Read Kivunjo New Testament 1999 Mawuto Ga Wasu 16 Bible Online

Mawuto Ga Wasu 16 - Kivunjo New Testament 1999 bible

Mawuto Ga Wasu 16

¹Kyasia kashika Deribe na Lyistira, na iho hawewoṙe manalosho umwi ekyelago Timoteo, mana o Mndu mka Myuda aweiṙikyie Yesu; kyaindi awuye nawekyeri Mkyiṟikyi.

²Mndu-cho naleṟingyishio wucha na wandu waweiṙikyie Yesu wawekyekaa Lyistira na Ikonio.

³Paulo kawia Timoteo naoshane na oe, kamṙuo kamṙina kyipfa kya Wayuda wawekyeri ngyuura tsilya; cha kyipfa woose waweichi kye awuye nyi Mkyiṟikyi.

⁴Kyasia kyiyeri waweiiṙa kyiiṙi kya mṟi iya, wakawaenenga mawawaso galya galewuka ko wasu na wameeku wa siṟi wakyeri Yerusalemu, kundu wagaoshe.

⁵Siṟi tsikawaṙa pfinya kyiiṙi kya Iiṙikyia lyilya, wandu waiṙikyie Yesu wakaengyeṟika orio mfiri.

⁶Wakaiṙa urukyenyi lo Firikyia na Galatia, wechiimo nyi Mumuyo Mweele, walaonguo Ṙeṙo lya Ruwa kulya Asia.

⁷Kyiyeri waleshika mṟasenyi na Misia, wakatambagana iyenda Bitinia, kyaindi Mumuyo o Yesu alawaenengye momu.

⁸Wakaiṙa Misinia wakasoka na Tiroa.

⁹Kyiyeri kya kyio Paulo kaloṟo kyindo kyilandewono, akyeri cha mndu ailoṙo. Nalewona mndu awukyie Makyedonia agoṟokyi, echimterewa, na immbia, “Ambaṙa, uche na Makyedonia ulutarame.”

¹⁰Kyasia amloṟo kyindo-kyo, cha ilyi lukokunda iyenda Makyedonia, cha kyipfa lulewona na pata kye Ruwa nalulagie luwaongoye Mbonyi Ngyicha.

¹¹Lukyeri ngalawenyi lukowuka Tiroa, lukoshika Samotirakye, na ilya-ngama lukoshika Neapolyi;

¹²na iwuka pfo lukoshika Filyipi, mṟi ung'anyi o Makyedonia, handu Waroma walekowasamia; lukokaa kyiiṙi kya mṟi-chu mfiri ngyaangu.

¹³Na mfiri o onyonya lukoyenda nja ya mṟi, lukoyenda mbai ya mfo, handu lulekusaṟa kye hai hecha hewika kyiterewo; lukoṙamia, lukoṙeṙa na waka wawesanzie halya.

¹⁴Mndu mka umwi ekyelago Lyidia, ekyekumba ṟangyi ya kyimaande-maande, mndu awukyie Tiatira, aowuye na ikunda Ruwa, kaluaṙanyia, ulya Mndumii alemwenenga imanya mrimenyi kokye, naambilyie na iiṙikyia malosho ga Paulo.

¹⁵Na ampatiso, oe na walya wa kanyi kokye, kaluterewa, echigamba, “Kokooya mowona ngyiiṙikyie Ruwa, iṙenyi na kanyi koko mukae pfo. Kawatsindika wawute kuṙo.”

¹⁶Kyiyeri luweiyenda handu heterewa Ruwa, kyisinga kyimwi kyiwewoṙo nyi mṟufui o ilasha kyikakarisana na soe, kyisinga kyileendie wandumii wakyo kyiira kying'anyi kui iṟunda lya ilasha.

¹⁷Kyikaosha Paulo na soe, kyikakalagatsa, kyechigamba, “Wandu-wa nyi waṟundi wa Ruwa, wekyemuongoya mbonyi tsa wukyiṟo.”

¹⁸Kyikawuta isho mfiri ifoi. Kyaindi Paulo kawihiyo mnu, kainduka kawia mṟufui ulya mmbicho, “Ngakuwia kui rina lya Yesu wuka mndu-chu.” Kammbuka kyiyeri kyilya kyilya.

¹⁹Kyasia wandumii wa kyisinga kyilya kyiyeri walewona kyiira kyawo kyeṙeka wakawaṙa Paulo na Sila wakawakuruo mṟasa sangaṙa mbele ya wandu wa mṟi.

²⁰Wakawaṙuo ko weṙumbuo moondu, wakagamba, “Wandu-wa waifanyiṟa mnu mṟi oṙu, nawo nyi Wayuda.

²¹Lyingyi-se waionguo mbonyi tsa miichiwie ilakyeri sungusinyi koṙu iiambilyia maa iiosha, cha kyipfa soe nyi Waroma.”

²²Wuingyi woose wo wandu wawekyeri halya wakafuma wakayenda halya-ndu Paulo na Sila wawekyeri, weṙumbuo moondu wakawawuta nguwo ko pfinya, wakagamba wakapo na ngowa.

²³Na wamuwakape mnu, wakawawiyitsa kyipfungonyi, wakawia mringyi o numba iya yepfungyia wandu nawaringye mnu.

²⁴Na mringyi ulya amwicho kyilya alewio kawawika kyiṟinyi kya makyiṙi-gawi, kapfungyia maṙende gawo matsindenyi.

²⁵Kyaindi kyiyeri kya kyio kya mayeleyele Paulo na Sila waweiterewa Ruwa na imwimbia shiimbo sha imṟumisha, na wandu wengyi wawewawikye kulya kyipfungonyi waweiwaaṙanyia.

²⁶Cha ilyi kukowaṙa mṙeṙemo ung'anyi o uruka, numba iya ikakupaaya-paya yoose, na kyiyeri kyilya kyilya moongo ikaṟuguka, na shindo shiwepfungyie walya wawei kulya kyipfungonyi shikalekyia.

²⁷Mringyi ulya o numba yepfungyia wandu kaamka, na oe kyiyeri alewona kye moongo iṟugukyie, kaira ushu kundu nakuwaage, akusaṟie kye walya wawewawikye kyipfungonyi waṙicha.

²⁸Indi Paulo kaṙeṙa na ṟui lying'anyi, echigamba, “Ulakuwaage, cha kyipfa soe loose lukyeri iha.”

²⁹Kagamba taa tsiendo, kashoongyia numba, echiṙeṙema kui wuowu, kaolokyia Paulo na Sila.

³⁰Numa ya iho kawafumiṟia nja, kagamba, “Wandumii wako, kyingyiwaṟi ngyiwute kyikyi ngyiiṙime ikyia?”

³¹Wakammbia, “Iṙikyia Mndumii Yesu, na iyoe nochikyia hamwi na wandu wa kanyi kopfo.”

³²Wakamwongoya Ṙeṙo lya Mndumii, oe na wandu woose wawekyeri kanyi kokye.

³³Kyio kyilya kyilya kawaambilyia kanyi kokye, kawasanja shifaṟa shawo, numa kapatiso, oe na wandu wakye woose kyiyeri kyilya kyilya.

³⁴Kawaitsa na kanyi kokye, kawaenenga kyelya, kachihiyo mnu, oe na wandu wa kanyi kokye woose, kyipfa nalekoamwiṙikyia Ruwa.

³⁵Kyiyeri kulekya weṙumbuo moondu wakaṙuma wasongoru wa asikari, wechigamba, “Lekyenyi wandu walya wayende.”

³⁶Mringyi ulya o numba iya yepfungyia wandu kawia Paulo mbonyi-tsi echigamba, “Weṙumbuo moondu waṙuma wandu kundu wampfunguo; kyasia wulalu fumienyi nja, muyende kui ufoṟo.”

³⁷Paulo kammbia, “Walukapa mbele ya wandu woose kulawoṙe iluanduya, na soe lui Waroma, lyingyi-se waluwika kyipfungonyi; na wulalu wakundi iluwuta pfo kui kyiṟika? Chi wuṙo maa ale-pfo. Wache wo wawenyi wacheluwuta pfo.”

³⁸Wasongoru wa asikari wakaongoya weṙumbuo moondu mbonyi-tsi; nawo wakaowuo, kyiyeri waleicho kye iwo nyi Waroma.

³⁹Wakacha wakawaterewa; na wamuwafumiṟie nja, wakawaterewa wawukye kulya mṟinyi.

⁴⁰Nawo wakawuka kyipfungonyi, wakaiṙa na kanyi ko Lyidia; na wammbonane na wandu walya waweiṙikyie Yesu wakawawiyiṟia moo, wakawuka kulya.