Read Kivunjo New Testament 1999 Yohane 8 Bible Online

Yohane 8 - Kivunjo New Testament 1999 bible

Yohane 8

¹[ Waleyenda orio mndu kanyi kokye, na Yesu kayenda mṟasa fumvunyi lya Mseituni.

²Na kyiyeri kya ngamenyi lyilya kulekya kaiṙa-se na hekalunyi, na wandu woose wakayenda kokye. Na oe kaṙamia, kawooka iwalosha.

³Walosha wa mawawaso na Mafarisayo wakamwendie mndu mka alekooyo wuṟuinyi, wakammbikyia makyiṙi-gawi.

⁴Wakammbia, “Mlosha, mndu mka-chu nakooyo eṟuguyo.

⁵Kyasia, uwawasonyi, Mose naleluwia lukape na magoe waka wa mbaṟe-i iyi. Iyoe nogamba kyi?”

⁶Nawo walegamba kuṙo wechimyesha, kundu wawone kyimaṙuma kyemshitakyi. Kyaindi Yesu kaarama, kaṟeia na kyimnyoe kyakye iho terinyi.

⁷Na kyiyeri waleengyeṟa immbesa, nalewawia “Ulya alawoṙe wunyamaṟi kyiiṙi kyanyu nawe o kuwooka imkapa na igoe.”

⁸Kaarama-se kaṟeia na kyimnyoe kyakye iho terinyi.

⁹Nawo kyiyeri waleicho, wakafuma soṟom soṟom, wechiwooka na ulya mku kuta woose; Yesu kaṙio amonyi, na mndu mka ulya agoṟokyi halya.

¹⁰Yesu kaamkyia wuye alawone mndu sile mndu mka ulya. Kammbia, “Mndu mka, wookwi walya waweigamba kye numnyamaṟi? Kuwoṙe maa umwi aṙio iha igamba kye nuwaṟi iwoogo?”

¹¹Mndu mka ulya kagamba, “Kuwoṙe-pfo, Mndumii.” Yesu kammbia, “Maa inyi ngyikuanduya-pfo. Yenda kyaindi ulawute-se wunyamaṟi.”]

¹²Kyasia Yesu kawia-se Mafarisayo walya, “Inyi nyi ngyeela ya wuyana. Ulya angyiosha inyi nechiwaṙa ngyeela yekyeenenga wandu moo, na echichumia handu hawoṙe meema-pfo.”

¹³Mafarisayo wakammbia, “Iyoe nuikuṟingyishia kumonyi; wuṟingyishi wopfo chi loi-pfo.”

¹⁴Yesu kagaluo kawawia, “Inyi maa chandu ngyikuṟingyishia ngyimonyi, wuṟingyishi woko nyi wo loi; cha kyipfa ngyiichi kundu ngyiwukyie na kundu ngyiyenda; kyaindi nyoe muichi kundu ngyiwukyie maa kundu ngyiyenda-pfo.

¹⁵Nyoe mokyeanduya kui iambuya mbonyi tsa mmbiu; inyi ngyekyeanduya mndu-pfo.

¹⁶Na kokooya ngyiwechianduya, ianduya lyako lyechiwa lya loi; cha kyipfa inyi ngyikyeri ngyimonyi-pfo, indi ngyikyeri na ulya alengyiṙuma.

¹⁷Lyingyi-se uwawasonyi lonyu kyikyiṟeie kye ‘Wuṟingyishi wo wandu wawi nyi wo loi.’

¹⁸Inyi ngyikuṟingyishia ngyimonyi, na Awu ulya alengyiṙuma naingyiṟingyishia.”

¹⁹Kyasia wakammbia, “Ookwi Awu opfo?” Yesu kagaluo kagamba, “Inyi mungyiichi-pfo; maa Awu oko mumwichi-pfo. Kokooya muwengyiichi inyi, muwechimanya na Awu oko.”

²⁰Mbonyi-tsi naletsiṙeṙa kyiyeri aweilosha hekalunyi, kyiṟinyi kyekooma heleri; maa kuwoṙe mndu alemmbaṙa-pfo, cha kyipfa kyiyeri kyakye kyewutio kuṙo kyilekokyamshika-pfo.

²¹Yesu kawawia-se, “Inyi ngyiwuka iha, na nyoe mochingyipfula; na nyoe mochipfa mowuta wunyamaṟi; na inyi kundu ngyiyenda moiṙima iyenda pfo-pfo.”

²²Kyasia Wayuda wakagamba, “Ngyesa nechikuwaaga? Cha kyipfa naigamba, ‘Kundu ngyiyenda nyoe moiṙima iyenda pfo-pfo.’ ”

²³Kawawia, “Nyoe nyi wa iha wanda wuyanenyi, inyi nyi o wuye ruwewu. Nyoe nyi wa wuyana-wu, inyi chi o wuyana-wu-pfo.

²⁴Koikyo ngammbia kye mochipfa mowuta wunyamaṟi; cha kyipfa mulandeiṙikyie kye inyi nyi oe ulya ngyigamba kye inyi nyi oe mochipfa mowuta wunyamaṟi.”

²⁵Kyasia wakammbia, “Iyoe nyi wui?” Yesu kawawia, “Inyi nyi ulya ngammbia wookyia mawookyionyi kye inyi oe.

²⁶Ngyiwoṙe shindo shifoi shegamba na sheanduya kyipfa kyanyu; kyaindi ulya alengyiṙuma nyi o loi, na inyi shilya ngyileicho kokye nyisho ngyishionguo iha wuyanenyi.”

²⁷Maa walemanya kye naweiwaongoya mbonyi tsa Awu-pfo.

²⁸Kyasia Yesu kawawia, “Kyiyeri-kyo mochimarisa iwikyia Mana o Adamu msalabenyi nyi lyo-ndu momanya kye inyi nyi oe ulya ngammbia kye inyi nyi oe; na kye inyi ngyekyewuta kyindo kui iambuya kyilya ngyikundi-pfo, indi chandu Awu alengyilosha nyi wuṙo ngyekyeonguo.

²⁹Na ulya alengyiṙuma nakyeri hamwi na inyi; angyiṙeeye ngyimonyi-pfo; cha kyipfa mfiri yoose ngyekyewuta shilya shimchihiṟie.”

³⁰Na oe kyiyeri aweionguo isho, wandu wafoi wakamwiṙikyia.

³¹Kyasia Yesu kawia Wayuda walya wawemwiṙikyie, “Mukoosha shilya ngyimulosha, mochiwa wanalosho wako loi loi;

³²lyingyi-se mochimanya wuloi wo mbonyi tsa Ruwa, na wuloi-wo wochimmbuta wusingyenyi.”

³³Wakamgaluo, wakagamba, “Soe nyi kyishari kya Abrahamu, maa lulandewe watumo wa mndu kyiyeri maa kyimwi-pfo; na iyoe nuigamba, ‘Mochiwuto wusingyenyi?’ ”

³⁴Yesu kawagaluo, kagamba, “Ny'kyaloi ngammbia, ‘Orio mndu ekyewuta wunyamaṟi nyi mtumo o wunyamaṟi.’

³⁵Mtumo akyeri mndu o mfiri yoose o numba iya ekyeiṟundia-pfo; indi mana nyi mndu o numba-yo mfiri yoose.

³⁶Kyasia Mana kammbuta wusingyenyi, mochiwuka wusingyenyi loi loi.

³⁷Ngyiichi kye nyoe nyi kyishari kya Abrahamu; kyaindi mukundi ingyiwaaga cha kyipfa kyilya ngyimlosha kyikyeri mrimenyi konyu-pfo.

³⁸Shilya ngyileshiwona ko Awu nyisho ngyionguo; na nyoe na wuṙo muwuta shilya muleicho ko awu onyu.”

³⁹Wakagaluo, wakammbia, “Awu oṙu nyi oe Abrahamu!” Yesu kawawia, “Kokooya muwei wana wa Abrahamu, muweṟunda maṟunda ga Abrahamu.

⁴⁰Kyaindi wulalu mukundi ingyiwaaga, mndu ammbia kyikyeri kya loi, ngyilekyiicho ko Ruwa. Abrahamu alewuta kuṙo-pfo.

⁴¹Nyoe muiṟunda maṟunda ga awu onyu.” Nyi lyo-ndu walemmbia, “Soe lulefeo wuṟuinyi-pfo. Soe luwoṙe Awu umwi, nyi oe Ruwa.”

⁴²Yesu kawawia, “Kokooya Ruwa awekyeri awu onyu, muwengyikunda inyi; cha kyipfa ngyilewuka ko Ruwa, na inyi ngyilecha; maa ngyilecha kui ikunda lyako ngyimonyi-pfo, indi oe nyi oe alengyiṙuma.

⁴³Kyitewe mulaimanya ikyo ngyigamba ny'kyi? Nyi kyipfa nyoe mulaiiṙima imanya malosho gako.

⁴⁴Nyoe nyi wa awu onyu Mokyiriinzi, na lango tsa awu onyu nyitso mukundi itsiosha. Oe nyi mmbaagi wookyia mawookyionyi; maa alandekae ura lo wuloi-pfo, cha kyipfa kokye kuwoṙe wuloi-pfo. Kyiyeri aṙeṙa wongo, nekyeṙeṙa shikyeri shakye amonyi; cha kyipfa oe nekyeṙeṙa wongo na nyi awu o wongo.

⁴⁵Na inyi, cha kyipfa ngyiṙeṙa kyikyeri loi, mungyiiṙikyia-pfo.

⁴⁶Nyi wui kyiiṙi kyanyu angyiṟingyishia kye ngyiwoṙe wunyamaṟi? Na inyi ngaṙeṙa loi, ny'kyilyi nyoe mulaingyiiṙikyia?

⁴⁷Ulya ai o Ruwa nekyeaṙanyia malosho ga Ruwa. Koikyo nyoe muiaṙanyia-pfo cha kyipfa nyoe chi wana wa Ruwa-pfo.”

⁴⁸Wayuda wakagaluo, wakammbia, “Ngyesa soe luigamba loi kye iyoe nyi mndu o Samaria, na iyoe nuwoṙo nyi mṟufui mmbicho-pfoe?”

⁴⁹Yesu kawagaluo, kagamba, “Inyi ngyiwoṙo nyi mṟufui mmbicho-pfo; kyaindi inyi ngyiindia Awu oko, na nyoe mungyiindia-pfo.

⁵⁰Maa inyi ngyipfula kyiṟumi kyako-pfo; kuwoṙe mopfula kyiṟumi na ianduya.

⁵¹Ny'kyaloi, ngammbia ‘Mndu kaosha kyilya malosho gako gagamba mrima okye ochiwaṙa moo mlungana.’ ”

⁵²Kyasia Wayuda wakammbia, “Wulalu lomanya kye nuwoṙo nyi mṟufui mmbicho. Abrahamu alempfa, na weonguo shisuku walempfa; na iyoe nugamba, ‘Mndu kaosha kyilya malosho gako gagamba mrima okye ochiwaṙa moo mlungana.’

⁵³Iyoe nung'anyi kuta awu oṙu Abrahamu, alempfa? Weonguo shisuku nawo walempfa. Nukundi ikuloṟa iyoe nyi wui?”

⁵⁴Yesu kagaluo kagamba, “Ngakuṟumisha inyi ngyimonyi, kyiṟumi kyako chi kyindo-pfo. Ekyengyiṟumisha nyi Awu oko, ulya nyoe muigamba kye nyi Ruwa onyu.

⁵⁵Maa nyoe mulemmanya-pfo; kyaindi inyi ngyimwichi. Ngagamba kye ngyimwichi-pfo ngyechiwa mndu ekyeṙeṙa wongo cha nyoe; kyaindi ngyimwichi, na malosho gakye ngyekyegaosha.

⁵⁶Abrahamu, awu onyu, nalechihiyo chandu echiwona mfiri o icha lyako; na oe kauwona kachihiyo.”

⁵⁷Kyasia Wayuda wakammbia, “Nuwewona kuṙa Abrahamu na iyoe ulandewaṙe maa maka makumi gataanu-pfo?”

⁵⁸Yesu kawawia, “Ny'kyaloi ngammbia, Abrahamu alafeo, inyi ngyikyeri pfo.”

⁵⁹Kyasia wakaira magoe kundu wamkape nago; kyaindi Yesu kakuṟiika, kawuka kulya hekalunyi.