙo nyi sia ing'anyi.

⁵³Nawo kyiyeri kyoose wawekyeri hekalunyi, weṟumisha Ruwa.