Read Kivunjo New Testament 1999 Luka 9 Bible Online

Luka 9 - Kivunjo New Testament 1999 bible

Luka 9

¹Yesu kalaga walya ikumi na wawi kawaenenga wuiṙimi na pfinya yechilyia waṟufui woose wawicho na ikyiṟa ndoṟe.

²Kawaṙuma waonguo Wumangyi wo Ruwa, na ikyiṟa waluoe.

³Kawawia, “Mulaṙuo kyindo ilyi moyenda kyaro, upoi maa kyikuchu, maa mkate, maa heleri; maa umwi onyu alaṙuo kanzu tsiwi.

⁴Na orio numba mochiiṙa napfo kaenyi pfo mṟasa kyiyeri mochiwuka pfo iyenda mṟi ungyi.

⁵Na walya walechimuambilyia, ilyi mochiwuka ipfo mṟinyi, kute-kutenyi kyilulyi kyikyeri maṙendenyi ganyu, kyiwe wuṟingyishi kowo.”

⁶Wakayenda wakatenga-tenga shikaṟonyi, wechionguo Ndumi Ngyicha, na ikyiṟa wandu handu hoose.

⁷Na Mangyi Herode kaicho mbonyi tsa isho shoose shilewutika, kaiṟewe mnu kyipfa wandu wengyi walegamba kye Yohane naṟuka ko wapfu;

⁸na wengyi kye nyi Elyiya awoneka, na wengyi kye nyi umwi o weonguo shisuku wa kacha aṟuka.

⁹Kyaindi Herode kagamba, “Yohane ngyilemṙumbuo mṙoe, kyasia nyi wui ichu ngyiichuoe mbonyi-tsi tsake?” Kakunda immbona.

¹⁰Kyasia kyiyeri wasu walya walewuya walemwongoya mbonyi tsoose tsilewutika; kawaṙuo kayenda nawo handu hakuṟiikyie mṟasa mṟi umwi okyelago Betisaida.

¹¹Na kyiyeri wuingyi wo wandu wulemanya, wulemwosha, kawaambilyia, kawamoṙeṙa nawo mbonyi tsa Wumangyi wo Ruwa, kakyiṟa walya wawelangyie ikyiṟo.

¹²Na mnengyeṟi ukowooka iolokyia, walya ikumi na wawi wakayenda kokye, wakammbia, “Samana na wuingyi-wu wo wandu kundu wayende shikaṟo sha mṟasenyi na iha, wawone handu helaa na shelya kyipfa iha handu lukyeri nyi nuka mreesi.”

¹³Kawawia, “Waenengyenyi kyelya.” Wakagamba, “Luwoṙe kyindo kya ngoseṟa sile nyi mkate itanu na makunga gawi-pfo; ang'u lundewuṟa shelya ko wandu-wa woose.”

¹⁴Kyipfa wasoṟo wawekyeri ho wawei cha shiku shitaanu. Kawia wanalosho wakye, “Ṟamiṟenyi wandu kui nzengye, orio nzengye wandu makumi gataanu.”

¹⁵Wakawuta kuṙo, wakawaṟamiṟa woose.

¹⁶Kawuta mkate iya itanu na makunga galya gawi, kaambuya wuye ruwewu kashiwikyia mboṟa, kapeṟenguo, kaenengyia wanalosho wakye kundu wagawie wuingyi wulya wo wandu.

¹⁷Wakalya, wakaiguṙa woose; na shipeṟengu shilya shiletsugaa walesania shikaichuo mkunja ikumi na iwi.

¹⁸Kyasia kyiyeri aweiterewa handu hakuṟiikyie, wanalosho wakye wawei hamwi na oe, kawawesa, “Wuingyi-wo wo wandu waigamba inyi nyi wui?”

¹⁹Wakamgaluo, wechigamba, “Yohane Mpatisi; kyaindi wengyi, Elyia; na wengyi kye nyi umwi o weonguo shisuku wa kacha aṟuka.”

²⁰Kawawia, “Aa nyoe mokyegamba inyi nyi wui?” Petiro kamgaluo, kagamba, “Iyoe nyi Mshumbuoe o Ruwa.”

²¹Kawawawasa, kawaima walawie mndu kyindo-kyi;

²²echigamba, “Kyakooya Mana o Adamu iwona matuuro gafoi na ilego nyi wameeku wa mengye na wang'anyi wa makohanyi na walosha wa mawawaso, na iwoogo na mfiri o kaṟaaṟu iṟuka.”

²³Kawawia woose, “Mndu oose kakunda ingyiosha nakulege amonyi, nakuṙikye msalaba okye orio mfiri nangyioshe.

²⁴Kyipfa mndu mokunda ikyiṟa moo okye nechiuṙetsa, na mndu echiṙetsa moo okye kyipfa kyako nyi oe echiukyiṟa.

²⁵Cha kyipfa nyi kyiira kyiha mndu echiwona kawona wuyana woose; kokooya aṙetsa moo okye na ikuṙetsa amonyi?

²⁶Cha kyipfa orio mndu echingyiwonia sonu inyi na maṙeṙo gako, Mana o Adamu nechiwonia sonu mndu-cho kyiyeri echicha mng'anonyi okye na o Awu na malaika waele.

²⁷Na inyi ngyimmbia loi, kuwoṙe wandu wagoṟokyi iha, walechiwona upfu maa ale, mṟasa wawone kuwooka Wumangyi wo Ruwa.”

²⁸Numa ya mbonyi-tso, hamwiṙe mfiri nyanya, naleṙuo Petiro na Yohane na Yakobo, kaṙo na fumvunyi kundu nandeterewa.

²⁹Kyiyeri aweiterewa fana ya kyaam kyakye ikailachika, mawale gakye gakailachika gakaila peṟu gakakyema-kyema.

³⁰Na wandu wawi waweiṙeṙa na oe, nawo nyi Mose na Elyiya;

³¹walewono mng'anonyi, wakaṙeṙa mbonyi tsa ipfa lyakye echilyiafutsia Yerusalemu.

³²Petiro hamwi na walya wawei na oe wawewalemie nyi maṙoe; kyaindi kyiyeri wamuamkye walewona mng'ano okye, na walya wawi walegoṟoka hamwi na oe.

³³Kyasia kyiyeri waweilekana na oe, Petiro nalewia Yesu, “Mndumii, ung'anyi, kyachia ilyi lui iha. Luachikyie matengo gaṟaaṟu, lyimwi lyapfo iyoe, na lyimwi lya Mose, na lyimwi lya Elyiya”; alaichi kyindo aweiṙeṙa.

³⁴Kyiyeri aweigamba isho, kulewoneka ipuchi lyikawashikyia, wakaowuo lyilya waleiṙa na ipfo ipuchinyi.

³⁵Ṟui lyikawuka kulya ipuchinyi, lyechigamba, “Ichu nyi Mono-ko, msambuṟe oko, mwaṙanyienyi oe.”

³⁶Na kyiyeri ṟui-lyo lyiletsia, Yesu kawoneka akyeri amonyi. Nawo wakatsia, walaongoye mndu isho shoose walewona mfiri iya yoose.

³⁷Kyikawa-ng'u ilya-ngama, lyilya walesoka kulya fumvunyi, wuingyi wung'anyi wo wandu wulekarisana na oe.

³⁸Na mndu umwi kyiiṙi kya kyisanzionyi naleiṟuka, echigamba, “Mlosha, ngyikuterewa usaṟie mono-ko, kyipfa oe nyi mono-ko kyimuumwi.

³⁹Na mṟufui mmbicho nekyemmbaṙa, na cha ilyi nekyekalagatsa; kamtewe kauma nguku, echiṙosa mawia, maa ekyemṙa sile kui imtuura lying'anyi na impirichuo-pirichuo-pfo.

⁴⁰Ngaterewa wanalosho wapfo wammbute, walaiṙime.”

⁴¹Yesu kagaluo, kagamba, “Nyoe rika lyilawoṙe iiṙikyia, lyiyendie njia ilawaṟi, ngyechikaa hamwi na nyoe na iṙuana na nyoe mṟasa indi? Ende mana-cho na iha.”

⁴²Kyiyeri aweiyenda kokye, mṟufui mmbicho ukomwolotsa wanda, kauma nguku. Yesu kaṙeṙia mṟufui ulya mmbicho, kakyiṟa mana ulya, kammbiyiṟia awuye.

⁴³Woose wakaṟiyio, wechiwona mng'ano o Ruwa. Nawo kyiyeri waweiṟiyio kyipfa kya shindo shoose aleshiwuta, nalewia wanalosho wakye,

⁴⁴“Aṙanyienyi necha mbonyi-tsi ngyimmbia, cha kyipfa Mana o Adamu naindewiko mawokonyi ga wandu.”

⁴⁵Kyaindi walemanya kyindo kyilya-pfo, kyikaṟiko kowo walakyimanye; wakaowuo immbesa kyitambuluo kya kyindo-kyo.

⁴⁶Wakawooka iwesana, nyi wui echiwa ang'anyi kyiiṙi kyawo.

⁴⁷Na Yesu kyiyeri alemanya kyindo wawekusaṟie mrimenyi kowo, nalewuta mana mtutu kammbikyia kufuhi na oe,

⁴⁸kawawia, “Mndu oose echiambilyia mana-chu kui rina lyako nangyiambilyia inyi; na mndu oose echingyiambilyia inyi naambilyia ulya alengyiṙuma. Kyipfa ai mtutu kyiiṙi kyanyu moose icho nyi oe ang'anyi.”

⁴⁹Yohane kagaluo, kammbia, “Mndumii, ung'anyi, lulewona mndu aiwuta waṟufui wawicho kui rina lyapfo, lukomwima, kyipfa ekyeoshana na soe-pfo.”

⁵⁰Yesu kammbia, “Maa mulamwime, cha kyipfa icho alaiwingana na nyoe nakyeri ura lonyu.”

⁵¹Kyikawa-ng'u, kyiyeri mfiri yakye yeṙo na Ruwewu iletikyira kufuhi, nalekuṟeyeṟa iyenda Yerusalemu.

⁵²Kaṙuma wandu wasonguo mbele yakye, wakayenda wakaiṙa na kyikaṟonyi kya Wasamaria, kundu wamwachikyie handu echikaa.

⁵³Kyaindi wandu wa ipfo walelega imwambilyia kyipfa kya ilyi awekuṟeyeṟie iyenda Yerusalemu.

⁵⁴Wanalosho wakye, Yakobo na Yohane, wammbone isho, walegamba, “Mndumii, nukundi lugambe moṙo usokye iwuka ruwewu, uwarumatse; [chandu na Elyiya alewuta?]”

⁵⁵Kawaindukyia, kawaṙeṙia, [kagamba, “Muichi nyi mrima o mbaṟe iha muwoṙe-pfo.]

⁵⁶Kyipfa Mana o Adamu alecha irumatsa mrima ya wandu-pfo, indi iikyiṟa.” Wakafuma wakayenda kyikaṟonyi kyingyi.

⁵⁷Nawo kyiyeri wawekyeri njiyenyi, mndu umwi nalemmbia, “Ngyekuosha orio handu ochiyenda.”

⁵⁸Yesu kammbia, “Mapaara gawoṙe mṟeshe, na shileye sha ngyinenyi shiwoṙe singyi, kyaindi Mana o Adamu awoṙe handu heonyonyia-pfo.”

⁵⁹Kawia ungyi, “Ngyiosha.” Kagamba, “Mndumii, ngyienenga momu kuwooka ngyindeṟika awu oko.”

⁶⁰Kammbia, “Leka wapfu waṟikye wapfu wawo; indi iyoe yenda undeonguo Wumangyi wo Ruwa.”

⁶¹Mndu ungyi-se kammbia, “Mndumii, ngyekuosha; indi ngyienenga momu kuwooka ngyindesamana na wandu wa kanyi koko.”

⁶²Yesu kammbia, “Mndu akuṟeyeṟa iṙema, naaho kaambuya numa, awaṟi Wumangyi wo Ruwa-pfo.”