Read Kivunjo New Testament 1999 Mawuto Ga Wasu 5 Bible Online

Mawuto Ga Wasu 5 - Kivunjo New Testament 1999 bible

Mawuto Ga Wasu 5

¹Kyaindi mndu umwi awekyelago Anania, hamwi na Safira, mka okye, nalekumba masaa,

²kaṟika kyifunjoe kya woguru, na mka okye aichi mbonyi-tso kaende kyifunjoe kyilya kyiletsugaa kakyienengyia wasu.

³Petiro kagamba, “Anania, ny'kyilyi Satana aichuṟa mrima opfo iwia Mumuyo Mweele wongo, na iṟika kyifunjoe kya woguru wulya wo ṙema?

⁴Kyiyeri ṙema-lyo lyiwekyeri kopfo, lyiwekyeri lyapfo-pfoe? Na lyamkumbo, woguru wolyo chi nuweiṙima iwuta nawo chandu ukundi-pfoe? Kyawa kuṙa kowuta kyindo kya mbaṟe-i iyi? Chi nowia mndu wongo-pfo, indi Ruwa.”

⁵Kyiyeri Anania aleicho mbonyi-tsi kaoloka wanda, kapfa. Kyiyeri wandu waleicho mbonyi-tsi wakawoṙo nyi wuowu wung'anyi.

⁶Wanakye wakafuma, wakampfunga na sanda, wakamfumiṟia nja, wakamṟika.

⁷Hamwiṙe cha saa tsiṟaaṟu, mka okye kacha, alaichi mbonyi tsiwemmbutika.

⁸Petiro kammbia, “Ngyiwia, iwo nyiwo woguru wo ṙema-lyo?” Safira kagaluo, kagamba, “Yee, iwo nyiwo woguru wolyo.”

⁹Petiro kammbia, “Kyawa kuṙa moiṙikyiana iyesha Mumuyo o Mndumii? Walya waṟika mii opfo nyi iho moongonyi wagoṟokyi, nawo wekuṙuo na iyoe taa.”

¹⁰Cha ilyi Safira kaoloka wanda, kapfa. Wanakye walya wakaiṙa na numba wakakooya ampfa, wakamfumiṟia nja, wakamṟika hamwi na mii okye.

¹¹Siṟi yoose ikawoṙo nyi wuowu wung'anyi hamwi na wandu woose waleicho mbonyi-tso.

¹²Na wasu wakawuta shindo shifoi sheṟiyisha hamwi na ṟigo; nawo woose wawewoṙe makusaṟo gamwi wechisanzia kulya italenyi lya Solomon;

¹³na kyiiṙi kya wandu woose kuwoṙe maa mndu umwi alekaria ioshana na wasu-pfo; indi wandu walewaṟumisha.

¹⁴Walya waweiṙikyie Yesu wakaengyeṟika, wasoṟo na waka;

¹⁵na kyikawa kye wandu wawekyefumiṟia wandu waluoe mṟaṟunyi ung'anyi na iwawikyia majamvinyi na makondoṟonyi, kundu ilyi Petiro echicha, maa kyirinje kyakye kyipaaye umwi owo.

¹⁶Na wuingyi wo wandu wa mṟi ikyeri mbai ya Yerusalemu wakasanza, wechiende wandu waluoe, na walya wawekyelyiso wukyiwa nyi waṟufui wawicho; nawo woose wakakyiṟo.

¹⁷Mkohanyi ang'anyi kuta woose kafuma na wandu woose wawekyeri hamwi na oe (iwo nyi walya wawekyechilyia hamwi na Masadukayo), wawoṙo nyi wunyenyi.

¹⁸Wakawaṙa wasu walya wakawawika kyipfungonyi;

¹⁹kyaindi malaika o Mndumii kyiyeri kya kyio kapfunguo moongo ya numba iya wawewapfungyie, kawawuta pfo, kagamba,

²⁰“Yendenyi mundegoṟoka hekalunyi muongoye wandu mbonyi tsoose tsa Moo-chu o mlungana.”

²¹Nawo kyiyeri waleicho wakayenda hekalunyi ngamenyi utuko, wakawooka ilosha. Mkohanyi ulya ang'anyi kuta woose kacha na walya wawekyeri hamwi na oe, wakalaga wandu na mengyenyi, na wameeku woose na wana wa Isiraelyi, wakaṙuma wandu kulya kyipfungonyi kundu waende wasu walya.

²²Na kyiyeri waṟundi waleshika halya kyipfungonyi walewona wasu walya-pfo wakawuya wakaende mbonyi-tso,

²³wechigamba, “Numba iya yepfungyia wandu loikooya ingyishingye nakamwi, na waringyi wa numba-yo wagoṟokyi mbele ya moongo; kyaindi kyiyeri lopfunguo moongo-cho lulawone pfo mndu.”

²⁴Kyasia msongoru o asikari wekyeringa hekalu na wang'anyi wa makohanyi kyiyeri waleicho mbonyi-tso, walamanye kyewuta, kye mbonyi-tso tsechiwa kuṙa.

²⁵Mndu umwi kawawia, “Wandu walya mulewawika kyipfungonyi wakyeri hekalunyi, wailosha wandu.”

²⁶Naaho-ng'u msongoru ulya o asikari wekyeringa hekalu kayenda hamwi na waṟundi, wakawaende, kui iwalemba-lemba, cha kyipfa waleowuo wandu walachewakapa na magoe.

²⁷Kyiyeri walewaende wakawawikyia halya mengyenyi. Mkohanyi ulya ang'anyi kuta woose kawawesa, echigamba,

²⁸“Ngamba lulemuima ilosha kui rina-lyi lya Yesu? Kyaindi nyoe moichuṟa mṟi oose o Yerusalemu na malosho ganyu, na mukundi luwio kye nyi soe lulembaaga.”

²⁹Petiro na wasu woṙoe wakagaluo, wechigamba, “Kyiluwaṟi iindia Ruwa kuta wandu.

³⁰Ruwa o waku waṙu naleṟutsa Yesu, ulya nyoe mulembaaga na immanyika ikyiṙinyi.

³¹Mndu-cho Ruwa nalemng'anyisa kui kuwoko kokye ko kulyoe, nawe Ang'anyi na Mkyiṟa naenengye wandu wa Isiraelyi iṙumbuya na ihooṟio wunyamaṟi.

³²Na soe lui waṟingyishi wa mbonyi-tsi, hamwi na Mumuyo Mweele ulya Ruwa aleenenga woose wekyemwindia.”

³³Kyiyeri waleicho mbonyi-tsi wakawoṙo nyi nyashi mrimenyi kowo, wakachila chandu wewaaga wasu walya.

³⁴Kyaindi mndu umwi, Mfarisayo, ekyelago Kamalyielyi, mlosha o uwawaso, awekyeindio nyi wandu woose, kagoṟoka halya mengyenyi, kagamba wasu waṙoo nja kyiyeri kyifuhi,

³⁵kawawia, “Nyoe wasoṟo wa Isiraelyi, owuoenyi iwutia wandu kyindo kyiwicho.

³⁶Cha kyipfa mfiri ya numa Teuda nalecha, echikuloṟa kye oe nyi mndu ang'anyi, cha wandu magana gaana wakakaa ura lokye; na oe nalewoogo na woose walemwiṙikyia, wakanyanyaṟika wakawa wulya.

³⁷Numa ya mndu-cho kulecha Yuda awukyie Galyilaya, mfiri iya yeṟeia wandu marina, kagaluo wandu wafoi wakamwosha, na oe taa kaṙeka na woose walemwiṙikyia wakanyanyaṟika.

³⁸Kyasia wulalu ngammbia, kaenyi kuleshi na wandu-wa; walekyienyi; cha kyipfa kokooya mbonyi-tsi ang'u iṟunda-lyi lyiwukyie ko wandu lyechinyamaṟika,

³⁹kyaindi kokooya lyiwukyie ko Ruwa mochiiṙima ilyinyamaṟa-pfo; mulachewono cha ilyi muiwingana na Ruwa.”

⁴⁰Wakaiṙikyia kyilya Kamalyielyi alegamba. Nawo kyiyeri walelaga wasu walya, wakawakapa, wakawawia walaloshe kui rina lya Yesu; na numa ya iho wakawalekyia.

⁴¹Nawo wakawuka halya mengyenyi, wechihiyo cha kyipfa watalo kye wawaṟi isutso kyipfa kya Rina lya Yesu.

⁴²Na orio mfiri, hekalunyi na kanyi kowo, waleṙa ilosha na ionguo Ndumi Ngyicha tsa Yesu kye nyi Kristo-pfo.