Read Kivunjo New Testament 1999 Luka 8 Bible Online

Luka 8 - Kivunjo New Testament 1999 bible

Luka 8

¹Kyikawa-ng'u numa ya iho naweitenga-tenga mṟinyi na shikaṟonyi echionguo mbonyi tsa Wumangyi wo Ruwa, na walya ikumi na wawi wawei hamwi na oe.

²Na waka waata wawewoṙo nyi waṟufui wawicho na ndoṟe wakakyiṟo; nawo nyi Maria ekyelago Makyidalena, alewuto waṟufui wawicho mfungaaṙe,

³na Yoana, mka o Kusa, mṟundi mṟango o Herode, na Susana, na wengyi wafoi, wawemṟundia kui masaa gawo.

⁴Kyiyeri wuingyi wung'anyi wo wandu wulekuumbia na wandu walya walewuka orio mṟi wechicha na kokye, nalewawia kui mfano,

⁵“Moolyia mbeu nalefuma indewaaya mbeu tsakye. Na oe kyiyeri aweiwaaya, tsingyi tsileoloka kufuhi na njia, tsikachumo-chumo, na shileye sha ngyinenyi shikatsilya.

⁶Tsingyi tsikaoloka handu hawoṙe iṟaṟa; kyiyeri tsilewooka iṙo tsikauma ko iuṟa teri ngyicha.

⁷Tsingyi tsikaoloka handu hawoṙe msha, na msha iya ikaṙo hamwi natso ikatsiilama.

⁸Tsingyi tsikaoloka handu hawoṙe teri ngyicha; tsikaṙo, tsikakumbia orio imwi igana.” Kyiyeri aweiṙeṙa isho naleṙeṙa na ṟui lying'anyi echigamba, “Awoṙe maṙwi geaṙanyia naaṙanyie.”

⁹Wanalosho wakye wakammbesa kyimaṙuma kya mfano-cho.

¹⁰Kagamba, “Nyoe muwaenengye imanya shiṟika sha Wumangyi wo Ruwa; indi wengyi nyi kui mfano, kundu wakaambuya walawone, na wakaicho walamanye.

¹¹Na mfano-cho kyitambuluo kyacho nyi ikyi, mbeu nyi Ṙeṙo lya Ruwa.

¹²Walya wa kufuhi na njia nyi walya wekyeicho, numa Satana nekyecha karakuo Ṙeṙo lyilya lya Ruwa mrimenyi kowo, walacheiṙikyia na ikyia.

¹³Na walya wa iṟaṟenyi nyi walya wekyeicho na iambilyia Ṙeṙo-lyo lya Ruwa kui sia; nawo wawoṙe mri-pfo. Wekyeiṙikyia kyiyeri kyifuhi, na kyiyeri kya iyesho wekyewuya na numa.

¹⁴Na tsileoloka mshenyi, nyi walya waleicho na kyiiṙi kya iyenda wakailamo nyi wulembi wo masaa, na ichihiyo lya wuyana, walakumbie ndunda ngyicha.

¹⁵Na tsilya tsa terinyi ngyicha nyi walya wekyeicho na iambilyia Ṙeṙo lyilya lya Ruwa mrimenyi kowo na kui iindia wekyelyiaṙanyia na ilyiwaṙa, numa wekyekumbia ndunda wechikarishia.”

¹⁶“Kuwoṙe mndu ekyekoṟa taa na iishikyia na kyindo numa kaiwikyia handu hakuṟiikyie-pfo, indi nekyeiwikyia handu hakuirie, kundu ilyimikyie woose wechiiṙa na ipfo numba.

¹⁷Cha kyipfa kuwoṙe kyindo kyikyishikyie maa kyikuṟiikyie kyilechimanyika-pfo.

¹⁸Ambuyenyi-ng'u chandu muiaṙanyia, kyipfa awoṙe kyindo nechienengo, na ulya alawoṙe kyindo nechisoko maa kyilya kyitutu awoṙe.”

¹⁹Wamae na wana wa wamae wakayenda kokye, walaiṙime ishika kufuhi na oe kyipfa kya wuingyi wo wandu.

²⁰Kaendio mbonyi, echiwio, “Womoo na wana wa womoo wagoṟokyi nja wakundi ikuwona.”

²¹Kagaluo, kawawia, “Wama oko na wana wa wama wako nyi iwo waiaṙanyia Ṙeṙo lya Ruwa na iosha kyilya lyikundi.”

²²Kyikawa-ng'u kyiyeri kyimwi kyiiṙi kya mfiri iya naleṙooya ngalawenyi hamwi na wanalosho wakye, kawawia, “Luambaṙe mṟasa molyolya o nduwa.” Wakayenda.

²³Nawo kyiyeri waweiyenda, oe nalelaa maṙoe. Kukocha kyiwiṟi kulya nduwenyi, kyikashikyia ngalawa iya, ikawooka iichuo mṟinga, wakawa ndengyenyi.

²⁴Wakayenda kokye wakamwamtsa, wechigamba, “Mndumii, ung'anyi, Mndumii ung'anyi, luisia.” Kaamka, kaṙeṙia kyiwiṟi na mṟinga ulya o nduwa shikatsia sau, kukowaṙa itsia lying'anyi.

²⁵Kawawia, “Lyookwi iiṙikyia lyanyu?” Wakaowuo, wakatandiṟi, wechigamba wo wenyi ko wenyi, “Ichu nyi wui aṙeṙia shiwiṟi na mṟinga, nasho shikamwaṙanyia?”

²⁶Wakashika mbai ya ipalyipalyi lya uruka lo Wakyerasi, iambuyana na Galyilaya.

²⁷Na oe kyiyeri alesoka ngalawenyi, nalekarisana na mndu awewoṙo nyi waṟufui wawicho; alawendeṟae nguwo mfiri ifoi, maa awekyekaa kanyi-pfo, indi kundu awekyelaa nyi kundu kuwekuṟikye wandu wapfiie.

²⁸Na kyiyeri alewona Yesu nalekalagatsa na ioloka wanda mbele yakye na iṙeṙa na ṟui lying'anyi, echigamba, “Ngyiwoṙe kyikyi na iyoe, Yesu, Mana o Ruwa ai wuye? Ngyikuterewa ulangyituure.”

²⁹Kyipfa nalekoaṙeṙia mṟufui ulya mmbicho nawukye mndu ulya. Kyipfa nawekyemmbaṙa kyiyeri kyifoi, mṟasa kawamoringo kyipfungonyi, echipfungo na mshe na ngowa; kaṙumbuo shipfungo shilya, kaṟichiṟo nyi mṟufui ulya mmbicho mṟasa nukyenyi ngyiumu suwaa ilawoṙe maa mṟinga.

³⁰Yesu kammbesa, “Rina lyapfo nyi wui?” Kagamba, “Rina lyako nyi ulyimalyi.” Kyipfa waṟufui wawicho wafoi wawemmboṙe.

³¹Wakamterewa kawawuta alawafune wayende ṟungunyi.

³²Kyasia, iho hawewoṙe poo lya nguwe tsifoi tsiweilyiso fumvunyi, wakamterewa nawaenengye momu waiṙe na kulya nguwenyi. Kawaiṙikyia.

³³Waṟufui walya wawicho wakawuka mndu ulya wakaiṙa na kulya nguwenyi, na poo lyilya lyikaiṟimika iwinyi, tsikasokyia nduwenyi, tsikapfiia mṟingyenyi.

³⁴Kyiyeri walyisi walewona kyindo kyilewutika, waleṙicha, wakaonguo mbonyi-tso mṟinyi na handu hengyi hoose.

³⁵Wandu wakafuma indewona ikyo kyilewutika, wakayenda ko Yesu, wakawona mndu ulya alewuto waṟufui wawicho aṙamie maṙendenyi ga Yesu, aṟee nguwo na makusaṟo gakye gai mecha, wakaowuo.

³⁶Walya walekowammbona waleonguo chandu ulya awewoṙo nyi waṟufui wawicho alekyiṟo.

³⁷Na wandu wa uruka lo Wakyerasi lui mbai ya halya walemterewa nawukye kowo, kyipfa walewoṙo nyi wuowu wung'anyi. Kyasia na oe kaṙooya ngalawenyi, kawuya.

³⁸Na mndu ulya alewuto waṟufui wawicho nalemterewa naoshane na oe; kyaindi oe nalesamana na oe echigamba,

³⁹“Wuya na kanyi kopfo; undeonguo maṟiyisho Ruwa alekuwutia.” Kayenda echionguo kulya mṟinyi koose, maṟiyisho gang'anyi Yesu alemmbutia.

⁴⁰Kyasia kyiyeri Yesu alewuya wuingyi wo wandu wulemwambilyia kui sia, kyipfa waweimmbeṙelyia woose.

⁴¹Na mndu umwi ekyelago Yairo kacha, na oe nawei ang'anyi o sinagogi. Kaoloka maṙendenyi ga Yesu, kamterewa naiṙe na kanyi kokye;

⁴²kyipfa mana okye o kyika nawei kufuhi na ipfa, na nyi mana kyimuumwi kokye, awewoṙe cha maka ikumi na iwi. Na kyiyeri aweiyenda wuingyi wo wandu wulemwiṟiwia.

⁴³Na mndu mka umwi, awekyechoṟa kyiyeri kya maka ikumi na iwi, [alekoammbuta masaa gakye goose echienenga waanga] alaiṙime ikyiṟo nyi mndu oose,

⁴⁴nalekaa kyanuma ko Yesu kapaaya ikyechu lya iwale lyakye; na cha ilyi ichoṟa lyakye lyikaṙumbuka.

⁴⁵Yesu kagamba, “Nyi wui angyipaaya?” Kyasia kyiyeri wandu woose wamlege, Petiro nalemmbia, “Mndumii ang'anyi, wuingyi-wu wo wandu wukuiṟiwie na ikupeṟeetsa.”

⁴⁶Yesu kagamba, “Kuwoṙe mndu angyipaaya, kyipfa ngyikuichuoe pfinya tsangyiwuka.”

⁴⁷Mka ulya ammbone kye echiiṙima ikuṟiika-pfo, kacha eṙeṙema, kaoloka mbele yakye, kamwongoya mbele ya wandu woose, kyimaṙuma kya impaaya, na chandu alewekyiṟo cha ilyi.

⁴⁸Kammbia, “Mana, iiṙikyia lyapfo lyakukyiṟa. Yenda na ufoṟo.”

⁴⁹Kyiyeri aweiṙeṙa isho, kukocha mndu awuka kanyi ko ulya ang'anyi o sinagogi, kammbia, “Mana opfo ampfa; maa ulawinishe mlosha.”

⁵⁰Kyaindi lyilya Yesu aleicho isho, nalemgaluo, “Maa ulaowuoe. Iṙikyia tupu, na oe nechichia.”

⁵¹Kyiyeri aleshika kanyi ko ulya ang'anyi o sinagogi alelekyia mndu iiṙa na kulya numba sile nyi Petiro, Yohane, Yakobo, na awu o mana ulya na wamae-pfo.

⁵²Na wandu woose wawefiiṟa na ikapa ṟanyi. Kawawia, “Maa mulafiiṟe, ichu apfa-pfo, indi nalaa maṙoe tupu.”

⁵³Wakamseka mnu, kyipfa walemanya kye awempfa.

⁵⁴Kammbaṙa kuwoko, kaṙeṙa na ṟui lying'anyi, echigamba, “Mana, goṟoka.”

⁵⁵Moo okye ukommbiyilyia na oe cha ilyi kagoṟoka. Kagamba naenengo kyelya.

⁵⁶Wafee wakye wakaṟiyio mnu, kyaindi kawaima walawie mndu kyindo kyilewutika.