Read Kivunjo New Testament 1999 Mawuto Ga Wasu 13 Bible Online

Mawuto Ga Wasu 13 - Kivunjo New Testament 1999 bible

Mawuto Ga Wasu 13

¹Na kulya siṟinyi ya Antiokyia kuwewoṙe weonguo shisuku na walosha, nawo nyi Barinaba, na Simion ekyelago Nikyeri, na Lukyio awukyie Kyirene, na Manaeni aweongyie wee lyimwi na Mangyi Herode, na Saulyi.

²Kyasia kyiyeri iwa waweiterewa Ruwa na ikuretekyia, Mumuyo Mweele kagamba, “Ngyisaangyienyi Barinaba na Saulyi ko iṟunda lyilya ngyilemulagia.”

³Naaho-ng'u wamkuretekyie na iterewa, wakawayekyia mawoko, wakawaṙuma.

⁴Kyasia wandu-wo, wamṙumo nyi Mumuyo Mweele, wakasoka na Seleukyia, na iwuka pfo wakaiṙa ipalyipalyinyi mṟasa Kyipiro.

⁵Na kyiyeri wawekyeri Salami wakaonguo Ṙeṙo lya Ruwa masinagoginyi ga Wayuda, nawo wawekyeri na Yohane cha mṟundi owo.

⁶Wamuiṙe kyiiṙi kya Kyipiro mṟasa Pafo, wakawona mndu umwi, msawi, moonguo shisuku o wongo, Myuda awekyelago Bar-Yesu.

⁷Mndu-chu nawekyeri hamwi na mchilyi Serikyio Paulo, mndu mṟango. Mchilyi-cho kalaga Barinaba na Saulyi wache na kokye, kakunda iicho Ṙeṙo lya Ruwa.

⁸Kyaindi Elyima, msawi ulya (kyipfa ikyo ny'kyo rina lyakye lyagamba), kagaluana nawo, akundi ilemba mchilyi ulya naṙe iiṙikyia Yesu.

⁹Kyaindi Saulyi ang'u Paulo, aichuo Mumuyo Mweele, kamwitukuya karii,

¹⁰kagamba, “Iyoe uwoṙe ngyeṟo na wuwicho woose, mana o Mokyiriinzi, mokyituwa o wusumganyi woose, okyeṙa igaluo wuloi wo Mndumii wuwe wongo?

¹¹Ruwa nechikukapa na ikuanduya; na iyoe nochipfa meso, ulewona kyindo kyoose.” Cha ilyi rundu lya meema lyikamwolokyia katenga-tenga na ipfula mndu mommbaṙa kuwoko na imsongoya.

¹²Naaho-ng'u mchilyi ulya, kyiyeri alewona shawutika, kaiṙikyia, echiṟiyio kyipfa kya malosho ga Mndumii.

¹³Numa ya iho Paulo na oṙoe wakawooka kyaro kya ipalyipalyinyi, wakawuka Pafo wakashika Perikye, urukyenyi lo Pamfilyia. Yohane kalekana nawo kawuya na Yerusalemu.

¹⁴Kyaindi wo wakawuka Perikye, walaiṙe-se ipalyipalyinyi, wakashika Antiokyia, mṟi o uruka lo Pisidia, wakaiṙa na sinagoginyi mfiri o onyonya, wakaṙamia.

¹⁵Numa ya isoma kyitumbuṟe kya uwawaso na kyitapu kya weonguo shisuku, wasongoru wa sinagogi wakaṙuma mndu kowo na iwawia, “Wana wa wama kyiiṙi kya iiṙikyia, kokooya muwoṙe ṙeṙo lyetarama wandu-wa, lyionguonyi.”

¹⁶Paulo kagoṟoka, kawatsinia, kagamba, “Nyoe wasoṟo wa Isiraelyi, na nyoe muowuye na ikunda Ruwa, aṙanyienyi.

¹⁷Ruwa o wandu wa Isiraelyi nalesambuṟa waku waṙu, kawaenenga mng'ano, kyiyeri wawekyekaa cha wayenu urukyenyi lo Misiri, na kui pfinya yakye kawawuta pfo, kawasongoya.

¹⁸Na kyiyeri kya maka makumi gaana kakarishia mkaṟo yawo ngyiwicho kulya nukyenyi ngyiumu suwaa ilawoṙe maa mṟinga.

¹⁹Na amrumatse masanga mfungaaṙe urukyenyi lo Kanaan kawaenenga uruka-lo luwe kyioṟa ko kyiyeri kya maka cha magana gaana na makumi gataanu;

²⁰numa ya iho kawaenenga wamangyi wookyia kacha kyiyeri kya Samolyi.

²¹Numa ya iho wakaterewa ienengo mowaṙa uruka. Ruwa kawaenenga Saulyi, mana o Kyishi, mndu o kyishari kya Benyamen, kyiyeri kya maka makumi gaana.

²²Na amwawute Saulyi, kasambuṟa Dawidi nawe mowaṙa uruka lowo, ulya alemṟingyishia, echigamba, ‘Ngawona Dawidi, mana o Yese, mndu achihiṟie ngoo yako, echiwuta shilya ngyikundi shoose.’

²³Kyisharinyi kya Dawidi Ruwa naleendie wandu wa Isiraelyi Mkyiṟa, Yesu, chandu alewika kyaasa.

²⁴Yohane aweiongoya wandu woose wa Isiraelyi mbonyi ngyicha tsa wupatiso wo iṙumbuya wunyamaṟi, kyiyeri oe Yesu alandeche.

²⁵Na Yohane kyiyeri aweimarisa iṟunda lyakye nalegamba, ‘Mokusaṟa inyi nyi wui? Inyi chi oe-pfo. Kyaindi kuicha umwi numa yako, ulya inyi ngyilawaṟi ituruchuo ukowa lo shiaṙu shakye.’ ”

²⁶“Wana wa wama wako, wana wa kyishari kya Abrahamu, na iwo wai konyu waowuye na ikunda Ruwa, Ṙeṙo lya wukyiṟo-wu lyaendo na koṙu nyi mndu Ruwa amṙumie.

²⁷Cha kyipfa walya wekyekaa Yerusalemu, na wasongoru wawo, kyipfa walalemmanya oe, maa imanya malosho ga weonguo shisuku gekyesomo orio mfiri o onyonya, walegaafutsia kui imwanduya.

²⁸Maa chandu walalewona kyimaṙuma kyemmbaaga wakaterewa Pilato nawoogo.

²⁹Na wammbute shoose shiweshigambe kye shechimmbutikyia, wakamsotsa halya msalabenyi, wakammbika kyilomenyi.

³⁰Kyaindi Ruwa kamṟutsa ko wapfu;

³¹mfiri ifoi kawono akyeri na walya walecha na oe iwuka Galyilaya mṟasa Yerusalemu, walya wulalu wekyemṟingyishia mbele ya wandu.

³²Na soe lokyemuongoya mbonyi ngyicha tsa kyaasa kyilya waku waṙu waleenengo,

³³kye Ruwa naleafutsia kyaasa-kyo ko wana waṙu, kui iṟutsa Yesu; chandu kyikyiṟeie Kyiimbonyi kya Kawi, ‘Iyoe nyi oe Mono-ko, inyi inu ngawa Awuyo.’ ”

³⁴“Lyingyi-se kye nalemṟutsa ko wapfu, kundu alapfe na ipuo. Nalegamba kuṙi, ‘Ngyemuenenga nyoe shindo shiele sha Dawidi shikyeri sha loi.’ ”

³⁵“Koikyo handu hengyi nagambie, ‘Ochilekyia mweele opfo napfe na ipuo-pfo;’ ”

³⁶“Cha kyipfa Dawidi naleṟundia Ruwa kyiyeri kyakye, naaho kapfa kaṟiko hamwi na waku wakye na mmbiu okye ukopuo;

³⁷indi ichu aleṟutso nyi Ruwa nalepfa indi alepuo-pfo.

³⁸Kyasia kyimanyikye konyu, wana wa wama wako, kye kui rina lya Yesu muongoyo mbonyi tsa ihooṟio wunyamaṟi.

³⁹Na kui oe orio momwiṙikyia nekyetalo kye namsumganyi shindonyi shoose alechiiṙima italo kye namsumganyi kui uwawaso lo Mose.

⁴⁰Kyasia, kuringyenyi mulachewutikyio mbonyi iya ilegambo shiṟeionyi sha weonguo shisuku,

⁴¹‘Aṙanyienyi, nyoe mokyemina kyilya Ruwa agambie, ṟiyionyi na ipfa cha kyipfa kyilya ngyiwuta inu nyi kyindo mulechikyiiṙikyia maa kyiyeri mndu amuongoya.’ ”

⁴²Na kyiyeri Paulo na Barinaba waweiwuka halya Sinagoginyi wakawaterewa waongoyo mbonyi-tso mfiri o kawi o onyonya.

⁴³Kyiyeri walya wawesanzie sinagoginyi walelekana, Wayuda na wandu wafoi waweowuye Ruwa na imkunda wakaoshana na Paulo na Barinaba waleṙeṙa nawo wechiwakarisha wakae isaṟienyi lya Ruwa mfiri yoose.

⁴⁴Na mfiri o kawi o onyonya, wandu wafoi iwuka mṟinyi koose, wakasanzia handu hamwi kundu waicho Ṙeṙo lya Ruwa.

⁴⁵Indi Wayuda, kyiyeri walewona wuingyi wo wandu, wakawoṙo wunyenyi, wakakangyila kyilya Paulo alekoagamba, wechigamba chi loi-pfo na ilahia.

⁴⁶Paulo na Barinaba wakaṙeṙa kui wukari, wakagamba, “Kyiwewaṟi Ṙeṙo lya Ruwa lyiongoyo konyu kuwooka; kyaindi kyipfa mulyitsindikyia kuleshi, na ikuicho mrimenyi konyu kye muwaṟi moo o mlungana-pfo, wulalu luyenda ko wandu walaiṙikyie Ruwa.

⁴⁷Cha kyipfa nyi wuṙo Mndumii aleluwia, echigamba, ‘Ngakuwika uwe ngyeela ya wandu walaichi Ruwa kundu wuyana woose wuwone wukyiṟo.’ ”

⁴⁸Kyiyeri wandu walaichi Ruwa waleicho isho wakachihiyo, wakang'anyisa Ṙeṙo lya Ruwa na walya wawewaṟeyeṟie moo o mlungana wakaiṙikyia.

⁴⁹Ṙeṙo lya Ruwa lyikaṙunganana kulya urukyenyi koose.

⁵⁰Kyaindi Wayuda wakaamtsa shiloyano kyiiṙi kya waka waowuye na ikunda Ruwa, waka wawoṙe rina na wasoṟo wawoṙe kyiṟumi, wakawanzia wandu wakape Paulo na Barinaba; wakawamichia nja ya uruka lulya lowo.

⁵¹Nawo wakaambutsa kyilulyi maṙendenyi gawo, wakayenda mṟinyi okyelago Ikonio.

⁵²Na wanalosho waleichuo sia na Mumuyo Mweele.