Read Kivunjo New Testament 1999 Luka 6 Bible Online

Luka 6 - Kivunjo New Testament 1999 bible

Luka 6

¹Kyasia mfiri o onyonya Yesu naweiiṙa maṙemenyi na wanalosho wakye wakawooka itumuo magaa ga nganu na igasusa-susa mawokonyi gawo wakalya.

²Naaho-ng'u Mafarisayo waata wakawawia, “Ny'kyilyi muiṟunda kyilai kya sungusinyi mfiri o onyonya?”

³Yesu kawagaluo, kawawia, “Mulekulosha ikyo Dawidi alewuta, lyilya alewoṙo nyi njaa, oe na oṙoe?

⁴Chandu aleiṙa na numbenyi ya Ruwa, kalya mkate iya ngyiele, kaenenga na oṙoe kyilawaṟi iilya sile nyi makohanyi wawenyi.”

⁵Kawawia, “Mono-Adamu nyi oe Mndumii o mfiri o onyonya.”

⁶Kyasia mfiri ungyi o onyonya naleiṙa na sinagoginyi kalosha, napfo kuwewoṙe mndu awewoṙe kuwoko ko kulyoe kupfiie ngapfu.

⁷Na walosha wa mawawaso hamwi na Mafarisayo waweimṙega kundu wawone kokooya nekyiṟa mndu mfiri a onyonya; kundu waiṙime iwona kyindo kyemmbusia uwingo.

⁸Kyaindi oe kamanya makusaṟo gawo, kawia ulya awoṙe kuwoko kupfiie ngapfu, “Nnjo goṟoka iha makyiṙi-gawi.” Kagoṟoka.

⁹Naaho-ng'u Yesu kawawesa, “Nyi sungusinyi iṟunda mecha mfiri o onyonya, ang'u iṟunda mawicho? Ikyiṟa mrima ang'u iurumatsa?”

¹⁰Kawaitukuya woose echiambuya ngyuura tsoose, kawia mndu ulya, “Goṟuo kuwoko kopfo.” Kagoṟuo kuwoko, kukochia na iwaṙa pfinya cha kuwooka.

¹¹Wakasuo mnu, wakawesana wo wenyi ko wenyi wawutie kyi Yesu.

¹²Kyasia mfiri iya naleyenda fumvunyi kundu nandeterewa, kalaa kyiṙombo kyio kyoose echiterewa Ruwa.

¹³Na kyiyeri kya kyingoto kalaga wanalosho wakye; kasambuṟa ikumi na wawi kyiiṙi kyawo, kawalaga wasu.

¹⁴Simion, ulya alemlaga rina lya kawi Petiro, Anderea, mono-wamae, Yakobo na Yohane, Filyipo na Baritolomayo.

¹⁵Na Matayo, Tomasi, Yakobo o Alyifayo, na Simion ekyelago Selote.

¹⁶Na Yuda o Yakobo, na Yuda Isikariote, na oe nyi oe alemṟiinga.

¹⁷Kasoka hamwi nawo, kagoṟoka handu ha rendewele, hamwi na wanalosho wakye wafoi. Na wuingyi wo wandu walewuka Uyuda koose na Yerusalemu, na mbai ya Tiro na Sidon; walecha imwaṙanyia na ikyiṟo ndoṟe tsawo.

¹⁸Na walya waweituuro nyi waṟufui wawicho walekyiṟo.

¹⁹Na wuingyi wulya woose wuwekundi impaaya kyipfa pfinya tsekyiṟa tsiwewuka kokye na ikyiṟa woose.

²⁰Kapaluo meso kaambuya wanalosho wakye, kagamba, “Wagusu nyoe mui wakyiwa wa mrima, kyipfa Wumangyi wo Ruwewu nyi wonyu.

²¹Wagusu nyoe muwoṙo nyi njaa wulalu, kyipfa mochiiguṙa. Wagusu nyoe muifiiṟa wulalu, kyipfa mochiseka.”

²²“Wagusu nyoe ilyi wandu wemsuo, na imshingyia nja, na imlahia, na inyamaṟa rina lyanyu, kyipfa kya Mono-Adamu.

²³Chihiyonyi mfiri-cho na ishoonga-shonga, kyipfa wori wonyu wung'anyi Ruwewu, kyipfa nyi wuṙo waawu wawo walewutia weonguo shisuku.

²⁴Kyaindi, ochia lonyu muwoṙe masaa, kyipfa wori wonyu mulemuambilyia.

²⁵Ochia lonyu nyoe muigutsu wulalu kyipfa mochiicho njaa. Ochia lonyu nyoe muiseka wulalu, kyipfa mochikapa ṟanyi na ifiiṟa.

²⁶Ochia lonyu nyoe ilyi wandu woose wechimuenenga kyiṟumi, kyipfa nyi wuṙo waku wawo walewutia weonguo shisuku wa wongo.”

²⁷“Kyaindi ngyimmbia nyoe muingyiaṙanyia, kundenyi washituwa wanyu, wutienyi mecha walya wamsuuye nyoe.

²⁸Wikyienyi mboṟa walya waimpfulutsa nyashi, terewienyi walya waimuilama nyoe.

²⁹Mndu kakukapa ura lumwi, mgalutsie ura lo kawi, na mndu akusoka ijoho lyapfo, ulamwime maa iwale.

³⁰Enenga orio mndu akuterewa, na mndu akusoka shindo shapfo maa ulalangye nakuwiyiṟie.

³¹Na kyilya mukundi wandu wammbutie nyoe, na wuṙo mochiwawutia.

³²Kyipfa mukokunda walya wamukundi nyoe, moloṟa kyi? Kyipfa maa wanyamaṟi na wuṙo wekyekunda walya wawakundi.

³³Na nyoe mukowutia shicha walya wekyemmbutia shicha moloṟa kyi? Maa wanyamaṟi na wuṙo wekyewuta.

³⁴Mukoakuya mndu kyindo na kunu mukundi iwona kyindo kowo moloṟa kyi? Maa wanyamaṟi wekyeakuya wanyamaṟi kundu wawiyiṟio wuṙo.

³⁵Indi kundenyi washituwa wanyu. Wutenyi shicha, na mukoakuya mulakunde itoo kyindo, na wori wonyu woching'ana. Na nyoe mochiwa wana wa ai wuye, kyipfa oe namcha ko walya walekyemwana, na wawicho.

³⁶Kyasia, wenyi wandu wekyehooṟia chandu Awu-yonyu ai mohooṟia.”

³⁷“Maa mulaanduye, na nyoe mochianduyo-pfo. Mulagambe kye wandu wengyi wawawicho kundu mulagambo kye muwawicho. Lekyienyi na nyoe mochilekyio.

³⁸Enengyenyi wandu shindo, na nyoe mochienengo. Kyiyeṟo kyiichuo na itsindo, na ipaayo-payo mṟasa ipusuka, nyikyo wandu wechimuenenga nyoe. Kyipfa kyiyeṟo kyilya kyilya mochiyeṟa ny'kyo mochiyeṟio.”

³⁹Kawawia mṙeṙie, “Ngyesa kyipfupfuṟe kyechiiṙima isongoya kyipfupfuṟe? Shechioloka mkuwenyi shoose shishiwi-pfoe?

⁴⁰Manalosho ekyeng'ania mlosha okye-pfo, kyaindi orio mndu aafutsia nechiwa cha mlosha okye.

⁴¹Kyasia, ny'kyilyi uiambuya kyiunana kyikyeri risonyi lya mono-womoo, na mriti-cho ukyeri ipfo risonyi lyapfo ulauambuye?

⁴²Ang'u nowia kuṙa mono-womoo, ngyileka ngyiwute kyiunana ipfo risonyi kopfo ulaiambuya mriti ukyeri ipfo risonyi lyapfo kumonyi? Iyoe mkulembecheṟi, wuta kuwooka mriti-cho ipfo risonyi lyapfo, naaho-ng'u ochiwona necha iwuta kyiunana kyilya kyikyeri risonyi lya mono-womoo.”

⁴³“Kyipfa kuwoṙe ikyiṙi lyicha lyekyekumbia ndunda ngyiwicho-pfo; maa ikyiṙi lyiwicho lyekyekumbia ndunda ngyicha-pfo.

⁴⁴Kyipfa orio ikyiṙi lyekyemanyika kui ndunda tsalyo; kyipfa wandu wekyehaa sabibu mshenyi ang'u ndunda ngyicha tseloṙa nduonyi-pfo.

⁴⁵Mndu mcha kyiseyesoenyi kyicha nekyewuta shicha. Na mndu mmbicho kyiseyesoenyi kyiwicho nekyewuta shiwicho. Kyipfa ṙumbu lya mndu lyekyeṙeṙa shilya shiichuṟie mrima okye.”

⁴⁶“Ny'kyilyi mungyilaga, Mndumii, Mndumii, kyaindi mulawute shilya ngyigamba?

⁴⁷Orio mndu echa na koko na iaṙanyia maṙeṙo gako na igaosha, ngyemuloṟa mfano okye.

⁴⁸Mfano okye nyi cha mndu alewika numba, kasuma wanda na iwika urende wuye ya iṟaṟa; na kyiyeri kulecha mra ung'anyi, mfu ukokapa numba iya ko pfinya, ulaiṙime iiolotsa, kyipfa ingyiwikye necha.

⁴⁹Kyaindi ulya aleicho alawute kuṙo, mfano okye nyi cha mndu alewika numba handu halawoṙe iṟaṟa, mfu ukosoka ko pfinya, ikaoloka cha ilyi; na inyamaṟo lyayo lyikawa lying'anyi.”