Read Kivunjo New Testament 1999 Mawuto Ga Wasu 21 Bible Online

Mawuto Ga Wasu 21 - Kivunjo New Testament 1999 bible

Mawuto Ga Wasu 21

¹Kyiyeri lomlekane nawo, lukoiṙia ipalyipalyinyi lukoshika Kosi, na ilya-ngama lukoshika Rodo na iwuka pfo lukoshika Patara,

²lukowona ngalawa iambaṙa mṟasa Foinikye lukoṙooya pfo. Lukoengyeṟa iiṙia ipalyipalyinyi na

³kyiyeri lulewona kyiṟingyiti kya Kyipiro lukokyiṙa ura lo kumoso; lukoyenda mṟasa Shamu lukosoka na Tiro. Cha kyipfa ipfo nyipfo ngalawa yaṙu iweisotsia mlari oyo.

⁴Lommbone wanalosho lukokaa pfo mfiri mfungaaṙe, nawo wakawia Paulo kui wuiṙimi wo Mumuyo alayende Yerusalemu.

⁵Na kyiyeri mfiri mfungaaṙe ilesia lukofuma lukoyenda mṟasa nja ya mṟi, lukopfiria ndi mbai ya ipalyipalyi lukoterewa;

⁶na lomsamane lukoṙooya ngalawenyi, nawo wakawuya na kanyi kowo.

⁷Na kyiyeri lulemarisa kyaro kyaṙu iwuka Tiro lukoshika Tolemai; lukoiṟikyiṟa walya waweiṙikyie Yesu lukokaa kowo mfiri umwi.

⁸Ilya-ngama ngamenyi lukofuma, lukoshika Kaisaria, lukoiṙa na kanyi ko Filyipo, mndu awekyeonguo Ndumi Ngyicha, awekyeri umwi o walya mfungaaṙe, lukokaa kokye.

⁹Mndu-cho nawewoṙe wana waana wa kyika, wakyega, wawekyeonguo shisuku.

¹⁰Kyasia kyiyeri luwekyeri pfo mfiri ifoi, moonguo shisuku umwi ekyelago Akabo kacha awuka uruka lo Uyuda.

¹¹Kyiyeri aleshika halya-ndu luwekyeri kaira mkanda o Paulo, kapfunga nacho maṙende na mawoko gakye, kagamba “Mumuyo Mweele nagamba kuṙi, ‘Nyi wuṙo Wayuda wa Yerusalemu wechipfunga monyi o mkanda-chu, nawo wechimṙambika ko wandu walaiṙikyie Yesu.’ ”

¹²Kyasia kyiyeri luleicho kuṙo, soe na wandu wa handu halya, lukomterewa alayende Yerusalemu.

¹³Nyi lyo-ndu Paulo alelugaluo na iluwia, “Ny'kyikyi muiwuta kui ifiiṟa na ingyienenga wuowu? Cha kyipfa inyi, hamwi na iwiko kyipfungonyi ngyikuṟeyeṟie iwoogo kulya Yerusalemu kyipfa kya rina lya Mndumii Yesu.”

¹⁴Kyiyeri alelega kyilya luwemmbia, lukotsia, lochigamba, “Kyilya Mndumii akundi kyiwutikye.”

¹⁵Numa ya mfiri iya lukoira shindo shaṙu lukoṙo na Yerusalemu.

¹⁶Wanalosho waata wa Kaisaria wakaoshana na soe, wakaṙuo Mnasoni awukyie Kyipiro, awei manalosho o kacha ulya lulekaa kokye.

¹⁷Kyiyeri luleshika Yerusalemu walya waweiṙikyie Yesu wakaluambilyia na sia.

¹⁸Na ilya-ngama Paulo kayenda ko Yakobo hamwi na soe, na wameeku woose wa siṟi wawekyeri pfo.

¹⁹Lomuwaiṟikyiṟe, kawaongoya shindo shoose kyimwi kyimwi Ruwa alewuta kyiiṙi kya walya walaiṙikyie Yesu kui iṟunda lya Paulo.

²⁰Nawo kyiyeri waleicho wakaṟumisha Ruwa, wakammbia, “Mono-wama oṙu, nuwonyi chandu Wayuda waleiṙikyia Yesu wakyeri shiku shifoi, na woose wawoṙe wunyenyi mnu kyipfa kya uwawaso.

²¹Nawo wammbio mbonyi tsapfo, kye nuilosha Wayuda woose wekyekaa ngyuurukyenyi tsa wandu walaiṙikyie Yesu iṙa malosho ya Mose, ochiwawia walaṙine wana wawo, maa iosha miichiwie ya Wayuda.

²²Kyasia ny'kyikyi? Loi wechimanya kye nocha.

²³Koikyo wuta ikyi luikuwia. Kuwoṙe wandu waana kyiiṙi kyaṙu wawikyie kyaasa.

²⁴Ṙuo wandu-wo, usanjo hamwi nawo, mulawaṙe ukoe mbele ya Ruwa; na itaa kyilya kyiwaṟi itoo kundu wasanjo, wawute njui mṙoenyi yawo, wandu woose waiṙime imanya kye mbonyi tsilya tsapfo walewio chi kyindo-pfo, indi iyoe nuiwuta chandu kyiwaṟi na iosha uwawaso.

²⁵Kyaindi ko mbonyi tsa wandu walaweiṙikyie waleiṙikyia Yesu, luleṟeia na iṙumbuo kye wakushowe mrima yawo na shindo shishiṙasie mafano, na samu, na kyindo kyikyiwaage kui ipfumbo, na wuṟui.”

²⁶Naaho-ng'u Paulo kalaga wasoṟo walya, na ilya-ngama kasanja mrima okye hamwi nawo, kaiṙa na hekalulyi, echionguo kyindo kyiwaṟi iwuto mfiri iya ya isanjo, mṟasa kyienengo kyiwuto kyipfa kyawo.

²⁷Kyasia kyiyeri mfiri iya mfungaaṙe iwekyeri kufuhi na iafukyia, Wayuda wawewukyie Asia wakammbona akyeri hekalunyi, wakatuṟutsana wandu woose, wakammbaṙa,

²⁸wakakalagatsa, na igamba, “Lanyoe wasoṟo wa Isiraelyi lutaramenyi. Ichu nyi oe mndu ulya ekyelosha wandu woose orio handu, chandu kyilaṙuṙanyi na isanga lyaṙu maa uwawaso, maa miichiwie ya handu-ha. Lyingyi-se, ngoseṟa ya isho, naitsa Wakyiṟikyi na hekalunyi, kafanyiṟa kyimṟumoe handu-ha haele.”

²⁹Cha kyipfa walekowawona Tirofimo, mndu awukyie Efeso, akyeri mṟinyi hamwi na Paulo, wakakusaṟa kye Paulo namwitsa na hekalunyi.

³⁰Mṟi oose ukowa kyituṟu, cha ilyi wandu woose wakasanzia handu hamwi, wakawaṙa Paulo wakamkuruo, wakammbuta hekalunyi, na kulawoṙe iṙetsa ṙaawa moongo ikashingo.

³¹Na kyiyeri waweipfula chandu wembaaga, mbonyi tsikashika ko msongoru o asikari wa shiṙa kye mṟi oose o Yerusalemu ofoika.

³²Kulawoṙe iṙetsa kyiyeri kawuta asikari na wachilyi, kayenda Yerusalemu eṙicha. Kyiyeri wandu walewona msongoru ulya o asikari wa shiṙa wakaṙa ikapa Paulo.

³³Numa ya iho msongoru ulya o asikari wa shiṙa katikyira kufuhi na Paulo, kammbaṙa, kagamba napfungo na mshe iwi; kawesa, “Nyi wui ichu? Ny'kyikyi awuta?”

³⁴Wengyi wuingyinyi wulya wo wandu wakakalagatsa wegamba ikyi na wengyi kyingyi. Kyasia kyiyeri msongoru ulya o asikari wa shiṙa alelemo imanya mbonyi kyipfa kya kyikalagatso kyilya, kagamba naitso na moombonyi.

³⁵Kyasia kyiyeri Paulo aleshika shitengunyi alaiṙime itikyira; koikyo asikari walya wakamyekyia mayewenyi kyipfa kya kyituṟu kya ṟiima lyilya.

³⁶Kyipfa ṟiima lying'anyi lya wandu lyilemwosha, wechikalagatsa na igamba, “Mmbaage!”

³⁷Paulo amwitso na kulya moombonyi kawia msongoru ulya o asikari wa shiṙa, “Ngyiwoṙe momu o kuwia kyindo?” Na oe kagamba, “Iyoe nuichi mṙeṙie o Kyikyiṟikyi?

³⁸Iyoe chi Mmisiri ulya mfiri ya ipfo numa aleenenga wandu shiku shiina isuana, wandu wawekyelago Wawaagi, kowasongoya iyenda kundu ko nuka ngyiumu suwaa ilawoṙe maa mṟinga?”

³⁹Paulo kagamba, “Inyi nyi Myuda, mndu awukyie Tariso, mṟi o Kyilyikyia, mndu awukyie mṟinyi uwoṙe rina. Ngyikuterewa ungyienengye momu ngyiṙeṙe na wandu-wa.”

⁴⁰Kyasia, kyiyeri alemwenenga momu, Paulo kagoṟoka halya shitengunyi, katsinia wandu wa mṟi ulya; na kyiyeri waletsia sau, kaṙeṙa nawo kui mṙeṙie o Kyiebrania, echigamba,