Read Kivunjo New Testament 1999 Mawuto Ga Wasu 1 Bible Online

Mawuto Ga Wasu 1 - Kivunjo New Testament 1999 bible

Mawuto Ga Wasu 1

¹Tofilo Mkunde, kyitapu kyilya kya kuwooka ngyilekuṙikyia ngyileṟeia mbonyi tsa shindo shoose Yesu alewuta na ilosha.

²Mṟasa mfiri ulya aleṙoso na wuye ruwewu, amloṟe kui Mumuyo Mweele wasu walya alewasambuṟa.

³Walya alekuṟingyishia kowo, kui iwuta shindo shifoi, numa ya ilyiso wukyiwa, kye nai na moo; echiwawonekyia kyiyeri kya mfiri makumi gaana, na ionguo mbonyi tsa Wumangyi wo Ruwa.

⁴Na kyiyeri awekyeri nawo kyisanzionyi nalewawia walawukye Yerusalemu, kyaindi waweṙelyie kyiteṟio kya Awu, kyiteṟio ngyilemuongoya mbonyi tsakyo;

⁵kye Yohane nalepatisa kui mṟinga, indi nyoe mochipatiso kui Mumuyo Mweele numa ya mfiri-i ngyaangu.

⁶Kyasia kyiyeri wawekyeri na Yesu kyisanzionyi, wakammbesa, “Ngyesa, Mndumii kyiyeri-kyi nyi lyo-ndu uiwiyiṟia Isiraelyi Wumangyi?”

⁷Kawawia, “Chi iṟunda lyanyu imanya shiyeri Awu awikyie sile oe amonyi-pfo.

⁸Kyaindi mochiambilyia pfinya, Mumuyo Mweele kamcha na konyu, na nyoe mochingyiṟingyishia Yerusalemu, na urukyenyi loose lo Wayuda, na Samaria, mṟasa matsitsionyi ga uruka.”

⁹Amgambe isho, kyiyeri waweimwambuya kairo, ipuchi lyikammbuta mbele yawo.

¹⁰Kyiyeri waweiitukuya ruwewu karii, kyiyeri aweiyenda, wandu wawi wakagoṟoka kufuhi nawo, waṟee nguwo tsa uwiṟo,

¹¹wakagamba, “Nyoe wandu wa Galyilaya, ny'kyilyi muiambuya ruwewu? Yesu-chu aṙoo iwuka konyu iyenda wuye ruwewu, newuya chandu mommbona echiyenda ruwewu.”

¹²Numa ya iho wakawuya na Yerusalemu iwuka fumvu lyiwekyelago lya Mseituni, lyikyeri kufuhi na Yerusalemu, cha kyilometa kyimwi kuṙi.

¹³Na lyilya waleshika Yerusalemu, wakaṙooya kai, kundu wawekyekaa: Petiro, Yohane, Yakobo, Anderea, Filyipo na Tomasi, Baritolomayo na Matayo, Yakobo o Alyifayo, Simion Selote, na Yuda o Yakobo.

¹⁴Iwa woose wawei kyindo kyimwi kyiiṙi kya iterewa, hamwi na waka na Maria, wama o Yesu, na wana wa wamae.

¹⁵Mfiri iya Petiro kagoṟoka kyiiṙi kya walya wawekyeosha Yesu (itala lyawo cha igana na makumi gawi),

¹⁶kagamba, “Wana wa wama, kyiwewaṟi shiṟeio shiele shiafukyie, shiṟeio Mumuyo Mweele aleshionguo kui ṙumbu lya Dawidi, mbonyinyi tsa Yuda, alesongoya walya walewaṙa Yesu.

¹⁷Cha kyipfa nawemtale hamwi na soe, kagawio iṟunda-lyi.

¹⁸(Kyasia mndu-chu naleguṟa ṙema kui woguru wo iwuta wunyamaṟi; kaoloka kapasakana, maula gakye goose gakafumia nja.

¹⁹Wandu woose wekyekaa Yerusalemu wakamanya mbonyi-tsi; mṟasa ṙema lyilya lyikalago kyikowo Akyelyidama, kyimwi na igamba, ṙema lya samu).

²⁰Cha kyipfa kulya kyitapunyi kya shiimbo kyikyiṟeie kye, ‘Kyiṟaṟo kyakye kyechiwaṙa kyindo-pfo, maa kochiwaṙa mndu echikaa ho-pfo.’ Lyingyi-se kyikyiṟeie, ‘Mndu ungyi naṙuo wuṟundi wokye.’ ”

²¹“Kyasia kyiiṙi kya wandu waleoshana na soe kyiyeri kyoose Mndumii Yesu aweicha na iwuka koṙu,

²²iwookyia wupatiso wo Yohane, mṟasa mfiri ulya alewuto koṙu iyenda wuye ruwewu, kyiwaṟi umwi owo nawe mṟingyishi o iṟuka lyakye hamwi na soe.”

²³Wakawika wandu wawi: Yosefu, awekyelago Barisaba, awewoṙe rina lya kawi Yusto, na Matiya.

²⁴Numa ya iho wakaterewa, wakagamba, “Iyoe, Mndumii, uichi mrima ya wandu woose, luloṟe nyi wui omsambuṟa kyiiṙi kya iwa wawi,

²⁵nawe msu handu ha Yuda; kyipfa Yuda nalelekana na soe kayenda handu alewutikyio kyilya kyimmbaṟi.”

²⁶Wakakapa kuṟu kuha isambuṟa Yosefu na Matiya na Matiya kasambuṟo; na oe kawiko handu hamwi na wasu walya ikumi na umwi.