Read Kivunjo New Testament 1999 Mawuto Ga Wasu 28 Bible Online

Mawuto Ga Wasu 28 - Kivunjo New Testament 1999 bible

Mawuto Ga Wasu 28

¹Kyiyeri lomkyie, nyi lyo-ndu lulemanya kye kyiṟingyiti kyilya kyekyelago Melyita.

²Wandu wa uruka-lo wakaluloṟa isaṟia lyilewa igamba. Cha kyipfa waleatsa moṙo, wakaluambilyia loose, kyipfa kya mvuo ilekapa na kyipfa kya mbeho.

³Kyiyeri Paulo awesania mlari o ngwi na iuwika moṙonyi, njoka ikafuma kulya ngwinyi kyipfa kya moṙo ulya, nayo ikakuoṟowia kuwokonyi kokye.

⁴Kyiyeri wandu wa kyiṟingyiti kyilya walewona njoka iya inenewie kuwokonyi ko Paulo wakawiana, “Mndu-chu aṙeeye alakyeri mmbaagi-pfo. Maa chandu alekyia ndenga tsa ipalyipalyinyi ruwa ekyelago Wusumganyi eṙa alembaaga-pfo.”

⁵Kyaindi Paulo kakutia-kutia njoka iya moṙonyi ilammbutie kyindo kyoose.

⁶Wo wakakusaṟa kye nechishimba ang'u ioloka wanda kui ipfa cha ilyi; na wamumwitukuye mnu, na iwona kye kuwoṙe kyindo kyoose kyiwicho kyiwemmbutikyia-pfo, wakainduka, wakagamba kye oe nyi ruwa.

⁷Kufuhi na handu halya hawewoṙe maṙema ga msongoru o kyiṟingyiti kyilya, awekyelago Pubilyio. Mndu-chu naleluambilyia kui mrima uwoṙe umbuya, kalugaluo wayenu wakye kyiyeri kya mfiri iṟaṟu.

⁸Kyikawa-ng'u awu o Pubilyio nawewoṙo nyi homa na iaṟaka samu. Paulo kaiṙa na halya-ndu awekyeri, katerewa, kayekyia mawoko gakye wuye yakye, na imkyiṟa.

⁹Isho shammbutikye wandu wengyi wawewoṙe ndoṟe kulya kyiṟingyitinyi wakacha wakakyiṟo.

¹⁰Nawo wakaluindia mnu. Kyasia kyiyeri lulewooka kyaro kya iiṙa ipalyipalyinyi wakawikyia ngalawenyi shindo shilya luwekundi.

¹¹Hamwiṙe mori iṟaṟu lukoyenda lukyeri ngalawenyi ya mṟi o Iskanderia, ngalawa ilekoyakaa halya kyiṟingyitinyi kyiyeri kya mbeho. Na ngalawa-yo iwekyelago “waruwa wawi.”

¹²Lukoshika Sirakusa, lukokaa mfiri iṟaṟu.

¹³Iwuka pfo lukotenga lukoshika Rekyio; hamwiṙe mfiri umwi mkuma ukokuma iwuka ura lo kyaseri, na ilya-ngama lukoafukyia Puteolyi.

¹⁴Lukokooya pfo wandu waata waiṙikyie Yesu, wakaluterewa lukae nawo mfiri mfungaaṙe; na kuṙo lukoshika Roma.

¹⁵Na iwuka pfo, kyiyeri walya waiṙikyie Yesu waleicho mbonyi tsaṙu, wakacheluambilyia, wakacha mṟasa Sangaṙa ya Apiyo na numba tsiṟaaṟu tseambilyia wayenu. Kyiyeri Paulo alewawona naleana Ruwa, kokuicho pfinya ing'anyi mrimenyi.

¹⁶Kyiyeri luleiṙa na Roma Paulo naleenengo momu o ikaa amonyi hamwi na asikari alemringa.

¹⁷Kyikawa-ng'u hamwiṙe mfiri iṟaṟu kalaga wang'anyi wa Wayuda wasanzie handu hamwi, na wammbute kuṙo, kawawia, “Wana wa wama wako, maa chandu ngyilalewuta kyindo kyoose kyilaṙuṙanyi na miichiwie ya wandu waṙu ang'u miichiwie ya waku waṙu, ngyilewiko mawokonyi ga Waroma, ngyimpfungye wookyia Yerusalemu.

¹⁸Na iwo wamungyisoruo-soruo walekunda ingyilekyia, cha kyipfa kuwewoṙe kyimaṙuma kyoose kya inyi iwoogo-pfo.

¹⁹Kyaindi kyiyeri Wayuda walegamba kyilya wawekusaṟie ngyileitiko iṙuo mbonyi-tsi ko Kaisari. Chi kye ngyiwewoṙe kyindo kyiwicho ngyeiṙima igamba kye wandu wa uruka loko walewuta-pfo.

²⁰Kyasia kyipfa kya ikyo, ngamulaga muchengyiambuya na iṙeṙa na inyi; cha kyipfa ngyimfungye na mshe-chu kyipfa kya kyilya wandu wa Isiraelyi waiweṙelyia.”

²¹Walya wakammbia, “Soe luleambilyia paruo tsiwoṙe mbonyi tsapfo iwuka Uyuda-pfo; maa kuwoṙe maa mndu umwi aiṙikyie Yesu aleshika iha na iluendie mbonyi ang'u igamba kyindo kyoose kyiwicho kyapfo-pfo.

²²Kyaindi lukundi iicho chandu uwonyi iyoe; cha kyipfa mbonyi tsa wandu-wa iyoe ukyeri umwi owo kyimanyikyie koṙu kye tsiṙeṙe uwicho orio handu.”

²³Wamteṟiane na Paulo mfiri wechiwaṙa kyisanzionyi na oe wandu wafoi mnu wakacha na kulya numbenyi awekyekaa. Kawaongoya necha na iṟingyishia Wumangyi wo Ruwa, echiwaikyimbia kui mbonyi tsa Yesu, na mbonyi tsa mawawaso ga Mose na ga weonguo shisuku, wookyia ngamenyi mṟasa kyukonyi.

²⁴Wengyi wakaiṙikyia shilya shilegambo kyaindi wengyi waleiṙikyia-pfo.

²⁵Na kyiyeri walawewoṙe makusaṟo gamwi, wakayenda, kyiyeri Paulo amgambe kye, “Mumuyo Mweele naleṙeṙa necha na waku waṙu, kui ṙumbu lya moonguo shisuku Yesaya,

²⁶echigamba, ‘Yenda ko wandu-wa, undewawia, Iicho moicho, indi momanya-pfo, na iwona mowona, indi momanya-pfo.

²⁷Cha kyipfa mrima ya wandu-wa irumai, na maṙwi gawo nyi gamalemeri iicho, na washingyie meso gawo; walacheicho kui maṙwi gawo. Na imanya kui mrima yawo, na iilacha makusaṟo gawo, ngawakyiṟa.’ ”

²⁸“Kyasia manyenyi kye wukyiṟo-wu wo Ruwa wuleṙoo ko wandu walaiṙikyie Yesu, nawo wechiiṙikyia!” [

²⁹Amgambe kuṙo, Wayuda wakayenda, wechiwesana shindo shifoi wenyi ko wenyi.]

³⁰Paulo kakaa kyiyeri kya maka iwi kulya numbenyi awekyekaa, kaambilyia wandu woose wawekyeyenda kokye,

³¹echionguo mbonyi tsa Wumangyi wo Ruwa, na ilosha mbonyi tsa Yesu Kristo, kulawoṙe wuowu, na kulawoṙe mndu alemshingyia.