Read Kivunjo New Testament 1999 Luka 7 Bible Online

Luka 7 - Kivunjo New Testament 1999 bible

Luka 7

¹Na kyiyeri alemarisa iwawia maṙeṙo gakye goose naleiṙa na Kaperinaumu.

²Na mṟundi o mchilyi umwi naweluoe mnu, kufuhi na ipfa; na oe nawemkundi mnu.

³Kyiyeri aleicho mbonyi tsa Yesu, naleṙuma wameeku wa Kyiyuda kokye imterewa nache nakyiṟe mṟundi okye.

⁴Nawo kyiyeri waleshika ko Yesu, walemterewa mnu, wechigamba, “Ichu nawaṟi ummbutie kyindo-kyi,

⁵kyipfa nakundi mnu wandu waṙu na oe naleluwikyia sinagogi.”

⁶Kyasia Yesu kayenda hamwi nawo. Na lyilya awei kufuhi na numba ya mchilyi ulya, mchilyi ulya naleṙuma mbuya yakye ko Yesu, kammbia, “Mndumii, maa ulakuwinishe, kyipfa inyi ngyiwaṟi iyoe uiṙe na numba koko-pfo.

⁷Koikyo ngyilewona kyingyiwaṟi icha ngyimonyi na kopfo-pfo; kyaindi gamba ṙeṙo lyimwi tikyi, na mṟundi oko nechichia.

⁸Cha kyipfa inyi nyi mndu ngyiwoṙe wuchilyi. Ngyiwoṙe asikari wanda yako; ngawia ichu ‘yenda’; na ichu ‘nnjo’ nekyecha; na kyisinga kyako, ‘wuta kuṙi’, kyekyewuta.”

⁹Kyiyeri Yesu aleicho isho, naleṟiyio, kaindukyia wuingyi wulya wo wandu, kawia walya wawemwosha, “Ngammbia ngyilandewone iiṙikyia lying'anyi kuṙi, kunu Isiraelyi-pfo.”

¹⁰Na walya waleṙumo kyiyeri walewuya na kanyi, wakakooya mṟundi ulya amchia.

¹¹Numa ya iho naleyenda mṟasa mṟi umwi okyelago Nain, na wanalosho wakye hamwi na wuingyi wung'anyi wo wandu wukooshana na oe.

¹²Na kyiyeri aletikyira kufuhi na moongo o mṟi, hawewoṙe mndu apfiie aweiṙoo nja, nyi kyimuumwi kya mndu mka umwi mkusu, na wandu wafoi wa mṟi ulya wawei hamwi na oe.

¹³Kyiyeri Mndumii alemmbona nalewoṙo nyi fowa mrimenyi kammbia, “Maa ulafiiṟe.”

¹⁴Katikyira, kapaaya jeneza lyilya; walya wawelyiṙuṙe wakatirima. Kagamba, “Manakye, ngakuwia, amka.”

¹⁵Ulya awepfiie kaamka, kaṙamia, kawooka iṙeṙa. Kamwenengyia wamae.

¹⁶Wuowu wukowawaṙa woose, wakaṟumisha Ruwa, wechigamba, “Moonguo shisuku ang'anyi nacha na koṙu, na Ruwa naambuya wandu wakye.”

¹⁷Mbonyi-tsi tsakye tsikaṙunganana Uyuda koose, na ngyuuruka tsoose tsa mṟasenyi.

¹⁸Wanalosho wa Yohane wakamwendie mbonyi tsa isho shoose.

¹⁹Naaho Yohane kalaga wawi kyiiṙi kya wanalosho wakye, kawaṙuma ko Yesu, echiwesa, “Iyoe nyi ulya aicha, ang'u luweṙelyie ungyi?”

²⁰Nawo kyiyeri waleshika kokye, walegamba, “Yohane Mpatisi naluṙuma kopfo, echigamba, ‘Iyoe nyi ulya aicha, ang'u luweṙelyie ungyi?’ ”

²¹Na kyiyeri kyilya kyilya nalekyiṟa wandu wafoi ndoṟe tsawo, na wawaolokyie nyi ngyuukyiwa, na waṟufui wawicho, na shipfupfuṟe shifoi shikaiṙima iwona.

²²Naaho-ng'u kagaluo, kawawia, “Yendenyi mundeongoya Yohane shilya mushiicho na ishiwona. Shipfupfuṟe shienengo iwona, shileeta shichumia, wawoṙo nyi taambo waiilyiṟo, wapfu maṙwi waiicho, wapfu waiṟutso, na wakyiwa waiongoyo Mbonyi Ngyicha.

²³Agusu orio mndu alammbihie kyipfa kyako.”

²⁴Kyasia wanalosho wa Yohane wamuyende, Yesu nalewooka iongoya wuingyi wo wandu mbonyi tsa Yohane, “Mulefuma iyenda nuka iambuya-pfo kyi? Unyatsi lochiṙeṙemsho nyi mkuma?

²⁵Kyaindi mulefuma indewona kyi? Mndu amṟikye nguwo tsa wusuṟi? Manyenyi kye wandu waṟee nguwo tsa wusuṟi wakyeri numbenyi tsa kyimangyi.

²⁶Kyaindi mulefuma indewona kyikyi? Nyi iwona moonguo shisuku? Yee loi ngammbia, na akyeri ang'anyi kuta moonguo shisuku.

²⁷Ichu nyi oe shiṟeio shilegamba, ‘Ngyiṙuma mndu oko mbele ya ushangu lopfo, echisungusia njia yapfo mbele yapfo.’ ”

²⁸“Inyi ngammbia, kyiiṙi kya walya wawafee nyi waka kuwoṙe ang'anyi kuta Yohane Mpatisi-pfo. Kyaindi akyeri mtutu Wumangyinyi wo Ruwewu nang'anyi kuta oe.”

²⁹Wandu woose na wesania ukamba kyiyeri waleicho isho, waleṟingyishia loi ya Ruwa kyipfa walepatiso wupatiso wo Yohane.

³⁰Kyaindi Mafarisayo na walosha wa mawawaso, walelega iwuta kyilya Ruwa awekundi wawute, kyipfa wawewapatise nyi Yohane-pfo.

³¹Mndumii kagamba, “Ngyilyingatsane na kyikyi wandu wa rika-lyi? Nyi kyikyi kyikyeri chawo?

³²Wakyeri cha wana waṙamie sangaṙa na ilagana, wechigamba, ‘Lulekapa mtoṟiṟo maa muleshina-pfo. Lulekapa ṟanyi, maa mulefiiṟa-pfo.’

³³Kyipfa Yohane Mpatisi nalecha alailya mkate maa alainyo mpfinyo, na nyoe mukogamba, nawoṙo nyi waṟufui wawicho.

³⁴Mana o Adamu nalecha echilya na inyo; na nyoe mukogamba, ichu nawoṙe ndewu, na nekyenyo mpfinyo, mbuya ya wesania ukamba na wanyamaṟi.

³⁵Na wuṟango wo Ruwa womanyika kye wuwoṙe wuloi ko wana wakye woose.”

³⁶Mndu umwi kyiiṙi kya Mafarisayo nalemlaga nalye kyelya kanyi kokye. Kaiṙa na numba ko Mfarisayo ulya, kaṙamia ilya kyelya.

³⁷Na mndu mka umwi o mṟi ulya, awei mnyamaṟi, kyiyeri aleicho kye naṙamie numba ko Mfarisayo ulya, naleende kyimkyepe kyiwewoṙe mafuṙa gekyepfaama necha.

³⁸Kagoṟoka numa kufuhi na maṙende gakye, echifiiṟa, kawooka itonyitsia Yesu mcheṟeṟe maṙendenyi gakye, na imwanguo kui njui tsakye echimkomba-komba maṙende na imshia mafuṙa galya.

³⁹Kyasia, Mfarisayo ulya alemlaga ammbone kuṙo, nalegamba mrimenyi kokye, mndu-chu kokooya awei moonguo shisuku, naweimanya mndu mka-chu aimpaaya nyi wui, na oe nyi o mbaṟe iha, kye nyi mnyamaṟi.

⁴⁰Yesu kagaluo, kammbia, “Simion, ngiwoṙe kyindo ngikundi ikuwia.” Kagamba, “Mlosha, gamba.”

⁴¹Kagamba, “Mndu umwi ekyeakuya nawewoṙe wasile wawi, umwi naweriko dinari magana gataanu, na o kawi makumi gataanu.

⁴²Nawo kyiyeri walawewoṙe kyemtaa nalewahooṟia woose wewawi. Kyiiṙi kya iwo wawi nyi wui emkunda ngoseṟa?”

⁴³Simion kagaluo kagamba, “Ngakusaṟa nyi ulya alemhooṟia tsifoi.” Kammbia, “Nogaluo necha.”

⁴⁴Kagalukyia mndu mka ulya kawia Simion, “Uwonyi mndu mka-chu? Ngyileiṙa na kanyi kopfo, ulengyienenga mṟinga o sanja maṙende gako-pfo; indi ichu naitonyitsia mcheṟeṟe maṙende gako na ianguo maṙende gako kui njui tsakye.

⁴⁵Iyoe ongyikomba-pfo; kyaindi ichu wookyia ngashika iha aṙa ingyikomba maṙende gako-pfo.

⁴⁶Oshia mṙoe oko mafuṙa-pfo; indi ichu nashia maṙende gako mafuṙa gekyepfaama necha.

⁴⁷Kyipfa kya ikyo ngakuwia, nahooṟio ngyuunyamaṟi tsakye tsifoi, kyipfa nakunda mnu, kyaindi ulya ahooṟio kyitutu, icho nekyekunda kyitutu.”

⁴⁸Naaho kawia mndu mka ulya, “Nohooṟio ngyuunyamaṟi tsapfo.”

⁴⁹Nyi lyo-ng'u walya waweilya hamwi na oe walewooka ikusaṟa mrimenyi kowo, “Nyi wui ichu tane ahooṟia ngyuunyamaṟi?”

⁵⁰Kawia mndu mka ulya, “Iiṙikyia lyapfo lyakukyiṟa. Yenda na ufoṟo.”