Read Kivunjo New Testament 1999 Mawuto Ga Wasu 14 Bible Online

Mawuto Ga Wasu 14 - Kivunjo New Testament 1999 bible

Mawuto Ga Wasu 14

¹Kyiyeri wawei kulya Ikonio wakaiṙa na sinagoginyi lya Wayuda; na chandu waleonguo mbonyi, Wayuda na Wakyiṟikyi wafoi wakaiṙikyia Yesu.

²Kyaindi Wayuda walelega iiṙikyia Yesu wakawutia wandu walaweiṙikyie Yesu shindo sha kyinyala na ienenga walya waweiṙikyie Yesu ipfuluko mrimenyi.

³Kyasia wakakaa pfo kyiyeri kyileshi, wechiṙeṙa kulawoṙe wuowu mbonyi tsa Mndumii, aleṟingyishia Ṙeṙo lya isaṟia lyakye, echiwasaṟia ṟigo na shindo sha maṟiyisho shiwutikye kui shilya aweiwuta.

⁴Kyaindi wandu wa kulya mṟinyi walawaṙe makusaṟo gamwi. Iwa wakakaa ura lo Wayuda, na wengyi ura lo Wasu.

⁵Na kyiyeri wandu waata walaweiṙikyie Yesu na Wayuda, hamwi na wasongoru wawo waleṙumbuo iwawutia shindo sha kyinyala na iwakapa na magoe,

⁶nawo wakamanya mbonyi-tso, waleṙicha wakayenda Lyistira na Deribe, mṟi ya Lyikaonia, na ngyuuruka tsa mṟasenyi;

⁷wakakaa pfo, wechionguo Ndumi Ngyicha.

⁸Na kulya Lyistira kuwewoṙe mndu umwi, mfiri maṙende, awei kyiwete wookyia kyiyeri alefeo, alawendechumie maa ale.

⁹Mndu-cho naleicho Paulo kyiyeri aweilosha. Paulo kamwitukuya karii na iwona kye nawoṙe iiṙikyia lya ikyiṟo,

¹⁰kagamba na ṟui lying'anyi, “Goṟoka necha kui maṙende gapfo.” Mndu ulya kagoṟoka faṟa kayenda.

¹¹Na kyiyeri wuingyi wo wandu walewona kyindo Paulo awuta wakakuilenga na ṟui lying'anyi, wechigamba kui mṙeṙie o Kyilyikaonia, “Waruwa wacha na koṙu wakyeri cha wandu.”

¹²Wakalaga Barinaba Seu na Paulo Herime, cha kyipfa nyi oe aweiṙeṙa.

¹³Mkohanyi o Seu, ulya hekalu lyakye lyiwekyeri mbele ya mṟi, kaende umbe na oṟo tsa shiwaṟo mṟasa kyichuminyi, akundi ienengyia kyiṙaso hamwi na wuingyi wo wandu wuwekyeri halya.

¹⁴Kyaindi kyiyeri Barinaba na Paulo walemanya mbonyi-tsi wakaranduo nguwo tsawo, wakayenda weṙicha wakakulunga na wuingyi wulya wo wandu, wakakalagatsa,

¹⁵wechigamba, “Lanyoe, ny'kyilyi muiwuta ishi? Soe lukyeri wandu cha nyoe. Lumuongoya mbonyi ngyicha, kundu mugalukye na iṙa shindo sha wuwicho na iyenda ko Ruwa ai na moo, alegumba ruwewu na uruka na mapalyipalyi na shoose shikyeri pfo.

¹⁶Ulya nyoe kyiyeri kya kacha kyileiṙa aleṙa masanga goose gawute chandu gakundi.

¹⁷Kyaindi aleṙa imuṟingyishia-pfo, cha kyipfa nalewuta shindo shicha, echimuenenga mvuo iwuka ruwewu na kyiyeri kya shilyimu, echiigutsa mrima yanyu shelya na sia.”

¹⁸Maa chandu wasu walegamba isho, waleiṙima ishingyia wandu walya walaweiṙikyie Yesu iwaenenga shiṙaso-pfo.

¹⁹Kyaindi Wayuda wakacha wawuka Antiokyia na Ikonio, wakawanzia wuingyi wo wandu wawesanzie halya wakakapa Paulo na magoe, wakamkuruya nja ya mṟi, wakusaṟie kye ampfa.

²⁰Kyaindi kyiyeri wanalosho wawemwiṟiwie, kagoṟoka, kaiṙa na mṟinyi; na ilya-ngama kafuma, kayenda mṟasa Deribe waṙuṙanyi na Barinaba.

²¹Na wamuonguo Ndumi Ngyicha kulya mṟinyi, na igaluo wandu wafoi wakawa wanalosho, wakawuya mṟasa Lyistira na Ikonio na Antiokyia,

²²wechikarisha mrima ya wanalosho na iwawia wakae kyiiṙi kya Iiṙikyia lyilya, na kye kyiluwaṟi iiṙa na Wumangyinyi wo Ruwa kui njia ya matuuro gafoi.

²³Na wamsambuṟe wameeku wa siṟi kulya siṟinyi, na iterewa hamwi na ikuretekyia, wakawawika mawokonyi ga Ruwa ulya wawemwiṙikyie.

²⁴Wakaiṙia Pisidia wakashika Pamfilyia.

²⁵Na numa ya ionguo Ṙeṙo lya Ruwa kulya Perikye wakayenda mṟasa Atalyia.

²⁶Na iwuka kulya Atalyia wakawuya na Antiokyia weiṙia ipalyipalyinyi. Kulya Antiokyia nyipfo waleterewio isaṟia lya Ruwa kui iṟunda lyilya walekowamlyimarisa.

²⁷Kyiyeri waleshika kulya Antiokyia walewia wandu wa siṟi wasanzie handu hamwi, wakawaongoya shindo shoose Ruwa aleshiwuta hamwi nawo, na kye Ruwa nalepfunguya moongo o iiṙikyia wandu walaweiṙikyie Yesu.

²⁸Wakakaa kulya Antiokyia kyiyeri kyileshi, hamwi na wanalosho.