Read Kivunjo New Testament 1999 Mawuto Ga Wasu 11 Bible Online

Mawuto Ga Wasu 11 - Kivunjo New Testament 1999 bible

Mawuto Ga Wasu 11

¹Kyasia wasu na wandu waweiṙikyie Yesu kulya urukyenyi lo Uyuda wakamanya kye wandu walaweiṙikyie Yesu nawo waambilyia Ṙeṙo lya Ruwa.

²Na Petiro kyiyeri aleṙo iyenda Yerusalemu Wayuda walya wawekundi wandu walakyeri Wayuda wakundi iosha Yesu waṙino wakagaluana na oe,

³wechigamba, “Nuleyenda ko wandu walawaṙine kolya nawo.”

⁴Petiro kawooka iwaongoya necha, kagamba,

⁵“Ngyiwekyeri mṟinyi o Yafa, ngyeterewa, ngawa cha mndu ailoṙo. Ngawona kyindo kyisoka ruwewu, cha nguwo ngyilandari yesotso iwuka ruwewu, ikyeri cha ilyi ingyiwaṙe ngyuura tsoose tsiina, kyikashika halya-ndu ngyiwei.

⁶Ngakyiitukuya mnu, ngyekusaṟa, ngawona mando ga saka gawoṙe maṙende gaana; na mando ga nguṙunyi, na galya gekyekukuruo na ndewu, na shileye sha ngyinenyi.

⁷Ngaicho na ṟui lyingyiwia, ‘Petiro, amka, ushinje ulye.’

⁸Ngagamba, ‘Maa ale, Mndumii, cha kyipfa ngyilandelye kyindo kyoose kyifanyi-pfo.’

⁹Ṟui lyilya lyawuka ruwewu lyikangyigaluo lya kawi lyikagamba, ‘Shilya Ruwa agambie shiwaṟi ilyio iyoe ulagambe kye shekyelyio-pfo.’

¹⁰Kyindo-kyi kyikawutika kaṟaaṟu; numa ya iho ngawona kyindo kyakuruo shindo shilya shoose shikawuya-se na ruwewu.

¹¹Kyiyeri kyilya wandu waṟaaṟu wakagoṟoka mbele ya numba iya luwekyeri, waleṙumo koko iwuka Kaisaria.

¹²Mumuyo kangyiwia ngyioshane nawo, ngyilapfiio nyi mṙoe. Wandu-wa waṟandaaṟu waiṙikyie Yesu wakayenda hamwi na inyi, lukoiṙa na numba ko mndu ulya.

¹³Kaluongoya chandu alewona malaika alegoṟoka kanyi kokye na immbia, ‘Ṙuma wandu wayende Yafa, walage Simion ekyelago Petiro,

¹⁴echikuongoya mbonyi tsechikukyiṟa, iyoe na walya wa kanyi kopfo woose.’

¹⁵Na kyiyeri ngyilewooka iṙeṙa, Mumuyo Mweele kasokyia wuye yawo chandu alelusokyia soe ipfo mawookyionyi.

¹⁶Ngakumbuo ṙeṙo lyilya lya Mndumii, chandu alegamba, ‘Yohane nalepatisa kui mṟinga loi, indi nyoe mochipatiso kui Mumuyo Mweele.’

¹⁷Kyasia kokooya Mndumii Ruwa nalewaenenga wo kyienengo kyilya kyilya aleluenenga soe luiṙikyie Mndumii Yesu Kristo, inyi nyi wui ngyiiṙime iwingana na Ruwa?”

¹⁸Kyiyeri waleicho mbonyi-tsi wakatsia sau, wakaṟumisha Ruwa, wechigamba, “Kyasia Ruwa naenenga walya walaiṙikyie Yesu isaṟia lya iṙumbuya wunyamaṟi, irumbuya lyekyeende moo o mlungana.”

¹⁹Kyasia wandu walya walekowanyanyaṟika kyipfa kya wukyiwa wulya wulecha kyipfa kya Stefano iwoogo, wakapfunga kyaro mṟasa Foinikye na Kyipiro na Antiokyia, walaonguoe mbonyi tsa Yesu sile ko Wayuda tikyi.

²⁰Kyaindi waata kyiiṙi kya iwo walepfunga kyaro nyi-we wandu wa Kyipiro na Kyirene, nawo kyiyeri waleshika Antiokyia wakaṙeṙa na Wayuda kui mṙeṙie o Kyikyiṟikyi, wechionguo mbonyi ngyicha tsa Mndumii Yesu.

²¹Pfinya ya Mndumii ikakaa hamwi nawo; wandu wafoi wakaiṙikyia wakagalukyia Mndumii.

²²Mbonyi tsa wandu-wo tsikashika ko wandu wa siṟi ya kulya Yerusalemu; wakaṙuma Barinaba, nayende mṟasa Antiokyia.

²³Na oe, amshikye na iwona isaṟia lya Ruwa kachihiyo, katerewa wandu woose waoshane na Mndumii kui iiṙikyia lyiwukyie mrimenyi.

²⁴Kyipfa nawekyeri mndu mcha aichuo Mumuyo Mweele na iiṙikyia; wandu wafoi wakaengyeṟika ura lo Mndumii.

²⁵Numa ya iho kafuma kayenda Tariso indepfula Saulyi;

²⁶na amummbone kamwende na Antiokyia. Kyikawa ko kyiyeri kya maka umwi wakasanza hamwi na siṟi na ilosha wandu wafoi. Na wanalosho walelago Wakristiano lya kuwooka halya Antiokyia.

²⁷Mfiri iya iya weonguo shisuku walewuka Yerusalemu wakasoka na Antiokyia.

²⁸Na kyiyeri lulesanzia handu hamwi, umwi owo ekyelago Agabo kagoṟoka, kaloṟa kui wuiṙimi wo Mumuyo Mweele kye njaa ing'anyi yeecha mfiri ya kufuhi wuyanenyi koose; na njaa-yo ikacha kyiyeri Kyilaudio awewoṙe uruka.

²⁹Na wanalosho walya, orio mndu chandu awewoṙe, wakaiṙikyia iṙuo kyindo kyetarama wana wa wamawo kyiiṙi kya iiṙikyia wawekyekaa uruka lo Uyuda.

³⁰Wakawuta kuṙo, Barinaba na Saulyi wakaṙumo ko wameeku wa siṟi waṙuṙe kyindo kyilya wanalosho waleenengyia kyetarama woṙiawo.