Read Kivunjo New Testament 1999 Yohane 2 Bible Online

Yohane 2 - Kivunjo New Testament 1999 bible

Yohane 2

¹Na mfiri o kaṟaaṟu kuwewoṙe wolyi kulya Kana, mṟi o Galyilaya; na mama o Yesu nawekyeri ho.

²Na Yesu nalekoalago na wolyinyi hamwi na wanalosho wakye.

³Na kyiyeri mpfinyo uleṙumbukyia, mama o Yesu kammbia, “Wawoṙe mpfinyo-pfo.”

⁴Yesu kammbia, “Mama, ny' kyikyi luwoṙe inyi na iyoe? Kyiyeri kyako kyilandeshikye-pfo.”

⁵Wamae kawia waṟundi, “Kyindo kyoose echimmbia, wutenyi.”

⁶Kyasia kuwewoṙe shigondi shiṟandaaṟu sha magoe, shiweshiwikye pfo kui muichiwie o Wayuda o samba kyimṟumoe, orio kyimwi kyiwoṙe cha madewe gaṟaaṟu.

⁷Yesu kawawia, “Ichuṟenyi shigondi-shi mṟinga.” Nawo wakashiichuṟa pacha.

⁸Kawawia, “Wulalu ṙahienyi, muṙooye monyi kyila.” Wakaṙuo.

⁹Na kyiyeri monyi kyila aleria mṟinga ulya ulewa mpfinyo, (maa alamanye kundu ulecha kyaindi waṟundi waweichi, walya waleṙahia mṟinga-cho) nalelaga monyi wolyi,

¹⁰kammbia, “Orio mndu mawookyionyi nekyeṟeyeṟa mpfinyo mcha; na wandu wakamnyo nakamwi nekyeende mpfinyo umwipale. Iyoe nokooma mpfinyo mcha mṟasa wulalu.”

¹¹Kyindo-kyi kya kuwooka kya kyiṟiyisho Yesu nalekyiwuta kulya Kana ya Galyilaya, kaṟingyishia mng'ano okye, na wanalosho wakye wakamwiṙikyia.

¹²Numa ya isho kasoka mṟasa Kaperinaumu, oe na wamae na wana wa wamae na wanalosho wakye; wakakaa pfo mfiri ngyaangu.

¹³Na Pasaka ya Wayuda iwekyeri kufuhi; na Yesu kaṙo mṟasa Yerusalemu.

¹⁴Kawona halya hekalunyi wandu waweikumba umbe na moondo na mbeta, na weilacha heleri waṙamie.

¹⁵Kaachikyia msharite, kawafuna woose kulya hekalunyi, na moondo na umbe; kaola-ola heleri tsa weilacha heleri, kapfuluo mesa tsawo;

¹⁶kawia walya waweikumba mbeta, “Wutenyi ishi iha. Mulagaluo numba ya Awu oko iwa numba ya mbucha.”

¹⁷Wanalosho wakye wakakumbuo kye kyikyiṟeie, “Ikunda lyako ko mbonyi tsapfo lyechingyirumatsa.”

¹⁸Kyasia Wayuda wakagaluo wakammbia, “Nyi kyiṟingyishio kyiha ululoṟa kye nuiwuta ishi?”

¹⁹Yesu kagaluo, kawawia, “Unduonyi hekalu-lyi na inyi ngyelyiwika mfirinyi iṟaṟu.”

²⁰Kyasia Wayuda wakagamba, “Hekalu-lyi lyilewiko kyiyeri kya maka makumi gaana na iṟandaaṟu, na iyoe nochilyiwika mfirinyi iṟaṟu?”

²¹Kyaindi oe naleonguo mbonyi tsa hekalu lya mmbiu okye.

²²Koikyo kyiyeri aleṟuka ko wapfu, wanalosho wakye wakakumbuo kye nalegamba kuṙo, wakaiṙikyia kyiṟeio na kyindo kyilya Yesu alekyionguo.

²³Na kyiyeri awekyeri Yerusalemu kyiyeri kya Pasaka wandu wafoi waleiṙikyia rina lyakye, kyiyeri walewona shiṟiyisho alewuta.

²⁴Kyaindi Yesu alewaiṙikyia-pfo kyipfa nalemanya kyikyeri mrimenyi kowo;

²⁵kyipfa kuwewoṙe kyimaṙuma kya mndu iṟingyishia mbonyi tsa mndu-pfo; kyipfa oe amonyi nalemanya shikyeri mrimenyi ko mndu.