Read Kivunjo New Testament 1999 Luka 4 Bible Online

Luka 4 - Kivunjo New Testament 1999 bible

Luka 4

¹Na Yesu, amwichuṟo nyi Mumuyo Mweele nalewuya iwuka Yoridan, kaṙoo nyi Mumuyo Mweele kyiyeri kya mfiri makumi gaana kundu ko nuka,

²echiyesho nyi Mokyiriinzi. Na mfiri-yo nawekuretekyia; na kyiyeri mfiri yekuretekyia ilesia nalewoṙo nyi njaa.

³Mokyiriinzi kammbia, “Kokooya iyoe nyi mana o Ruwa, wia igoe-lyi lyiwe mkate.”

⁴Yesu kamgaluo, “Kyikyiṟeie kye mndu echiwona moo kui mkate tikyi-pfo.”

⁵Kamṙosia wuye, kamloṟa ngyuuchilyi tsoose tsa wuyana ko kyiyeri kyifuhi.

⁶Mokyiriinzi kammbia, “Ishi shoose ngyechikuenenga, na wung'anyi wosho kyipfa nyi shako na inyi ngyekyeenenga orio mndu chandu ngakunda.

⁷Kyasia iyoe kongyiindia shoose shechiwa shapfo.”

⁸Yesu kagaluo, kammbia, “Kyikyiṟeie ‘India Mndumii Ruwa opfo, umterewe oe amonyi.’ ”

⁹Kamṙuo mṟasa Yerusalemu, kammbikyia wuye ya uweri lo hekalu, kammbia, “Kokooya iyoe nyi mana o Ruwa kuwiyitse wanda;

¹⁰kyipfa kyikyiṟeie, ‘Nechikuṙikyia malaika wakye wakuringye;’ ”

¹¹na kye, “Mawokonyi gawo wechikuwaṙa ulachekapa ṙende igoenyi.”

¹²Yesu kagaluo, kammbia, kyikyigambe, “Ulayeshe Mndumii Ruwa opfo.”

¹³Kyasia Mokyiriinzi ammarise shiyesho shoose, kamleka ko kyiyeri kyifuhi.

¹⁴Yesu kawuya kui pfinya tsa Mumuyo, kayenda Galyilaya; mbonyi tsakye tsikaṙunganana ngyuurukyenyi tsoose tsa mṟasenyi.

¹⁵Na oe naweiloshia masinagoginyi gawo, echiṟumisho nyi wandu woose.

¹⁶Kayenda Nasareti, halya-ndu aleembeṟio na mfiri o onyonya kaiṙa na sinagoginyi chandu aweichiwie, kagoṟoka kundu nasome.

¹⁷Kaenengyio kyitapu kya moonguo shisuku Yesaya, kakyitaṟahuo, kapfula handu haṟeie,

¹⁸“Mumuyo o Mndumii nai wuye yako, kyipfa nalengyishumbuo iongoya wakyiwa mbonyi ngyicha nalengyiṙuma iongoya wapfungo kya ilekyio lyawo, na shipfupfuṟe iiṙima iwona-se. Na iashuo walya wawailame.

¹⁹Na ionguo kya maka o Mndumii umteseṟe.”

²⁰Kapfunga kyitapu kyilya kakyienengyia mṟundi ulya, kaṙamia; na wandu woose wawei kulya sinagoginyi wakamwitukuya karii.

²¹Kawooka iwawia, “Inu shiṟeio-shi shaafukyia maṙwinyi ganyu.”

²²Wakamṟingyishia woose, wechiṟiyio kyipfa kya shindo sha isaṟia aleṙeṙa, wakagamba, “Ichu chi mana o Yosefu-pfoe?”

²³Kawawia, “Nyi loi mochingyiwia mṙeṙie-chu kye mganga, kukyiṟe kumonyi; mbonyi tsoose luleicho kye tsilewutika Kaperinaumu, uwetsiwute taa iha urukyenyi lopfo kumonyi.”

²⁴Kagamba, “Ny'kyaloi, ngammbia kye, kuwoṙe moonguo shisuku ekyeiṙikyio urukyenyi lokye amonyi-pfo.”

²⁵Kyaindi, kyaloi ngyimmbia, “Kuwewoṙe waka wakusu wafoi urukyenyi lo Isiraelyi kacha kyiyeri kya Elyiya, lyilya ngyina tsileshingo tsilawute mvuo kyiyeri kya maka iṟaṟu na mori iṟandaaṟu, uruka loose lukowaṙa njaa ing'anyi.

²⁶Maa Elyiya aleṙumo ko umwi o wakusu-wo-pfo, indi ko mka umwi mkusu o Serepta urukyenyi lo Sidon.

²⁷Ngoseṟa, kuwewoṙe wandu wafoi wawewoṙo nyi taambo urukyenyi lo Isiraelyi nyi kacha kyiyeri kya moonguo shisuku Elyisha, maa kuwoṙe aleilyish sile nyi Naiman, mndu o Shamu-pfo.”

²⁸Wakaicho nyashi woose wawei kulya sinagoginyi kyiyeri waleicho isho.

²⁹Wakamfuna na nja ya mṟi, wakamṙuo mṟasa wuye ya fumvu handu mṟi owo ummbikye kundu wammbiyitse wanda.

³⁰Kyaindi oe naleiṙa makyiṙi-gawi gawo kayenda.

³¹Kasoka mṟasa Kaperinaumu, mṟi o Galyilaya, kawalosha mfiri o onyonya.

³²Wakaṟiyio mnu kyipfa kya malosho gakye, kyipfa ṙeṙo lyakye lyiwewoṙe pfinya.

³³Na kulya sinagoginyi kuwewoṙe mndu awewoṙo nyi mṟufui mmbicho. Kafiiṟa kui ṟui lying'anyi,

³⁴echigamba, “Leka! Lokukyi, Yesu o Nasareti? Nocha ilurumatsa? Ngyikuichi iyoe nyi wui, Mweele o Ruwa.”

³⁵Yesu kamṙeṙia echigamba, “Tsia, mmbukye.” Naaho-ng'u mṟufui ulya mmbicho kamwolotsa makyiṙi-gawi kammbuka kulawoṙe immbutia kyindo kyiwicho.

³⁶Wakaṟiyio woose, wakawesana, wechigamba, “Kyindo-kyi nyi kya mbaṟe iha, kyipfa naiṙeṙia waṟufui wawicho ko pfinya na wuiṙimi, wakawuka.”

³⁷Mbonyi tsakye tsikaṙunganana koose kulya urukyenyi.

³⁸Kawuka kulya sinagoginyi, kaiṙa na kanyi ko Simion. Na mamka o Simion, nawewoṙo nyi isemu, wakamterewa kyipfa kyakye.

³⁹Kagoṟoka kufuhi na oe, kaṙeṙia isemu lyilya, lyikamleka; cha ilyi kafuma, kawaṟundia.

⁴⁰Na lyilya kuleila, wandu woose wawewoṙe wandu waluoe ndoṟe tsa mbaṟe tsoose walewaende na kokye, kayekyia mawoko wuye ya orio umwi owo kawakyiṟa.

⁴¹Waṟufui wawicho nawo wakawuka ko wandu wafoi; wechikalagatsa na igamba, “Iyoe nyi Mana o Ruwa.” Kawaṙeṙia, alawalekyie iṙeṙa, kyipfa walemmanya kye oe nyi Kristo.

⁴²Na lyilya kulekya nalefuma kayenda handu halawoṙe wandu, wuingyi wo wandu waweimpfula wakashika kokye, wakatambagana imshingyia alawukye kowo.

⁴³Kawawia, “Kyangyikooya ionguo Mbonyi Ngyicha tsa Wumangyi wo Ruwa mṟi ingyi taa, kyipfa nyi kyipfa kya ikyo ngyileṙumo.”

⁴⁴Kyasia, naweionguo Mbonyi Ngyicha masinagoginyi ga Galyilaya.