Read Kivunjo New Testament 1999 Mawuto Ga Wasu 6 Bible Online

Mawuto Ga Wasu 6 - Kivunjo New Testament 1999 bible

Mawuto Ga Wasu 6

¹Na mfiri iya wanalosho waweiengyeṟika, Wayuda wawekyeṙeṙa mṙeṙie o Wakyiṟikyi walenunuwa kyipfa kya Wayuda walya wawekyeṙeṙa Kyiebrania; na kyitewe kyenunuwa nyi kyipfa wakusu wawo walewaṙimika ienengo kyilya wawaṟi.

²Walya ikumi na wawi wakalaga wandu woose waweiṙikyie Yesu, wakagamba, “Chi kyicha soe iṙa ionguo Ṙeṙo lya Ruwa na ikuwinisha na heleri-pfo.

³Kyasia, wana wa wama, sambuṟenyi wandu mfungaaṙe kyiiṙi kyanyu, wawaṟingyishie kye wai wecha, waichuo Mumuyo, wawoṙe wuṟango, kundu luwaṙambikye iṟunda-lyi lyeambuya heleri;

⁴na soe luwaṙe iṟunda lyeterewa na ionguo Ṙeṙo lya Ruwa.”

⁵Kyindo-kyi wasu walegamba kyikachihiṟa woose wawesanzie halya. Wakasambuṟa Stefano, mndu aweichuo iiṙikyia na Mumuyo Mweele, Filyipo, Prokoro, Nikanori, Timoni, Parimena, na Nikolao, mndu aiṙikyie Ruwa, awukyie Antiokyia.

⁶Wakawawikyia mbele ya wasu, na wamterewe wakawayekyia mawoko.

⁷Mbonyi-tsi tsikaṙunganana orio handu; na itala lya wanalosho lyikaengyeṟika mnu kulya Yerusalemu; makohanyi wafoi wakaambilyia iiṙikyia.

⁸Na Stefano, aichuo isaṟia na wuiṙimi, nawekyewuta shindo sha maṟiyisho na ṟigo tsing'anyi mbele ya wandu.

⁹Kyaindi wandu waata wa sinagogi lyiwekyelago sinagogi lya “Wandu walawachilyie nyi kyindo,” na lya Wakyirene, na lya Waisikanderia, na lya walya wa Kyilyikyia na Asia, wakafuma na indegaluana na Stefano;

¹⁰kyaindi waleiṙima iwingana na wuṟango na Mumuyo-cho aweṙeṙa na oe-pfo,

¹¹wakawia wandu wagambe, “Luleicho mndu-chu echiṙeṙa mbonyi tselahia Mose na Ruwa.”

¹²Kui igamba kuṙo wakaende kyituṟu wandunyi na wameeku na walosha wa mawawaso. Wakayenda kokye, wakammbaṙa, wakamṙuo mengyenyi.

¹³Wakapfula waṟingyishi wa wongo, walegamba, “Mndu-chu mfiri yoose nawekyeṙeṙa mbonyi tselahia hekalu na uwawaso;

¹⁴kyipfa luleicho echigamba kye Yesu-cho awukyie Nasareti nechinyamaṟa hekalu na igaluo miichiwie Mose aleluenenga.”

¹⁵Wandu woose waweṙamie halya mengyenyi wakamwitukuya karii, wakawona kyaam kyakye kyikyeri cha kyaam kya kya malaika.