Read Kivunjo New Testament 1999 Yohane 21 Bible Online

Yohane 21 - Kivunjo New Testament 1999 bible

Yohane 21

¹Numa ya isho Yesu nalekuṟingyishia-se ko wanalosho wakye, halya nduwenyi yekyelago Tiberia. Na oe nalekuṟingyishia kuṙi:

²Simion Petiro, Tomasi awekyelago-se, (Wana wawafee wawi mfiri umwi), Natanaelyi awukyie Kana ya Galyilaya, wana wa Sebedayo, na wanalosho wengyi wawi, wawekyeri hamwi na oe.

³Simion Petiro kawawia, “Ngyindeṙega makunga.” Nawo wakammbia, “Na soe lochiyenda hamwi na iyoe.” Kyasia wakafuma, wakaṙooya ngalawenyi; indi kyio kyilya walewaṙa ikunga maa lyimwi-pfo.

⁴Na lyilya kulekya, Yesu nalegoṟoka mbai ya nduwa, kyaindi wanalosho walemanya kye nyi oe-pfo.

⁵Kyasia Yesu kawawia, “Wana wako, muwoṙe kyindo kyelya?” Wakamgaluo, wakammbia, “Ote.”

⁶Kawawia, “Wikyenyi iṟambika ipfo mṟingyenyi ura lo kulyoe lo ngalawa, na nyoe mochiwaṙa makunga.” Wakawuta chandu Yesu alegamba indi kyiyeri-kyo walaiṙime ilyikuruo-se kyipfa kya makunga gafoi.

⁷Kyasia manalosho ulya Yesu awemkundi kawia Petiro, “Nyi Mndumii Yesu.” Na Simion Petiro, kyiyeri aleicho kye nyi Mndumii Yesu, kakuinewa mkoṟoṟi okye (kyipfa nawei kyiṟanguoe), kashoongyia kulya nduwenyi.

⁸Na wanalosho walya wengyi wakacha wakyeri ngalawenyi ingyi, wakyeri cha meta magana gawi wamarise iambaṙa nduwa iya, nawo wechikuruo iṟambika lyilya lyiichuo makunga.

⁹Kyasia kyiyeri waleshika mbai ya nduwa, walewuka kulya ngalawenyi, wakawona moṙo o makaa, na iho moṙonyi hawehawikyie makunga na mkate.

¹⁰Yesu kawawia, “Endenyi na iha makunga maata mogawaṙa wulalu kuṙi.”

¹¹Kyasia Simion Petiro kaṙooya ngalawenyi, kakuruo iṟambika lyilya na handu hagaṙutsu, lyiichuo makunga gang'anyi, igana makumi gataanu na gaṟaaṟu; na maa chandu gawefoi kuṙo, iṟambika lyilya lyileranduka-pfo.

¹²Yesu kawawia, “Nnjonyi mususuo.” Maa kuwoṙe mndu kyiiṙi kya wanalosho walya alekaria immbesa oe nyi wui-pfo; waichi kye nyi Mndumii Yesu.

¹³Yesu kayenda kaira mkate, kawaenengyia, na makunga taa.

¹⁴Koikyo kyikawa Yesu nawonekyia wanalosho wakye lya kaṟaaṟu numa ya iṟuka ko wapfu.

¹⁵Kyasia wamlye, Yesu kawia Simion Petiro, “Simion mana o Yohane, ungyikundi kuta iwa?” Kammbia, “Yee, Mndumii, iyoe nuichi kye ngyikukundi.” Kammbia, “Ambuya shiondo shako.”

¹⁶Kammbia-se lya kawi, “Simion mana o Yohane, ungyikundi?” Kammbia, “Iye, Mndumii, iyoe nuichi kye ngyikukundi.” Kammbia, “Lyisa moondo gako.”

¹⁷Kammbia-se lya kaṟaaṟu, “Simion mana o Yohane, ungyikundi?” Kammbia, “Mndumii, iyoe nuichi shoose; iyoe nuichi kye ngyikukundi.” Yesu kammbia, “Ambuya moondo gako.”

¹⁸Kagamba, “Ny'kyaloi, kakuwia, kyiyeri uwekyeri manakye, muwekyekuṟeyeṟa na iyenda kundu koose ukundi; kyaindi kyiyeri ochikuo, nochigoṟuo mawoko gapfo, na mndu ungyi nechikuwutia kyilya akunda na ikuṙuo kundu ulakundi.”

¹⁹Kaonguo mbonyi-tso iloṟa nyi upfu lo mbaṟe iha Petiro echipfa naenengye Ruwa kyiṟumi. Na Yesu amwonguo isho, kawia Petiro, “Ngyiosha.”

²⁰Petiro kainduka kawona manalosho ulya awemkunde nyi Yesu echiwaosha (ulya alearamia Yesu kyiyeri kya ilya kyelya kya kyukonyi, kagamba, “Mndumii, nyi wui aikuṟiinga?”)

²¹Kyasia Petiro, kawona manalosho-cho, kawia Yesu, “Mndumii, aa ichu nechiwutio kyi?”

²²Yesu kammbia, “Kokooya ngyikundi ichu nawaṙe moo mṟasa kyiyeri ngyechicha, kyikuwaṟi kyi iyoe? Iyoe ngyiosha.”

²³Kyasia mbonyi-tso tsikaṙunganana ko walya wawekyeosha Yesu kye manalosho ulya echipfa-pfo. Kyaindi Yesu alewawia kye echipfa-pfo indi nalegamba, “Kokooya ngyikundi ichu nawaṙe moo mṟasa kyiyeri ngyechicha, ikyo kyakuenenga kuṙa wukyiwa?”

²⁴Ichu nyi manalosho ulya aṟingyishia na iṟeia mbonyi-tsi; na soe luichi kye wuṟingyishi wokye nyi loi.

²⁵Kuwoṙe shindo shingyi shifoi Yesu alewuta, shilaleṟeio, kyipfa ngakusaṟa shiweṟeio shoose wuyana uwechiwaṙa handu hewikyia shitapu-sho shoose-pfo.