Read Kivunjo New Testament 1999 Yohane 10 Bible Online

Yohane 10 - Kivunjo New Testament 1999 bible

Yohane 10

¹Yesu nalewawia, “Ny'kyaloi, ngammbia, ulya alaiiṙa na mfiṟigenyi o moondo kui iiṙia moongonyi, kyaindi kaiṙia handu hengyi, icho nyi mbafu na oe nyi msokyi.

²Aiṙia moongonyi nyi mlyisi o moondo.

³Mringyi o moongo nekyepfunguya mlyisi-cho moongo, na moondo gekyemanya ṟui lyakye; na oe nekyelaga moondo gakye kui marina gawo, na igafumiṟia nja.

⁴Na oe kyiyeri afumiṟia nja moondo-go gakye goose, nekyegasongoya; na moondo galya gekyemwosha, cha kyipfa gaichi ṟui lyakye.

⁵Myenu gechimwosha maa ale-pfo, indi gechimṙicha; cha kyipfa gaichi maṟui ga wayenu-pfo.”

⁶Mfano-cho Yesu nalewawia; kyaindi wo walemanya kyindo aweiwawia-pfo.

⁷Kyasia Yesu kawawia-se, “Ny'kyaloi, ngammbia, inyi nyi moongo o moondo.

⁸Walya walengyisongoya nyi mbafu na wasokyi; kyaindi moondo galewaaṙanyia-pfo.

⁹Inyi nyi moongo. Mndu kaiṙia koko, nechikyia. Nechiiṙa na numba na ifumia nja, na oe nechiiguṙa kando.

¹⁰Mbafu yekyecha ikusaṟie kyindo kyingyi sile iiwa na iwaaga na inyamaṟa-pfo. Inyi ngyilecha kundu wawaṙe moo, ngoseṟa wauwaṙe pacha.

¹¹“Inyi nyi mlyisi mcha. Mlyisi mcha nekyereka moo okye kyipfa kya moondo.

¹²Mndu o wori, maa chi mlyisi-pfo, ulya moondo galai gakye, nekyewona kyisii kyeecha, kaṙa moondo na iṙicha, na kyisii kyekyerakuo ho ondo lyimwi na inyanyaṟitsa igo gengyi.

¹³Icho nekyeṙicha cha kyipfa nyi mndu o wori; maa mbonyi tsa moondo chi kyindo kokye-pfo.

¹⁴Inyi nyi mlyisi mcha; na walya wakyeri wako ngyiwaichi; na walya wai wako wangyiichi inyi;

¹⁵chandu Awu angyiichi na chandu ngyiichi Awu. Na inyi ngyekyereka moo oko kyipfa kya moondo.

¹⁶Ngyiwoṙe na moondo gengyi, galakyeri ga mfiṟiga-chu; na igo nago kyingyiwaṟi igaende na kunu mfiṟigenyi, na ṟui lyako gechilyiaṙanyia. Naaho-ng'u kochiwaṙa poo lyimwi na mlyisi umwi.

¹⁷Awu nagyikundi, cha kyipfa ngyekyereka moo oko kundu ngyiuambilyie-se numa.

¹⁸Kuwoṙe mndu ekyengyiwuta moo-chu-pfo, indi inyi ngyimonyi ngyekyeureka. Inyi ngyiwoṙe wuiṙimi wo iureka; ngyiwewoṙe taa wuiṙimi wo iuambilyia-se. Iwawaso-lyi ngyilelyiambilyia ko Awu oko.”

¹⁹Lyingyi-se kulawaṙe makusaṟo gamwi kyiiṙi kya Wayuda, kyipfa kya mbonyi tsilya Yesu aleonguo.

²⁰Wengyi wakagamba, “Ichu nawoṙo nyi mṟufui mmbicho, ngoseṟa nyi msuko; ny'kyilyi muimwaṙanyia?”

²¹Wengyi wakagamba, “Maṙeṙo-ga chi ga mndu awoṙo nyi mṟufui mmbicho-pfo. Ngyesa mṟufui mmbicho neiṙima ienenga shipfupfuṟe wuiṙimi wo iwona?”

²²Kyasia kulya Yerusalemu kuwewoṙe mṟumoe o iwikyia hekalu mboṟa lya kawi; na nyi-we kyiyeri kya mbeho.

²³Na Yesu naweichumia-chumia kulya hekalunyi handu hesanzia hawekyelago Solomon.

²⁴Kyasia Wayuda wakamwiṟiwia, wakammbia, “Nolyisa mrima yaṙu wukyiwa mṟasa indi? Kokooya iyoe nyi oe Kristo uluwie na pata.”

²⁵Yesu kawagaluo, kawawia, “Ngyilemmbia, kyaindi nyoe mulaiṙikyie. Maṟunda-ga ngyiṟunda kui rina lya Awu oko nyigo gaingyiṟingyishia.

²⁶Kyaindi nyoe muiṙikyia-pfo, cha kyipfa mukyeri poonyi lya moondo gako-pfo.

²⁷Moondo gako gekyemanya ṟui lyako; na inyi ngyiichi moondo-go, nago gekyengyiosha.

²⁸Na inyi ngyekyegaenenga moo o mlungana; maa gechiṙeka maa ale-pfo; maa kuwoṙe mndu eiṙima igangyisoka-pfo.

²⁹Awu oko alegangyienenga nang'anyi kuta woose; maa kuwoṙe mndu eiṙima igawuta mawokonyi ga Awu oko-pfo.

³⁰Inyi na Awu lukyeri kyindo kyimwi.”

³¹Kyasia Wayuda wakaira-se magoe kundu wamkape nago.

³²Yesu kawagaluo, kawawia, “Ngyilemumloṟa maṟunda mecha gafoi gawukyie ko Awu, nyi lyiha lyamuenenga ilanga ingyikapa na magoe?”

³³Wayuda wakamgaluo, wakagamba, “Luikukapa na magoe kyipfa kya kyindo kyicha uleṟunda-pfo; indi kyipfa kya ilahia Ruwa, na kyipfa nyi mndu uikuloṟa kye nui Ruwa.”

³⁴Yesu kawagaluo, kagamba, “Ngyesa uwawasonyi kyikyiṟeie kye Ruwa nagamba, ‘Nyoe nyi waruwa?’

³⁵Kokooya nalelaga waruwa wandu walya waleambilyia shiṟeio shiele; (na shiṟeio shiele sheiṙima iilachika-pfo);

³⁶ngyesa ulya Awu alemwilyisha, kamṙuma wuyanenyi, nyoe mummbia ‘Nulahia Ruwa’ cha kyipfa ngyilegamba, ‘Inyi nyi Mono-Ruwa?’

³⁷Kokooya ngyilaiṟunda maṟunda ga Awu oko, mulangyiiṙikyie.

³⁸Kyaindi ngagaṟunda, maa kokooya mulangyiiṙikyia inyi, iṙikyienyi maṟunda-go; muiṙime imanya kye Awu nai kyiiṙi kyako, na inyi ngyii kyiiṙi kya Awu.”

³⁹Wakalanga-se immbaṙa, kyaindi kakuashuo mawokonyi gawo.

⁴⁰Kayenda-se molyolya o Yoridan, mṟasa handu halya Yohane awekyepatisia wandu kyiyeri kya ipfo numa, kakaa pfo.

⁴¹Na wandu wafoi wakayenda kokye wakagamba, “Loi Yohane alewuta kyiṟingyishio kyoose-pfo, kyaindi mbonyi tsoose Yohane aleonguo tsa ichu tsiwei tsa loi.”

⁴²Wandu wafoi wakamwiṙikyia.