Read Kivunjo New Testament 1999 Mawuto Ga Wasu 26 Bible Online

Mawuto Ga Wasu 26 - Kivunjo New Testament 1999 bible

Mawuto Ga Wasu 26

¹Akyiṟipa kawia Paulo, “Nuwoṙe momu ionguo mbonyi tsapfo.” Naaho Paulo kagoṟuo kuwoko kokye, kaloṟa chandu alammbicho, echigamba,

²“Mangyi Akyiṟipa! Ngyikuichuoe iwaṙa isaṟia mrimenyi, kyipfa inu mbele yapfo ngyiloṟa chandu ngyilammbicho, kyiiṙi kya wuwicho wulya Wayuda walegamba kye ngyiwoṙe.

³Iyoe kyipfa uichi mnu miichiwie ya Wayuda na shindo shoose wawoṙe shewesa, ngyikuterewa ungyiaṙanyie kulawoṙe iwina.

⁴“Cha kyipfa Wayuda woose wangyiichi wookyia ngyii manakye, shindo shiwekyeri urukyenyi loko ipfo Yerusalemu wookyia mawookyionyi,

⁵wangyiichi mnu wookyia mawookyionyi, kokooya wakunda iṟingyishia, kye ngyiwekyeri Mfarisayo kui iosha mawawaso gaṙu ga iindia Ruwa kulawoṙe iloloma maa ale.

⁶Na wulalu ngyigoṟokyi iha ianduyo kyipfa kya iweṙelyia kyaasa waku waṙu waleenengo nyi Ruwa.

⁷Kyaasa wandu waṙu wa mbaṟe ikumi na tsiwi waiweṙelyia ikyikooya, wechiterewa Ruwa na iana. Na inyi, mangyi mkunde, Wayuda waigamba kye ngyimmbicho kyipfa kya iweṙelyia-lyo.

⁸Ny'kyilyi konyu kyawa kyindo kyilechiiṙimika, kye Ruwa nekyeṟutsa wapfu?

⁹Loi, inyi ngyilewona mrimenyi koko kye kyingyiwaṟi iwuta shindo shifoi shelyisa wukyiwa walya wekyeosha Yesu awukyie Nasareti;

¹⁰na inyi ngawuta isho kulya Yerusalemu; ngyilewika wandu wafoi wa Ruwa kyipfungonyi, ngamwenengo momu na wang'anyi wa makohanyi, na kyiyeri walewoogo ngyilegamba nyi sungusinyi.

¹¹Na kafoi masinagoginyi goose ngyilewalyisa wukyiwa, ngawaitika ilahia Ruwa; ngakapo nyi nyashi kyipfa kyawo cha msuko, ngawalyisa wukyiwa maa mṟinyi ya wuyenunyi.”

¹²“Kyasia kyiiṙi kya iṟunda-lyo kyiyeri ngyiweiyenda Dameskyi, ngyiwoṙe wuchilyi wo wang'anyi wa makohanyi;

¹³mangyi mkunde, naaho-ng'u kyiyeri kya kyingoto njienyi ngawona ngyeela yewuka ruwewu, iiṟie ngyeela ya mnengyeṟi, yengyilyimika inyi, na walya waweioshana na inyi ngyuura tsoose.

¹⁴Lukooloka wanda loose, ngaicho ṟui lyeṙeṙa na inyi kui mṙeṙie o Kyiebrania, ‘Saulyi! Saulyi! Ny'kyilyi ungyilyisa wukyiwa? Nyi kyuumu kopfo ikuhuuya kyiṙinyi.’

¹⁵Na inyi ngagamba, ‘Iyoe nyi wui, Mndumii?’ Mndumii kangyiwia, ‘Inyi nyi Yesu, ulya iyoe umlyisa wukyiwa.

¹⁶Kyaindi amka, ugoṟokye na maṙende gapfo, cha kyipfa ngacha na kopfo kyipfa kya ikyi, ngyikuwikye uwe mṟundi na mṟingyishi o shindo-shi uleshiwona, na shindo ochishiwona koko na shilya ngyechikuloṟa.

¹⁷Ngyechikukyiṟa iwuka wandu wa Isiraelyi na wandu walangyiiṙikyie wechiiṙima ikuwutia kyindo-pfo, walya ngyechikuṙuma kowo.

¹⁸Uwapfunguoe meso, na iwaweṟutsa waṙe meema na iyenda saenyi, waṙe pfinya tsa Satana na iyenda ko Ruwa; naaho-ng'u Ruwa nawahooṟie ngyuunyamaṟi tsawo na wechikaa halya-ndu walya Ruwa awailyishie wechikaa kui ingyiiṙikyia inyi.’ ”

¹⁹“Koikyo, mkunde mangyi Akyiṟipa, ngyilelega shindo shilya sha ruwewu ngyileloṟo ngyikyeri cha mndu ailoṙo-pfo,

²⁰indi ngyileonguo Ṙeṙo lya Ruwa kuwooka ko wandu wa Dameskyi na Yerusalemu, na urukyenyi loose lo Uyuda, na ko wandu walaiṙikyie Yesu, kye waṙumbuye wunyamaṟi na igalukyia Ruwa, wechiwuta shilya shiṙuṙanyi na iṙumbuya wunyamaṟi.

²¹Kyipfa kya isho Wayuda wakangyiwaṙa ngyikyeri hekalunyi wakatambagana ingyiwaaga.

²²Kyasia cha kyipfa ngawona kyitarama kyiwukyie ko Ruwa ngyigoṟokyi iha inu ngyeṟingyishia wana watutu na wandu wang'anyi, maa ngyigamba kyindo sile shilya weonguo shisuku na Mose waleonguo-pfo. Shindo walegamba kye shechiwa,

²³kye Kristo nawaṟi ilyiso wukyiwa na kye oe kuwooka kui iṟutso ko wapfu nechionguo mbonyi tsa ngyeela ko wandu wakye na ko wandu walamwiṙikyie.”

²⁴Kyiyeri Paulo aweloṟa chandu alammbicho, Festo kaṙeṙa na ṟui lying'anyi, kagamba, “Paulo, numsuko! Isoma mnu lyilekuenenga wusuko.”

²⁵Kyaindi Paulo kagamba, “Festo monyi kyiṟumi, ngyimsuko-pfo. Ngyiṙeṙa shindo sha loi ngyilamsuko maa ale.

²⁶Cha kyipfa mangyi naichi mbonyi-tsi, na inyi ngyeiṙima iṙeṙa na oe kulawoṙe wuowu, cha kyipfa ngyiichi kye kuwoṙe kyindo maa kyimwi kyiiṙi kya mbonyi-tsi alakyiichi-pfo; kyipfa kyindo-kyo kyilewutika kyiṟika-pfo.

²⁷Mangyi Akyiṟipa, ngyesa uiṙikyie malosho ga weonguo shisuku-pfoe? Ngyiichi kye nuiṙikyie.”

²⁸Akyiṟipa kawia Paulo, “Kui maṙeṙo maangu nokusaṟa kye noiṙima ingyigaluo ngyiwe Mkristiano?”

²⁹Paulo kagaluo, kammbia, “Ngyiterewa Ruwa kye, kokooya nyi kui maṙeṙo maangu ang'u kui maṙeṙo gafoi, chi iyoe tupu-pfo indi na iwo woose waingyiaṙanyia inyi wawe cha inyi, kyaindi ngyiterewa mulawiko kyipfungonyi cha inyi.”

³⁰Mangyi na mchilyi na Berinikye na walya waweṙamie hamwi nawo wakagoṟoka.

³¹Na kyiyeri walewuka halya wakawiana, “Mndu-chu aiwuta kyindo kyoose kyechimwenenga ipfungo ang'u iwoogo-pfo.”

³²Akyiṟipa kawia Festo, “Mndu-cho naweiiṙima ilekyio, kokooya alalegamba kye moondu okye uṙoo ko Kaisari.”