Read Kivunjo New Testament 1999 Luka 5 Bible Online

Luka 5 - Kivunjo New Testament 1999 bible

Luka 5

¹Kyiyeri awekyeri mbai ya ipalyipalyi lya Kyenesareti wuingyi wo wandu wukokuumbia kufui iaṙanyia Ṙeṙo lya Ruwa na oe alawone maa handu hegalukyia.

²Kawona ngalawa tsiwi tsikyeri mbai ya nduwa, kyaindi weṙeia makunga waweisanja ndusu tsawo.

³Kaiṙa na ngalawenyi imwi, nayo nyi ya Simion, kammbia, naiṙuo kuleshi kyitutu na halya mbai ya nduwa iya. Kaṙamia, kalosha wuingyi wo wandu akyeri ngalawenyi.

⁴Na ammarise iṙeṙa, nalewia Simion, “Ṙuonyi ngalawa mṟasa handu nduwa iyendie wanda kuta hengyi, musotse ndusu tsanyu muwaṙe makunga.”

⁵Simion kagaluo, kagamba, “Mndumii, ang'anyi, luwinie kyio kyoose lulawone kyindo, kyaindi kui ṙeṙo lyapfo ngyesotsia ndusu nduwenyi.”

⁶Kyasia; wammbute kuṙo wakawaṙa makunga gafoi mnu, ndusu tsawo tsikawooka iṙumbuka.

⁷Wakatsinia walya waweiṟunda nawo wawekyeri kulya ngalawenyi ya kawi, wachewatarama. Wakacha, wakaichuṟa ngalawa tsilya tsitsiwi, mṟasa tsikakyiṟesoṟowia.

⁸Simion Petiro ammbone kuṙo, naleoloka maṙendenyi ga Yesu, echigamba, “Wuka koko, kyipfa inyi nyi mndu mnyamaṟi, Mndumii.”

⁹Kyipfa naleṟiyio, oe na walya wawei na oe woose, kyipfa kya chandu walewaṙa makunga gafoi.

¹⁰Na wuṙo taa kyilewa ko wana wa Sebedayo, wawekyeṟunda hamwi na Simion. Yesu kawia Simion, “Ulaowuoe. Wookyia wulalu nowamoṙega wandu.”

¹¹Na wammbikyie ngalawa tsawo mbai ya ipalyipalyi, wakaṙa shoose wakamwosha.

¹²Na kyiyeri awei mṟinyi umwi kyiiṙi kya mṟi iya hawewoṙe mndu awoṙo nyi taambo. Na oe lyilya alewona Yesu naleoloka na ndewu, kamterewa echigamba, “Mndumii, kokunda, nochiiṙima ingyiilyisha.”

¹³Na oe kagoṟuo kuwoko kokye, kampaaya echigamba, “Ngyikundi, ila.” Cha ilyi taambo lyakye lyikammbuka.

¹⁴Kamwima alawie mndu, indi kammbia, “Yenda undekuloṟa ko mkohanyi; undewuta ko iilyiro lyapfo chandu Mose agambie, kyiwe wuṟingyishi kowo.”

¹⁵Kyaindi mbonyi tsakye tsikaengyeṟa iṙunganana, wuingyi wufoi wo wandu wakasanzia handu hamwi, wamwaṙanyie na ikyiṟo ndoṟe tsawo.

¹⁶Kyaindi oe nalelekana nawo, kayenda handu halawoṙe wandu, kandeterewa.

¹⁷Na kyiyeri kyilya naweilosha, na Mafarisayo na walosha wa uwawaso waweṙamie ho, wawewukyie orio kyikaṟo kya Galyilaya, na Uyuda, na Yerusalemu. Na pfinya tsa Mndumii tsiwekyeri ho kundu naiṙime ikyiṟa.

¹⁸Wakacha wandu waṙuṙe mndu kyitaṟenyi awoṙe ndoṟe ya ipfa ngapfu ura lumwi wakundi imṙuo numba wammbikyie mbele yakye.

¹⁹Na lyilya waleuṟa ṙaawa lyemṙuo numba kyipfa kya wuingyi wulya wo wandu, waleṙooya kai, wakatocha kai iya, wakamsotsa oe na kyitaṟa kyakye makyiṙi-gawi mbele ya Yesu.

²⁰Na oe lyilya alewona iiṙikyia lyawo, nalewia ulya aluoe, “Mbuya-ko, omhooṟio maṙeko gapfo.”

²¹Kyasia walosha walya wa mawawaso na Mafarisayo wakawooka iwesana, wechigamba, “Nyi wui ichu ailahia Ruwa? Nyi wui echiiṙima ihooṟia ngyuunyamaṟi sile nyi Ruwa amonyi?”

²²Na Yesu aichi makusaṟo gawo, kagamba, “Ny'kyilyi mukusaṟa shiwicho mrimenyi konyu?

²³Kyipfa nyi kyiha kyii kyaangu, nyi igamba ‘Omhooṟio ngyuunyamaṟi tsapfo,’ ang'u nyi igamba, ‘Amka uyende?’

²⁴Kyaindi muiṙime imanya kye Mono-Adamu nawoṙe wuchilyi wuyanenyi wo hooṟia ngyuunyamaṟi, (nalewia ulya awoṙe ndoṟe ya ipfa ngapfu ura lumwi) ‘Ngakuwia, amka ukuṙikye kyitaṟa kyapfo uyende kanyi kopfo.’ ”

²⁵Cha ilyi kagoṟoka mbele yawo, kakuṙika kyilya awelee wuye yakyo, kayenda kanyi kokye, echiana Mndumii.

²⁶Wakaṟiyio woose, wakang'anyisa Ruwa; wakawoṙo nyi wuowu, wechigamba, “Inu lowona mbonyi tsa maṟiyisho.”

²⁷Numa ya isho kawuka pfo kawona mosania ukamba, ekyelago Lewi, aṙamie handu hesania ukamba, kammbia, “Ngyiosha.”

²⁸Kaṙa shoose, kaamka kamwosha.

²⁹Na Lewi kamwachikyia shelya shifoi kanyi kokye. Napfo kuwewoṙe wuingyi wufoi wo wesania ukamba na wandu wengyi waweilya hamwi nawo.

³⁰Mafarisayo na walosha wawo wa mawawaso wakanunuwia wanalosho wakye, wechigamba, “Ny'kyilyi muilya na inyo hamwi na wesania ukamba na wanyamaṟi?”

³¹Yesu kagaluo, kawawia, “Walya walaluoe wekyepfula mganga-pfo, sile walya waluoe.

³²Ngyilecha ilaga walya wasumganyi-pfo indi wanyamaṟi waiṙime iṙumbuya.”

³³Nawo wakammbia, “Wanalosho wa Yohane wekyekuretekyia kafong'ui na iterewa. Na wuṙo taa wanalosho wa Mafarisayo; kyaindi wanalosho wapfo wekyelya na inyo!”

³⁴Kyaindi Yesu kawawia, “Mochiiṙima kuṙa iwia wandu walage wolyinyi wakuretekyie wakyeri na monyi wolyi?

³⁵Kyaindi kochicha mfiri monyi wolyi echiwuto kowo; nyi lyo-ndu wechikuretekyia.”

³⁶Kawawia mfano, “Kuwoṙe mndu ekyewika kyiṙami kya nguwo ngihya nguwonyi ngyiku-pfo. Na kokooya awika naṙumbuo iya ngyihya, na kyiṙami kya nguwo iya ngyihya kyechiwa cha kyilya kyiku-pfo.

³⁷Maa kuwoṙe mndu ekyewika mpfinyo mhya maselelenyi maku-pfo. Na kokooya awika pfo, mpfinyo ulya mhya opaṟa maselela galya, mpfinyo-cho ukopusuka, na maselela gakanyamaṟika.

³⁸Kyaindi kyiwaṟi iwika mpfinyo mhya maselelenyi mahya.

³⁹Maa kuwoṙe mndu ekyenyo mpfinyo o kacha kalanga mhya-pfo; kyipfa negamba ulya o kacha nyicho ui mcha.”