Read Kivunjo New Testament 1999 Yohane 9 Bible Online

Yohane 9 - Kivunjo New Testament 1999 bible

Yohane 9

¹Na kyiyeri aweiiṙa nalewona mndu awei kyipfupfuṟe wookyia ifeo lyakye.

²Wanalosho wakye wakammbesa, wechigamba, “Rabi, nyi wui alewuta wunyamaṟi, mndu-chu ang'u wafee wakye, mṟasa nafeo ai kyipfupfuṟe?”

³Yesu kagaluo, kagamba, “Ichu alewuta wunyamaṟi maa wafee wakye-pfo; indi nalefeo ai kyipfupfuṟe kundu wandu waiṙime iwona maṟunda galya Ruwa tupu eiṙima iṟunda.

⁴Kyiwaṟi iṟunda maṟunda ga ulya alengyiṙuma kyiyeri kuwoṙe ngyeela; kyio kyiicha kyiyeri mndu alechiiṙima iṟunda.

⁵Kyiyeri ngyikyeri wuyanenyi, inyi nyi ngyeela ya wuyana.”

⁶Kyiyeri alemarisa igamba isho, nalepuchia maṙa iho wanda, kaachikyia toombo na maṙa galya. Kashia mndu ulya awei kyipfupfuṟe toombo ipfo mesonyi,

⁷kammbia, “Yenda undesamba kulya iruwenyi lya Siloamu.” (Kyimwi na igamba, “Aleṙumo.”) Kyasia mndu ulya awei kyipfupfuṟe kayenda na isamba; kawuya ewona.

⁸Wamṟasa wakye, na walya walekowammbona mfiri ya numa echieṟeṟa, wakagamba, “Ichu chi ulya awekyeeṟeṟa-pfoe?”

⁹Wengyi wakagamba, “Nyi oe.” Wengyi wakagamba, “Ote; kyaindi nafananyi na oe.” Oe amonyi kagamba, “Nyi oe.”

¹⁰Kyasia wakammbia, “Meso gapfo gaiṙima kuṙa iwona?”

¹¹Oe kawagaluo, kagamba, “Mndu ulya ekyelago Yesu naleachikyia toombo, kangyishia mesonyi kangyiwia, ‘Yenda Siloamu undesamba.’ Koikyo ngayenda na isamba, ngaiṙima iwona.”

¹²Wakammbia, “Ny'kwi akyeri?” Kagamba, “Inyi ngyiichi-pfo.”

¹³Kyasia wakaṙuo ko Mafarisayo mndu ulya awekyeri kyipfupfuṟe mfiri ya numa.

¹⁴Na nyi-we mfiri o onyonya, kyiyeri kyilya Yesu aleachikyia toombo na ienenga mndu ulya iwona.

¹⁵Kyasia Mafarisayo nawo wakammbesa-se chandu aleiṙima iwona. Kawawia, “Nalengyishia toombo mesonyi, na inyi ngasamba, na wulalu ngyiwona.”

¹⁶Kyasia Mafarisayo waata wakagamba, “Mndu-cho awukyie ko Ruwa-pfo, cha kyipfa nekyewuta kyilya kyilawaṟi iwuta mfiri o onyonya.” Wengyi wakagamba, “Mndu mnyamaṟi neiṙima kuṙa iwuta shiṟiyisho cha isho?” Walawaṙe makusaṟo gamwi.

¹⁷Kyasia lya kawi wakawia ulya awei kyipfupfuṟe, “Mbonyi tsiha uigamba tsa ichu akuenenga wuiṙimi wo iwona?” Kagamba, “Nyi moonguo shisuku.”

¹⁸Kyasia Wayuda walaiṙikyie mbonyi tsilya aweigamba, kye nawei kyipfupfuṟe na numa ya iho kaenengo iwona; mṟasa wakalaga wafee wakye.

¹⁹Wakawawesa, “Ichu nyi oe mana onyu, ulya mulegamba kye nalefeo ai kyipfupfuṟe? Wulalu naiṙima kuṙa iwona?”

²⁰Wafee wakye wakagaluo, wakagamba, “Luichi kye ichu nyi oe mana oṙu, lyingyi-se kye nalefeo ai kyipfupfuṟe;

²¹kyaindi chandu aiwona wulalu luichi-pfo; maa luichi nyi wui alemwenenga wuiṙimi wo iwona-pfo. Mmbesenyi oe amonyi; oe nyi mndu apfulukyie, neiṙima ionguo amonyi.”

²²Wafee wakye walegamba kuṙo kui iowuo Wayuda; cha kyipfa Wayuda walekowaiṙikyiana kye mndu echigamba kye nyi Kristo, nechiimo momu o yenda sinagoginyi.

²³Nyikyo kyitewe wafee walya walegamba, “Nyi mndu apfulukyie, mmbesenyi oe.”

²⁴Kyasia lya kawi Mafarisayo wakalaga mndu ulya awei kyipfupfuṟe, wakammbia, “Enenga Ruwa kyiṟumi. Soe luichi kye mndu-chu nyi mnyamaṟi.”

²⁵Kyasia mndu ulya kagaluo, kagamba, “Kye oe nyi mnyamaṟi ngyiichi-pfo. Ngyiichi kyindo kyimwi tupu: kye inyi ngyiwei kyipfupfuṟe na wulalu ngyiwona.”

²⁶Kyasia wakammbia, “Ny'kyikyi alekuwutia? Nalekuenenga kuṙa wuiṙimi wo iwona?”

²⁷Kawagaluo, kagamba, “Ngamummbia, maa moiṙikyia-pfo. Ny'kyilyi mukundi iwio-se? Na nyoe mukundi iwa wanalosho wakye?”

²⁸Kyasia wakamnyeṟie, wechigamba, “Iyoe nyi manalosho okye; soe nyi wanalosho wa Mose.

²⁹Soe luichi kye Ruwa naleṙeṙa na Mose; indi icho luichi kundu awukyie-pfo.”

³⁰Mndu ulya kagaluo, kawawia, “Ikyi nyi kyindo kyeṟiyisha! Kye nyoe muichi kundu awukyie-pfo, na oe nalengyienenga wuiṙimi wo iwona!

³¹Luichi kye Ruwa ekyeaṙanyia wanyamaṟi-pfo; indi mndu kawa naowuye na ikunda Ruwa, na iosha kyilya Ruwa akundi, Ruwa nekyemwaṙanyia.

³²Wookyia kyiyeri-kyo kyilandegambo kye mndu naenenga kyipfupfuṟe wuiṙimi wo iwona, ulya alefeo mbaṟe-yo iyo-pfo.

³³Kokooya icho alawewukyie ko Ruwa, aweiṙima iwuta kyindo kyoose-pfo.”

³⁴Wakagaluo, wakammbia, “Iyoe nulefeeyo wunyamaṟinyi nakamwi, na iyoe nuilulosha soe?” Kui nyashi wakamtsindikyia nja ya sinagogi.

³⁵Yesu kaicho kye wamtsindikyia nja; na oe kyiyeri alemmbona nalegamba, “Iyoe nuiṙikyie Mana o Ruwa?”

³⁶Na oe kagaluo, kagamba, “Nyi wui, Mndumii, ngyiiṙime imwiṙikyia?”

³⁷Yesu kammbia, “Omummbona, na oe aiṙeṙa na iyoe nyi oe.”

³⁸Kagamba, “Ngaiṙikyia, Mndumii.” Kamwindia.

³⁹Yesu kagamba, “Inyi ngyilecha na kunu wuyanenyi ianduya, kundu iwo walaiwona wawone, na walya waiwona wawe shipfupfuṟe.”

⁴⁰Mafarisayo waata wawekyeri hamwi na oe wakaicho isho, wakammbia, “Ngyesa na soe nyi shipfupfuṟe?”

⁴¹Yesu kawawia, “Kokooya muwei shipfupfuṟe muweiwaṙa wunyamaṟi-pfo; kyaindi wulalu muigamba, ‘Luwonyi,’ kyasia wunyamaṟi wonyu wuengyeṟa ikaa ho.”