Read Kivunjo New Testament 1999 Mawuto Ga Wasu 22 Bible Online

Mawuto Ga Wasu 22 - Kivunjo New Testament 1999 bible

Mawuto Ga Wasu 22

¹“Lanyoe wasoṟo, wana wa wama wako na waawu wako, ngyiaṙanyienyi ngyechiloṟa mbele yanyu wulalu, chandu ngyilammbicho.”

²Kyiyeri waleicho eṙeṙa nawo kui mṙeṙie o Kyiebrania wakaengyeṟa itsia, na oe kagamba,

³“Inyi nyi Myuda, ngyilefeo Tariso, mṟi o Kyilyikyia, indi ngyileng'anyisio kunu mṟinyi, ngyikyeri manalosho o Kamalyielyi. Ngalosho chandu kyiwaṟi mawawaso goose ga waku waṙu, ngawa mndu ekyepfuṟukania Ruwa chandu nyoe mukyeri inu.

⁴Ngalyisa wukyiwa wandu walya wekyeosha njia iya ya Mndumii ngawapfunga na iwawaaga, ngyechiwawika kyipfungonyi, wasoṟo na waka.

⁵Chandu Mkohanyi ulya ang'anyi kuta woose aingyiṟingyishia, na wameeku woose wa mengye, walya ngyilewuta paruo kowo, ngayenda Dameskyi, kundu ngyiende wandu waiṙikyie Yesu wakyeri pfo, wawapfungye, kundu walyiso wukyiwa.”

⁶“Kyikawa-ng'u kyiyeri ngyiwekyeri kyaronyi, ngyikyeri kufuhi na Dameskyi, kyiyeri kya saa tsiṟandaaṟu tsa kyingoto, cha ilyi ngyeela ing'anyi ilewuka ruwewu, ikangyilyimika ngyuura tsoose.

⁷Ngaoloka wanda, ngaicho ṟui lyechingyiwia, ‘Saulyi Saulyi, ny'kyilyi ungyilyisa wukyiwa?’

⁸Ngagaluo ngagamba, ‘Iyoe nyi wui, Mndumii?’ Kangyiwia, ‘Inyi nyi Yesu o Nasareti, ulya iyoe umlyisa wukyiwa.’

⁹Na walya wawekyeri hamwi na inyi walewona ngyeela-yo, kyaindi waleicho ṟui lya ulya aleṙeṙa na inyi-pfo.

¹⁰Ngagamba, ‘Ngyiwute kyi, Mndumii?’ Mndumii kangyiwia, ‘Goṟoka, uiṙe na Dameskyi, na ipfo nochiwio mbonyi tsa shindo shoose shishigambe ushiṟunde.’

¹¹Na kyiyeri ngyilepfa meso kyipfa kya mng'ano o ngyeela iya, walya wawekyeri hamwi na inyi wakangyiwaṙa mawoko wakangyiṙuo Dameskyi.

¹²Kyasia mndu umwi, Anania, mndu akundi na iowuo Ruwa kui iosha mawawaso, aleṟingyishio wucha nyi Wayuda woose wawekyekaa pfo,

¹³kacha na koko, kagoṟoka kufuhi na inyi, kangyiwia, ‘Mono-wama oko, Saulyi, wona.’ Kyiyeri kyilya kyilya ngawona, ngamwitukuya.

¹⁴Kagamba, ‘Ruwa o waku waṙu nakusambuṟa iyoe uiṙime imanya shilya akundi, na iwona ulya awoṙe wusumganyi, na iicho kyindo agamba.

¹⁵Cha kyipfa nochiwa mṟingyishi okye ko wandu woose, o shindo-sho ulewona na iicho.

¹⁶Kyasia wulalu, ny'kyikyi uweṙa? Goṟoka, upatiso, usanjo maṙeko gapfo, uterewe kui rina lyakye.’ ”

¹⁷“Kyikawa-ng'u kyiyeri ngyiwewuya na Yerusalemu, kyiyeri ngyiweiterewa ngyikyeri hekalunyi, ngawa cha mndu ailoṙo.

¹⁸Ngammbona, na oe kangyiwia, ‘Pfuṟukana uwukye Yerusalemu iwinyi, cha kyipfa wechiiṙikyia wuṟingyishi wulya wo mbonyi tsako ochiwaenenga-pfo.’

¹⁹Na inyi ngagamba, ‘Mndumii, iwo waichi kye inyi ngyilewika kyipfungonyi walya wakuiṙikyie na iwakapa orio sinagoginyi.

²⁰Na kyiyeri mṟingyishi opfo Stefano alewoogo, inyi ngyiwegoṟokyi kufuhi, ngyiwonyi nyi necha kyilya waweiwuta, na iambuya nguwo tsa walya walembaaga.’

²¹Na oe kangyiwia, ‘Yenda, cha kyipfa inyi ngyechikuṙuma uyende kuleshi ko wandu walangyiiṙikyie.’”

²²Wakamwaṙanyia mṟasa kyiyeri alegamba kuṙo, wakaṙeṙa na ṟui lying'anyi, wechigamba, “Wuta mndu-chu iha. Nawaṟi iwoogo!”

²³Kyiyeri waweikalagatsa na ikucha-kucha nguwo tsawo na iputsa kyilulyi,

²⁴ang'anyi ulya o asikari wa shiṙa kagamba naitso na kulya moombonyi, echigamba, “Naweso mbonyi tsakye kui imkapa na ngowa, kundu namanye kyitewe kya imkalagatsia kuṙi.”

²⁵Na kyiyeri wamumpfungye na shigowo, Paulo kawia mchilyi ulya awegoṟokyi kufuhi, “Ngyesa nyi sungusinyi ikapa mndu ai Mroma alaanduyo?”

²⁶Kyiyeri Mchilyi ulya aleicho, kayenda kawia ang'anyi ulya o asikari wa shiṙa, echigamba, “Nukundi iwuta kyi? Cha kyipfa mndu-chu nyi Mroma.”

²⁷Ang'anyi ulya o asikari wa shiṙa kacha, kammbesa, “Kyengyiwia; iyoe nyi Mroma?” Kagamba, “Yee.”

²⁸Ang'anyi ulya o asikari wa shiṙa kagaluo, kagamba, “Inyi ngyilewa raia o uruka-lu kui ienengyia heleri tsifoi.” Paulo kagamba, “Wafee wako inyi nyi Waroma wookyia ngyilandefeo.”

²⁹Kyasia walya wawekuṟeyeṟie immbesa wakawuka halya wakamleka. Ang'anyi ulya o asikari wa shiṙa na oe kaowuo, kyiyeri alemanya kye nyi Mroma, na kyipfa alempfunga.

³⁰Ilya-ngama, ang'anyi ulya o asikari wa shiṙa akundi imanya wuloi, nyi kyikyi kyileenenga Wayuda igamba kye Paulo nammbicho, kampfunguo, kawia wang'anyi wa makohanyi na wandu woose wa mengyenyi wasanzie handu hamwi. Kaende Paulo, kammbikyia mbele yawo.