Read Kivunjo New Testament 1999 Yohane 1 Bible Online

Yohane 1 - Kivunjo New Testament 1999 bible

Yohane 1

¹Ipfo mawookyionyi wuyana wulandegumbo kuwewoṙe Ṙeṙo, na Ṙeṙo nawekyeri ko Ruwa, na Ṙeṙo nawei Ruwa.

²Ipfo mawookyionyi nawekyeri ko Ruwa.

³Shoose shilewutika kui oe; maa kuwoṙe kyindo kyileiṙima iwutika nja yakye-pfo.

⁴Oe nyi-we shoka ya moo, na moo-cho uwei ngyeela ya wandu.

⁵Na ngyeela-yo yekyelyimika meemenyi, maa meema uleiṙima iirumisha-pfo.

⁶Hawewoṙe mndu, amṙume iwuka ko Ruwa, ekyelago Yohane.

⁷Icho nalecha iṟingyishia, kundu naṟingyishie ngyeela-yo, wandu woose waiṙime iiṙikyia.

⁸Mndu-cho awei ngyeela-yo-pfo, indi nalecha kundu naiṟingyishie.

⁹Kuwewoṙe Ngyeela ya loi, ekyeenenga orio mndu saa, echicha na wuyanenyi.

¹⁰Nawekyeri wuyanenyi, na kui oe wuyana wulegumbo kyaindi wuyana wulemmanya-pfo.

¹¹Nalecha na urukyenyi kokye, kyaindi maa walya wai wakye walemwambilyia-pfo.

¹²Indi woose walemwambilyia nalewaenenga wuiṙimi wo iwa wana wa Ruwa; nyi walya waiṙikyie rina lyakye.

¹³Wandu-wa wawafee, chi kui pfinya tsa mndu, maa chi kui ikunda lya mmbiu, maa kui chandu mndu akundi-pfo, indi kui pfinya tsa Ruwa.

¹⁴Na Ṙeṙo nalewa mndu, kakaa koṙu; na soe lukowona mng'ano okye, mng'ano cha o Mana kyimuumwi awukyie ko Awu; naichuo isaṟia na wuloi.

¹⁵Yohane nalemṟingyishia, kakuilenga na ṟui lying'anyi, kagamba, “Ichu nyi oe ngyileonguo mbonyi tsakye kye, ‘Aicha numa yako nawekyeri mbele yako; kyipfa nawekyeri pfo maa inyi ngyilafeo.’ ”

¹⁶Kyipfa awoṙe mboṟa tsifoi soe loose luleambilyia isaṟia lying'anyi.

¹⁷Cha kyipfa uwawaso luleṙiko iiṙia Mose; isaṟia na wuloi shilecha iiṙia Yesu Kristo.

¹⁸Kuwoṙe mndu alemmbona Ruwa kyiyeri kyoose-pfo. Mana kyimuumwi ai cha Ruwa nyi oe aleshukuo mbonyi tsakye.

¹⁹Na iwu nyiwo wuṟingyishi wo Yohane, kyiyeri Wayuda waleṙuma makohanyi kokye na Walewi iwuka Yerusalemu kundu wammbese, “Iyoe nukyeri wui?”

²⁰Na oe naleiṙikyia, maa alekana-pfo. Naleiṙikyia kye, “Inyi chi Kristo-pfo.”

²¹Nawo wakammbesa, “Nyi wui-ng'u? Iyoe nyi Elyiya?” Kagamba, “Inyi chi oe-pfo.” “Iyoe nyi moonguo shisuku ulya?” Kagaluo, “Ote.”

²²Naaho wakammbia, “Nui wui? Luiṙime igaluo walya waluṙuma. Nuigamba iyoe nyi wui?”

²³Kagamba, “Inyi nyi ṟui lya mndu aieṙia kundu ko nuka, ‘Goṟotsenyi mṟaṟu o Mndumii!’ Chandu moonguo shisuku Yesaya alegamba.”

²⁴Na walya walekowaṙumo wawewukyie ko Mafarisayo.

²⁵Wakammbesa, wakammbia, “Ny'kyilyi-ng'u uipatisa kokooya iyoe chi Kristo, maa Elyiya, maa moonguo shisuku ulya-pfo?”

²⁶Yohane kawagaluo, echigamba, “Inyi ngyimupatisa kui mṟinga, kyaindi kyiiṙi kyanyu hagoṟokyi mndu mulamuichi nyoe.

²⁷Nyi oe ulya aicha numa yako, inyi ngyilawaṟi ituruchuo ukowa lo kyiaṙu kyakye.”

²⁸Isho shilewutika kulya Betania molyolya o Yoridan, kundu Yohane aweipatisia.

²⁹Ilya-ngama kawona Yesu echicha na kokye, kagamba, “Aikyi Kyiondo kya Ruwa, kyechiwuta ngyuunyamaṟi tsa wuyana!

³⁰Ichu nyi oe ngyileṙeṙa mbonyi tsakye kye, ‘Kuicha mndu numa yako, alengyisongoya; kyipfa nawekyeri pfo ngyilafeo.’

³¹Maa inyi ngyiwemwichi-pfo; kyaindi kundu naṟingyishio ko wandu wa Isiraelyi inyi ngyilecha ngyechipatisa kui mṟinga.”

³²Lyingyi-se Yohane kaṟingyishia, echigamba, “Ngyilewona Mumuyo echisoka cha mbeta awuka ruwewu; na oe kaṙamia wuye yakye.

³³Maa inyi ngyilemmanya-pfo; kyaindi oe alengyiṙuma ipatisa kui mṟinga nalengyiwia, ‘Ulya ochiwona Mumuyo echisoka na iṙamia wuye yakye, icho nyi oe ekyepatisa kui Mumuyo Mweele.’

³⁴Na inyi ngammbona, lyingyi-se ngaṟingyishia kye ichu nyi Mana o Ruwa.”

³⁵Ilya-ngama-se Yohane nawegoṟokyi hamwi na wanalosho wawi kyiiṙi kya wanalosho wakye.

³⁶Kaambuya Yesu echumia, kagamba, “Aikyi Kyiondo kya Ruwa!”

³⁷Wanalosho walya wawi wakaicho eṙeṙa wakayenda halya-ndu Yesu awekyeri.

³⁸Yesu kainduka, kawawona wechicha na kokye, kawawia, “Muipfula kyi?” Wakammbia, “Rabi (kyimwi na igamba, Mlosha), nyi kwi okyekaa?”

³⁹Kawawia, “Nnjonyi, na nyoe mowona.” Wakayenda, wakawona handu ekyekaa, wakakaa kokye mfiri ulya. Na nyi-we cha kyiyeri kya saa kumi.

⁴⁰Anderea, mono-wama o Simion Petiro, nawei umwi o wanalosho walya wawi waleicho ulogo lo Yohane na iosha Yesu.

⁴¹Icho nalewona Simion kuwooka mono-wama okye oe amonyi, kammbia, “Lommbona Mesia.” (Kyimwi na igamba, Kristo).

⁴²Kamṙuo ko Yesu. Na Yesu kamwambuya, kammbia, “Iyoe nyi Simion, mana o Yohane; na iyoe nochilago Kyefa (kyimwi na igamba Petiro ang'u Igoe)”

⁴³Ilya-ngama nawekundi iyenda Galyilaya, na oe kawona Filyipo. Yesu kammbia, “Ngyiosha.”

⁴⁴Na Filyipo nawekyeri mndu awukyie Betisaida, mṟi Anderea na Filyipo wawekyekaa.

⁴⁵Filyipo kawona Natanaelyi kammbia, “Lommbona ulya mbonyi tsakye tsingyiṟeie mawawasonyi ga Mose na weonguo shisuku, Yesu mana o Yosefu, mndu o Nasareti.”

⁴⁶Natanaelyi kammbia, “Kyindo kyicha kyeiṙima iwuka Nasareti?” Filyipo kammbia, “Nnjo uwone.”

⁴⁷Kyasia Yesu kawona Natanaelyi echicha na kokye, kaonguo mbonyi tsakye, “Aichu Muisiraelyi loi loi, awoṙe ngyeṟo maa ale-pfo.”

⁴⁸Natanaelyi kammbia, “Noiṙima kuṙa ingyimanya?” Yesu kagaluo, kammbia, “Kyiyeri Filyipo alandekulage ukyeri halya wanda ya mfumu ngyilekuwona.”

⁴⁹Natanaelyi kamgaluo, kagamba, “Rabi, iyoe nyi Mana o Ruwa, nyi oe mangyi o Isiraelyi.”

⁵⁰Yesu kagaluo, kammbia, “Kyipfa ngyilekuwia, ngyilekuwona wanda ya mfumu, noiṙikyia? Nochiwona shindo shing'anyi kuta ishi.”

⁵¹Kammbia, “Loi, loi ngammbia, mochiwona mapuchi geseia na malaika wa Ruwa wechiṙooya na isokyia wuye ya Mana o Adamu.”