Read Kivunjo New Testament 1999 Mawuto Ga Wasu 24 Bible Online

Mawuto Ga Wasu 24 - Kivunjo New Testament 1999 bible

Mawuto Ga Wasu 24

¹Hamwiṙe mfiri itanu, Anania, Mkohanyi ang'anyi kuta woose, kayenda hamwi na wasongoru wa wandu, na mndu ekyekania wandu mengyenyi ekyelago Teritulo, wakaongoya mchilyi mbonyi tsa Paulo.

²Na oe kyiyeri alelago, Teritulo kawooka ishitakyi Paulo, echigamba, “Kyipfa wuchilyi wopfo wokyeluendie ufoṟo iyoe Filekyisi uwoṙe rina, na kyipfa kya wusongoru wopfo shindo shiwicho kunu urukyenyi loṙu shekyeachikyio,

³kyasia lochiambilyia orio kyiyeri na orio handu, lochigamba haika.

⁴Kyaindi ngyilakutuure nawi, ngakuterewa uluaṙanyie shindonyi shaangu kui wucha wopfo.

⁵Cha kyipfa lowona mndu-chu kye namlang'a, nekyewooka wuṟiingyi kyiiṙi kya Wayuda woose wuyanenyi; lyingyi-se nyi msongoru o mwiṙikyie o Wanasorayo.

⁶Na lyingyi-se naletambagana ifanyiṟa hekalu kyimṟumoe; lukommbaṙa [lukokunda imwanduya kui mawawaso gaṙu.

⁷Kyaindi Lyisia, ang'anyi o asikari wa shiṙa, kacha, kammbuta koṙu ko pfinya,

⁸kagamba walya wawemshitakyi wache na kopfo.] Iyoe kumonyi kui imsoruo-soruo noiṙima imanya mbonyi tsa shindo shaluenenga imshitakyi.

⁹Wayuda nawo wakamshitakyi, wechigamba kye nyi wuṙo mbonyi-tsi tsikyeri.”

¹⁰Kyiyeri mchilyi alemtsinia kundu naṙeṙe, Paulo nalegamba, “Cha kyipfa ngyiichi kye iyoe nui moṙumbuo moondu o uruka-lu ko maka ifoi, ngyiloṟa chandu ngyilammbicho kui mrima uwoṙe sia.

¹¹Kyipfa noiṙima imanya kye halandeiṙe mfiri ikumi na iwi wookyia ngyileṙo na Yerusalemu indeterewa-pfo.

¹²Wandu-wa walengyiwona hekalunyi, ngyegaluana na mndu, ang'u iamtsa kyituṟu kyisanzionyi, maa sinagoginyi maa mṟinyi-pfo.

¹³Maa weiṙima iṟingyishia shindo-shi shiwaenenga wulalu ingyishitakyi-pfo.

¹⁴Indi kyindo ngyigamba kopfo nyi kye kui Njia iya ya Mndumii waigamba nyi ya wongo, ngyekyeindia Ruwa o waku waṙu, ngyiiṙikyie shoose shiṙuṙanyi na uwawaso na shilya shishiṟeie shitapunyi sha weonguo shisuku.

¹⁵Ngyiwoṙe ikusuria ko Ruwa, ikusuria maa iwo wailyiweṙelyia, kye kochiwaṙa iṟutso lya wapfu, wasumganyi na walawasumganyi taa.

¹⁶Na inyi ngyekyetambagana iichiwia kyindo-kyi ngyiwaṙe mrima ulawoṙe mti mbele ya Ruwa na mbele ya wandu mfiri yoose.

¹⁷Hamwiṙe maka ifoi ngyilecha ngyiendie wandu wa uruka loko shienengo.

¹⁸Wakangyiwona hekalunyi ngyepfuṟukania mbonyi-tsi, ngyimwilyi peṟu kyimṟumoe, maa ngyiwewika kyisanzionyi maa iamtsa kyituṟu-pfo; kyaindi kuwewoṙe Wayuda waata wawukyie Asia;

¹⁹wawaṟi iwa iha mbele yapfo ingyishitakyi, kokooya wawoṙe kyindo kyoose kyiwicho waigamba ngyilewuta.

²⁰Ang'u wandu-wa wawenyi wagambe, nyi ṙeko lyiha walelyiwona koko kyiyeri ngyilegoṟoka mengyenyi,

²¹sile kyipfa kya ṟui-lyi lyimwi, kyiyeri ngyilegoṟoka makyiṙi-gawi gawo, na igamba, ‘Kyipfa kya iṟutso lya wapfu ngyianduyo mbele yanyu inu.’ ”

²²Kyasia Filekyisi kafunja kyisanzionyi kyilya, cha kyipfa naweichi necha nakamwi mbonyi tsa Njia ya Mndumii iya Paulo aweiṙeṙa mbonyi tsayo, kagamba, “Kyiyeri Lyisia, ang'anyi o asikari wa shiṙa, echicha ngyeṙumbuo moondu onyu.”

²³Kawia mchilyi ulya kye Paulo naringo; indi nawaṙe ṙaawa, na mbuya tsakye waenengo momu o mmbutia kyilya akundi.

²⁴Hamwiṙe mfiri ngyaangu, Filekyisi kacha aṙuṙanyi na mka okye, Durusila, awei Myuda, kagamba Paulo nalago kaaṙanyia mbonyi tsa iiṙikyia Yesu Kristo.

²⁵Na Kyiyeri Paulo aweionguo mbonyi tsa wusumganyi, na iwa na meena, na ianduyo lyiicha, Filekyisi kaowuo kagaluo, kagamba, “Wulalu yenda, na inyi ngawona ṙaawa ngyekulaga.”

²⁶Hamwi na isho nalekusaṟa kye Paulo nechimwenenga heleri; koikyo nalemlaga kafoi kaṙeṙa na oe.

²⁷Na kyiyeri maka iwi ileiṙa Filekyisi kaambilyia Porikyio Festo nawaṙe wuchilyi handu ha Filekyisi. Na Filekyisi akundi Wayuda wamkunde kaṙa Paulo kyipfungonyi.