Read Kivunjo New Testament 1999 Mawuto Ga Wasu 2 Bible Online

Mawuto Ga Wasu 2 - Kivunjo New Testament 1999 bible

Mawuto Ga Wasu 2

¹Na kyiyeri mfiri o Pentekoste uleafukyia wawekyeri woose handu hamwi.

²Cha ilyi iwuka ruwewu kukocha ndiṟimo cha ndiṟimo tsa mkuma o pfinya, ukoichuṟa numba iya yoose waweṙamie.

³Kukowaṙa ngyuulumi tsilekanyi-lekanyi, cha ngyuulumi tsa moṙo ukokaa mṙoenyi ko orio mndu awekyeri halya.

⁴Woose wakaichuṟo nyi Mumuyo Mweele, wakawooka iṙeṙa kui mṙeṙie ingyi, chandu Mumuyo alewaenenga wuiṙimi.

⁵Na kuwewoṙe Wayuda wawekyekaa Yerusalemu, wandu waiṙikyie na iowuo Ruwa, wandu wawukyie orio isanga lya kunu wuyanenyi.

⁶Kyasia kyiyeri wuingyi wo wandu wawesanzie halya waleicho ndiṟimo tsilya, wakawoṙo nyi wuowu, cha kyipfa orio umwi naleicho weṙeṙa kui mṙeṙie okye.

⁷Wakaṟiyio woose, wakawiana, “Lanyoe-ko, iwa woose waiṙeṙa chi wandu wa Galyilaya-pfoe?

⁸Kyawa kuṙa soe iicho orio mndu mṙeṙie yaṙu lulefeo nayo?

⁹Wapariti na Wamedi na Waelami, na walya wekyekaa Mesopotamia, Uyuda na Kapadokyia, Ponto na Asia,

¹⁰Firikyia na Pamfilyia, Misiri na ngyuura tsa Lyibia kufuhi na Kyirene, na wayenu wawukyie Roma, Wayuda na walya wekyeindia Ruwa,

¹¹Wakyirete na Waarabu; luichuoe iwa wechionguo kui mṙeṙie yaṙu mawuto gang'anyi ga Ruwa.”

¹²Wakaṟiyio woose, wakawoṙo nyi iwuṟa iiṙikyia, wakawiana, “Shindo-shi shaloṟa kyi?”

¹³Wengyi wakanyeṟe, wechigamba “Wawananzi.”

¹⁴Kyaindi Petiro kagoṟoka hamwi na wanalosho walya ikumi na umwi, kakuilenga na ṟui lying'anyi, kawawia, “Nyoe wandu wa uruka lo Uyuda, na nyoe moose mokyekaa Yerusalemu, manyenyi mbonyi-tsi muaṙanyie maṙeṙo gako.

¹⁵Chandu mukusaṟie chi wuṙo-pfo. Wandu-wa wawananzi-pfo, cha kyipfa nyi saa tsiṟaaṟu tsa kyingoto tikyi;

¹⁶kyaindi mbonyi-tsi nyi tsilya tsilegambo nyi moonguo shisuku Yoelyi,

¹⁷‘Mfiri yefurumia, Ruwa nagamba ngyechipusia wandu woose Mumuyo oko, na wana wanyu wa kyisoṟo na wa kyika wechionguo shisuku; na wanakye wanyu wechiwona shindo shilandeafukyie; na wandu waku wechiloṙo.

¹⁸Yee, na mfiri-yo ngyechipusia waṟundi wako wa kyisoṟo na wa kyika Mumuyo oko, nawo wechionguo shisuku.

¹⁹Na inyi ngyechiloṟa ṟigo wuye ruwewu, na shindo sheṟiyisha wuyanenyi, samu na moṙo, na ipuchi lya mtsu ufoi.

²⁰Mnengyeṟi ochiwa meema, na mori ochiwa samu, mfiri ulya o Mndumii ulacha, mfiri ung'anyi uichio na pata.

²¹Na orio mndu echipfula Mndumii Ruwa nechikyiṟo.’ ”

²²“Nyoe wasoṟo wa Isiraelyi, aṙanyienyi mbonyi-tsi: Yesu awukyie Nasareti, mndu Ruwa alemloṟa konyu kui ṟigo na shindo sheṟiyisha, Ruwa aletsiwuta amonyi, chandu nyoe muichi.

²³Mndu-chu aleṙiko wuyanenyi chandu Ruwa alekunda amonyi, na chandu Ruwa aweṟeyeṟie wookyia kacha, kamṙambika konyu, nyoe mukomkapia msalabenyi, mukombaaga.

²⁴Ulya Ruwa alemṟutsa, kammbuta wukyiwenyi wo ipfa, cha kyipfa kyileiṙimika wukyiwa-wo wumpaaye-pfo.

²⁵Kyipfa Dawidi naonguo mbonyi tsakye, ‘Ngyilewona Mndumii mbele yako mfiri yoose cha kyipfa nakyeri ura loko lo kulyoe ngyilasunzukye.

²⁶Koikyo mrima oko ulechihiyo ulumi loko lukochihiyo; lyingyi-se mmbiu oko ukoweṙelyia.

²⁷Cha kyipfa echiṙa mrima oko ko wapfu-pfo; maa echiṙa mndu okye msimiri napuye kyilomenyi-pfo.

²⁸Nulengyiloṟa njia tsiendie moonyi o mlungana.’ ”

²⁹“Wasoṟo, wana wa wama wako, maa mulangyisuuye, ngyionguo mbele yanyu kulawoṙe wuowu mbonyi tsa awu oṙu, Dawidi, kye nalepfa kaṟiko, na kyilome kyakye kyikyeri koṙu mṟasa inu.

³⁰Kyasia kyipfa nyi moonguo shisuku, aichi kye Ruwa nalemwenenga kyaasa, kye kyisharinyi kokye kochiwuka mangyi.

³¹Na oe chandu alesonguo iwona mbonyi-tsi, naleonguo mbonyi tsa iṟuka lya Yesu Kristo, kye mrima okye ochiṙio ko wapfu-pfo, maa mmbiu okye ochipuya kyilomenyi-pfo.

³²Yesu-cho Ruwa nalemṟutsa, na soe loose lui waṟingyishi.

³³Kyasia oe, kamṙoso mṟasa kuwoko ko kulyoe ko Ruwa, na iambilyia ko Awu kyaasa kyilya kya Mumuyo Mweele, napusuo kyindo-kyi mukyiwonyi na ikyiicho wulalu.

³⁴Kyipfa Dawidi aleṙo na ruwewu-pfo; indi oe nalegamba, ‘Ruwa nalewia Mndumii oko, ṙamia ura loko lo kulyoe,

³⁵mṟasa kyiyeri ngyechikuenenga wuiṙimi wo ichilyia washituwa wapfo.’ ”

³⁶“Kyasia wandu woose wa Isiraelyi wamanye na pata kye Ruwa naleenenga Yesu-cho walemkapia msalabenyi wuiṙimi wo iwa Mndumii na Kristo.”

³⁷Kyiyeri wandu walya waleicho mbonyi-tso, wakaiṟewe mrimenyi kowo, wakawia Petiro na wanalosho walya wengyi, “Luwute-kyi, wana wa wama waṙu?”

³⁸Petiro kawawia, “Ṙumbuyenyi iwuta sha wunyamaṟi, mupatiso orio umwi kui rina lya Yesu Kristo, muiṙime iambilyia ihooṟio lya ngyuunyamaṟi tsanyu, na nyoe mochiambilyia kyienengo kya Mumuyo Mweele.

³⁹Cha kyipfa kyaasa-kyi nyi kyipfa kyanyu, na ko wana wanyu, na ko walya wai kuleshi, na ko woose wechilago nyi Mndumii oṙu Ruwa wache na kokye.”

⁴⁰Kawaṟingyishia kui maṙeṙo gengyi gafoi mnu na iwaikyimbia, echigamba, “Kaenyi kuleshi na rika-lyi lyilekyeicho.”

⁴¹Na walya waleicho malosho gakye na igaosha wakapatiso; na mfiri ulya wakaengyeṟika cha wandu shiku shiṟaaṟu.

⁴²Mfiri yoose wakaosha malosho ga wanalosho, wakyeri kyindo kyimwi shindonyi shoose, na kyiiṙi kya ilya mkate handu hamwi, na kyiiṙi kya iterewa.

⁴³Wanalosho wakawuta shindo shifoi sheṟiyisha na ṟigo, orio mndu kawoṙo nyi wuowu.

⁴⁴Na woose waweiṙikyie Yesu wawekyekaa handu hamwi, na iwuta shindo shoose wakyeri kyindo kyimwi,

⁴⁵wechikumba masaa gawo, na shindo shawo wawewoṙe, na igawia wandu woose orio mndu iṙuana na chandu awekundi.

⁴⁶Na orio mfiri wechiyenda hekalunyi handu hamwi, wechilya mkate numba kui numba, na ilya kyelya kyawo na sia na mrima iwoṙe ilekyia,

⁴⁷wechiṟumisha Ruwa, na ichihiṟa wandu woose. Mndumii kapfumbutsa siṟi orio mfiri ko walya waweikyiṟo.