Read Kivunjo New Testament 1999 Mawuto Ga Wasu 15 Bible Online

Mawuto Ga Wasu 15 - Kivunjo New Testament 1999 bible

Mawuto Ga Wasu 15

¹Kukocha wandu wawukyie uruka lo Uyuda wakalosha walya waweiṙikyie Yesu, wechigamba, “Mulandeṙino chandu kyikyeri muichiwie o Mose mochiiṙima ikyiṟo-pfo.”

²Kyasia numa ya Paulo na Barinaba iwingana na wandu-wa na igaluana nawo mnu, wandu walya waweiṙikyie Yesu wakagamba kye Paulo na Barinaba na wandu wengyi waangu waṙo iyenda Yerusalemu ko wasu na wameeku wa siṟi kyipfa kya mbonyi-tso tsa iṙino.

³Kyasia, wawaṙume nyi siṟi, wakaiṙia uruka lo Foinikye na Samaria, wechionguo mbonyi tsa chandu wandu walaiṙikyie Yesu walemwiṙikyia; wakachihiṟa mnu walya waweiṙikyie Yesu.

⁴Kyiyeri waleshika Yerusalemu wakaambilyio nyi siṟi na wasu na wameeku wa siṟi, nawo wakawaongoya shindo shoose Ruwa alewuta hamwi nawo.

⁵Kyaindi wandu waata wawekyeri miiṙikyienyi ya Mafarisayo waweiṙikyie wakagoṟoka, wechigamba, “Kyiwaṟi iwaṙina na iwawia waoshe uwawaso lo Mose!”

⁶Wasu na wameeku wa siṟi wakasanzia handu hamwi kundu waiṙime ikusaṟa kya mbonyi-tsi.

⁷Na numa ya wandu wafong'ui igamba kyilya wawekusaṟie Petiro kagoṟoka, kawawia, “Wana wa wama, nyoe muichi kye wookyia mfiri ya ipfo numa Ruwa nalengyisambuṟa kyiiṙi kyanyu kundu ngyiongoye wandu walaiṙikyie Yesu Ṙeṙo lya Ruwa na ilyiiṙikyia.

⁸Na Ruwa, aichi mrima ya wandu, kamṟingyishia, echimuenenga nyoe Mumuyo Mweele chandu aleluenenga soe.

⁹Maa aleluwutia soe kyindo kyilafananyi na kyilya alewawutia-pfo, echiwailyisha mrima yawo kui iiṙikyia.

¹⁰Kyasia wulalu ny'kyilyi muiyesha Ruwa na iṙika wanalosho ṟio lyilemeri, ṟio waku waṙu maa soe lulaiṙima ilyiṙuo?

¹¹Indi luiṙikyie kye lochikyia kui isaṟia lya Mndumii Yesu cha wo.”

¹²Kyasia wandu walya woose wawesanzie halya wakatsia tsii, wakaaṙanyia Barinaba na Paulo wechiwaongoya mbonyi tsa ṟigo na shindo sha maṟiyisho, Ruwa alewuta kui ulogo kyiiṙi kya walya walaweiṙikyie Yesu.

¹³Na iwo wamtsie Yakobo kagaluo, echigamba, “Wana wa wama wako ngyiaṙanyienyi,

¹⁴Simion naluongoya chandu Ruwa ipfo mawookyionyi aleloṟa chandu ekyeembeṟa wandu walaiṙikyie Yesu kundu nasambuṟe wandu kyiiṙi kyawo kyipfa kya rina lyakye.

¹⁵Na maṙeṙo ga weonguo shisuku gaṙuana na isho, chandu kyikyiṟeie,

¹⁶‘Numa ya shindo-sho ngyechiwuya na inyi ngyechiwika-se numba ya Dawidi ileoloka. Ngyechiiwuta kyiiṙi kya ioloka lyayo, na inyi ngyechiigoṟotsa.

¹⁷Kundu wandu waṙio ho wapfule Mndumii, na masanga goose galeongoyo mbonyi tsako,

¹⁸Ruwa nagamba, ekyeonguo mbonyi-tsi mṟasa mlungana.’ ”

¹⁹“Kyipfa kya ikyo inyi ngaṙumbuo kuṙi, lulalyise wukyiwa wandu walya walaiṙikyie Yesu kyiyeri waigalukyia Ruwa.

²⁰Indi luwaṟeie paruo kye wakushowe na ukoe lo mafano, na wuṟui, na nyama tsa mando gapfa kui ipfumbo, na samu.

²¹Cha kyipfa wookyia kacha Mawawaso ga Mose gekyelosho orio mṟi na isomo masinagoginyi orio mfiri o onyonya.”

²²Kyasia kyikachihiṟa wasu na wameeku wa siṟi yoose isambuṟa wandu kyiiṙi kyawo na iwaṙika Antiokyia hamwi na Paulo na Barinaba, nawo nyi iwa: Yuda awekyelago Barisaba, na Sila, wawekyeri wasongoru kyiiṙi kya walya waweiṙikyie Yesu. Wakaṟeia paruo na iiṙuo kui mawoko gawo wawenyi. Paruo-yo ilegamba kuṙi:

²³“Soe wasu na wandu waku waiṙikyie Yesu, ko wana wa wamaṙu wakyeri Antiokyia na Shamu, na Kyilyikyia, wai wandu walaiṙikyie Yesu; lomuiṟikyiṟa.

²⁴Cha kyipfa luleicho kye wandu walewuka koṙu walemulyisa wukyiwa kui maṙeṙo gawo, wechiṙetsa mrima yanyu, wandu soe lulalewaṙuma.

²⁵Soe lowona nyi kyicha, lukyeri kyindo kyimwi, isambuṟa wandu na iwaṙika konyu hamwi na wakunde waṙu Barinaba na Paulo,

²⁶wandu walereka moo yawo kyipfa kya rina lya Mndumii oṙu Yesu Kristo.

²⁷Kyasia loṙuma Yuda na Sila, wechimuongoya mbonyi-tso itso.

²⁸Cha kyipfa kyilechihiṟa Mumuyo Mweele na soe, lulamuṙikye nyoe ṟio mulawaṟi iṙiko,

²⁹kyimwi na immbia mukushowe na shindo shoose shileṙasio mafano, na samu, na nyama tsa mando gapfa kui ipfumbo, na wuṟui. Mukowuta kuṙo, mowuta necha. Lomukundia orio kyindo kyicha.”

³⁰Na iwo wamuenengo momu wakasoka na Antiokyia; na numa ya iwia wandu woose wasanzie handu hamwi wakawaenengyia paruo iya.

³¹Nawo wamuisome wakachihiyo kyipfa kya iwiyiṟio moo lyilya.

³²Lyingyi-se Yuda na Sila, cha kyipfa wo nyi weonguo shisuku, wakaongoya walya waweiṙikyie Yesu shindo shifoi shewakarisha.

³³Na wamkae pfo kyiyeri kyileshi taa, walya waweiṙikyie Yesu wakawaenenga momu wayende na ufoṟo, wawuye na ko walya walewaṙuma.

³⁴Kyaindi Sila kawona nyi kyicha ikaa pfo.

³⁵Na Paulo na Barinaba wakakaa kulya Antiokyia, wechilosha na ionguo Ṙeṙo lya Mndumii, hamwi na wandu wengyi wafoi.

³⁶Hamwiṙe mfiri ngyaangu Paulo kawia Barinaba, “Luwuye wulalu lundeambuya walya waiṙikyie Yesu kulya mṟinyi luleonguo Ṙeṙo lya Mndumii, lumanye mbonyi tsawo.”

³⁷Barinaba kakunda Yohane awekyelago Mariko nayende hamwi nawo.

³⁸Indi Paulo alewona nyi kyicha iyenda na icho walemṙa kulya Pamfilyia-pfo, kyipfa alalekunda ioshana nawo mṟasa mafurumionyi.

³⁹Kyasia hakaamka igaluana kyiiṙi kyawo mṟasa wakalekana. Barinaba kaṙuo Mariko, wakaiṙia ipalyipalyinyi iyenda Kyipiro.

⁴⁰Kyaindi Paulo kasambuṟa Sila, kafuma, walya waweiṙikyie Yesu wechimterewia, naenengo isaṟia lya Mndumii.

⁴¹Kaiṙia Shamu na Kyilyikyia, echikarisha siṟi.