Read Kivunjo New Testament 1999 Mawuto Ga Wasu 17 Bible Online

Mawuto Ga Wasu 17 - Kivunjo New Testament 1999 bible

Mawuto Ga Wasu 17

¹Wamuiṙe mṟinyi ya Amfipolyi na Apolonia wakashika Tesalonikye, handu hawewoṙe sinagogi lya Wayuda.

²Na Paulo chandu kyiwekyeri kyiṙo kyakye, kaiṙa na halya-ndu wawekyeri, na kyiyeri kya mfiri iṟaṙu yeonyonya kagaluana nawo, echitambuluo shiṟeio shiele,

³echiwawia kye kyiwewaṟi Kristo ilyiso wukyiwa, na iṟuka ko wapfu; na kye Yesu ulya Paulo aweiwaongoya mbonyi tsakye nyi oe Kristo.

⁴Wandu wengyi kyiiṙi kya Wayuda walya wakaiṙikyia, wakaoshana na Paulo na Sila; na Wakyiṟikyi waweiṙikyie Ruwa, wafoi mnu hamwi na waka wawoṙe rina.

⁵Na Wayuda wakawoṙo nyi wunyenyi, wakasania wandu wa mbocha, wakaende kyituṟu mṟinyi. Wakayenda ko wandu wa kanyi ko Yason, wakakunda iwaṙuo mbele ya wandu wa mṟi.

⁶Na kyiyeri walalewakooya kanyi, wakakuruo Yason na wandu waata wa walya waweiṙikyie Yesu, wakawaṙuo mbele ya wasongoru wa mṟi, wechikalagatsa, wechigamba, “Wandu-wa waipfuluo-pfuluo wuyana washika na kunu taa,

⁷na Yason nawaambilyia kanyi kokye; na iwa woose waiwuta shindo shilaṙuṙanyi na mawawaso ga Kaisari, wechigamba kye kuwoṙe mangyi ungyi ekyelago Yesu.”

⁸Wakaowesha wandu walya wawesanzie halya na wasongoru wa mṟi kyiyeri waleicho mbonyi-tsi.

⁹Nawo wamtose Yason na oṙoe wakawaleka wakayenda.

¹⁰Cha ilyi wandu walya waweiṙikyie Yesu wakaṙuma Paulo na Sila kyiyeri kya kyio, wakayenda mṟasa Beroya. Nawo kyiyeri waleshika pfo wakaiṙa na Sinagoginyi lya Wayuda.

¹¹Wandu-wa wawewoṙe ngaruo cha walya wa Tesalonikye-pfo, cha kyipfa waleambilyia ndumo iya kui mrima mkyesi, wakakulosha shiṟeio shiele orio mfiri, kundu wamanye kokooya mbonyi na wuṙo tsikyeri chandu Paulo alewawia.

¹²Kyasia wandu wafoi kyiiṙi kyawo wakaiṙikyia, na waka wa kyikyiṟikyi wawoṙe rina, na wasoṟo waangu.

¹³Kyaindi kyiyeri Wayuda wa Tesalonikye waleicho kye Paulo naonguo Ṙeṙo lya Ruwa maa kulya Beroya, wakayenda pfo, wakafoga-foga na iowesha wuingyi wo wandu wawesanzie pfo.

¹⁴Kyiyeri kyilya kyilya walya waiṙikyie Yesu wakaṙuma Paulo nayende mṟasa mbai ya ipalyipalyi; indi Sila na Timoteo wakaṙio kulya Beroya.

¹⁵Kyaindi walya waleimia Paulo wakayenda na oe mṟasa Atene; nawo wamuambilyie mawawaso geṙuo ko Sila na Timoteo, kye walakyelyio imwosha, wakalekana na Paulo.

¹⁶Kyiyeri Paulo aweiwaweṙelyia kulya Atene na iwona chandu mri-cho uweichuo mafano, nalewihiyo mnu mrimenyi kokye.

¹⁷Kyasia sinagoginyi kagaluana na Wayuda na walya waweiṙikyie Ruwa, na walya walegaluana na oe sangaṙa orio mfiri.

¹⁸Na wandu waata wawekyelosha malosho ga Waepikureo na Wastoiko, wakagaluana na oe. Wengyi wakagamba, “Tondo-lyi lyikundi igamba kyi?” Wengyi wakagamba, “Nai cha mndu aionguo mbonyi tsa waruwa wengyi, cha kyipfa naweionguo mbonyi tsa Yesu na iṟutso lya wapfu.”

¹⁹Wakammbaṙa, wakamṙuo Areopago, wechigamba “Ngyesa loiṙima imanya mbonyi-tsi ngyiyenu uilosha tsagamba kyi?

²⁰Cha kyipfa nuiluendie shindo shiyenu, na lukundi imanya shindo-shi shagamba kyi.”

²¹Cha kyipfa wandu wa Atene na wayenu wawekyekaa pfo wawewoṙe kyiyeri kyeaṙanyia kyindo kyoose kyiyenu-pfo.

²²Paulo kagoṟoka makyiṙi-gawi ga Areopago, kagamba, “Nyoe wandu wa Atene! Kyiiṙi kya mbonyi-tsi ngyiwonyi kye nyoe nyi wandu mokyekuwinisha mnu na mbonyi tsa waruwa…

²³Cha kyipfa kyiyeri ngyiweiiṙa ipfo na ipfo na iwona kundu mokyeterewa waruwa, ngyilewona alyitaṟe ingyiṟeie: ‘KO RUWA LULAMWICHI’ Kyasia inyi ngyimuongoya mbonyi tsa ulya nyoe mokyemwindia kulawoṙe immanya.

²⁴“Ruwa nalegumba wuyana na shindo shoose shikyeri-pfo. Oe, cha kyipfa nyi Mndumii o ruwewu na uruka, ekyekaa mahekalunyi gamawikye kui mawoko;

²⁵maa ekyeṟundio kui mawoko ga wandu cha ilyi nauṟie kyindo kyoose-pfo; cha kyipfa nyi oe ekyeenenga wandu woose moo na mṟufui na shindo shoose.

²⁶Na oe iwuka mndu umwi nalegumba mbaṟe tsa wandu tsoose, wakae urukyenyi koose. Oe amonyi wookyia mawookyionyi kawawikyia kyiyeri kyileiṙima iilacho kyekaa kunu wuyanenyi, na iwaloṟa nyi ura luha lochiwa kanyi kowo.

²⁷Kundu wapfule Ruwa, maa kokooya nyi kui ipaaya-paya cha shipfupfuṟe, wammbone, maa chandu alekyekaa kuleshi na soe.

²⁸Cha kyipfa kui pfinya ya Ruwa lokyeenengo moo na ichumia, lukowa chandu lukyeri. Chandu wandu waata kyiiṙi kyanyu wekyeṟeia mashairi walegamba, ‘Cha kyipfa soe nyi wana wa Ruwa.’

²⁹Kyasia, cha kyipfa soe lukyeri wana wa Ruwa, kyiluwaṟi ikusaṟa kye iwa cha Ruwa nyi kyindo kyikyeri cha sahapu ang'u igoe, shindo shishiachikyie kui wuiṙimi na ngyuuṟango tsa wandu-pfo.

³⁰“Kyasia, kyiyeri kyilya kya kacha kya wutondo Ruwa nalewa cha ilyi alawonyi; indi wulalu naiwia wandu woose wa orio handu waṙumbuye wunyamaṟi.

³¹Cha kyipfa nawikyie mfiri echianduya wandu woose kunu wuyanenyi kulawoṙe ikundia; na echianduya wandu-wo nyi ulya Ruwa amsambuṟie. Na Ruwa naloṟie wandu woose kye nechiwuta kuṙo, kui imṟutsa ko wapfu.”

³²Kyasia kyiyeri waleicho mbonyi tsa iṟutso lya wapfu wengyi wakanyeṟe; na wengyi wakagamba, “Lochikuaṙanyia-se lyingyi.”

³³Kyasia Paulo kalekana nawo.

³⁴Wandu waata wakawaṙana na oe, wakaiṙikyia Yesu. Kyiiṙi kyawo nyi-we Dionisio, mndu awukyie Areopago, na mndu mka umwi ekyelago Damari, na wandu wengyi hamwi nawo.