Read Kivunjo New Testament 1999 Mawuto Ga Wasu 9 Bible Online

Mawuto Ga Wasu 9 - Kivunjo New Testament 1999 bible

Mawuto Ga Wasu 9

¹Kyaindi Saulyi, kaengyeṟa iowesha na ikusaṟa iwaaga wanalosho wa Mndumii Yesu. Kayenda ko Mkohanyi ang'anyi kuta woose,

²katerewa naenengo paruo tsa iyenda Dameskyi, tsingyiṙikye ko walya wawekyesongoya masinagogi, kundu kawona wandu walya wawekyeosha Mndumii Yesu, wasoṟo na waka, nawapfungye na iwaende na Yerusalemu.

³Na kyiyeri awei kyaronyi, kyikawa nakyeri kufuhi na Dameskyi. Cha ilyi ngyeela iwukyie ruwewu ikamlyimika ngyuura tsoose.

⁴Kaoloka wanda, kaicho ṟui lyechimmbia, “Saulyi, Saulyi, ny'kyilyi ungyilyisa wukyiwa?”

⁵Kagamba, “Nyi wui iyoe, Mndumii?” Na oe kagamba, “Inyi nyi Yesu ungyilyisa wukyiwa.

⁶Kyaindi goṟoka, uiṙe na mṟinyi, na iyoe nochiwio shikuwaṟi iwuta.”

⁷Na wandu walya wawei kyaro hamwi na oe wakagoṟoka watsie sau, wechiicho ṟui, walawone mndu.

⁸Saulyi kaamka halya wanda, na kyiyeri meso gakye galepfunguka, alewona kyindo-pfo. Wakammbaṙa kuwoko wakamwende mṟasa Dameskyi.

⁹Alawone kyiyeri kya mfiri iṟaṟu; alailya maa inyo kyindo.

¹⁰Kyasia kulya Dameskyi kuwewoṙe manalosho ekyelago Anania. Mndumii kamlaga akyeri cha mndu ailoṙo. Anania kaiṙikyia kagamba, “Nyi iha ngyikyeri, Mndumii.”

¹¹Mndumii kammbia, “Amka, yenda kulya mṟaṟunyi okyelago ‘Mṟaṟu Mgoṟotsu’ undewesa numbenyi ko Yuda mndu ekyelago Saulyi awukyie Tariso; cha kyipfa mndu-cho naiterewa.

¹²Na oe ammbona mndu ekyelago Anania echicha, na imyekyia mawoko, naiṙime iwona-se.”

¹³Kyaindi Anania kagaluo, kagamba, “Mndumii, ngyilemwicho mbonyi tsa mndu-chu ko wandu wafoi, kye alemmbutia wandu walya wapfo wakyeri Yerusalemu shindo shiwicho mnu.

¹⁴Maa wulalu nawoṙe momu amwenengye nyi wang'anyi wa makohanyi napfungye wandu woose wekyeterewa kui rina lyapfo.”

¹⁵Kyaindi Mndumii kammbia, “Yenda tupu; cha kyipfa mndu-chu nyi kyindo kyako kyikyisaangye, naonguo mbonyi tsako ko walya walangyiiṙikyie, na ko wamangyi, na ko wandu wa Isiraelyi.

¹⁶Kyipfa ngyechimloṟa chandu echilyiso ngyuukyiwa tsifoi kyipfa kya iongoya wandu wengyi mbonyi tsako kundu wangyimanye.”

¹⁷Anania kafuma, kaiṙa na kulya numbenyi Saulyi awekyeri, kamyekyia mawoko echigamba, “Mono-wama, Saulyi, Mndumii nangyiṙuma, Yesu ulya alecha na kopfo ukyeri njienyi icha na kunu Dameskyi, uiṙime iwona-se, uichuṟo Mumuyo Mweele.”

¹⁸Cha ilyi shindo shikyeri cha masuoe shikaoloka mesonyi gakye, kaiṙima iwona.

¹⁹Kagoṟoka kapatiso; kalya kyelya, kawaṙa pfinya. Kakaa kulya Dameskyi mfiri ngyaangu, hamwi na wanalosho wawekyeri pfo.

²⁰Saulyi akyeri kulya Dameskyi kaonguo mbonyi masinagoginyi, kye Yesu nyi Mana o Ruwa.

²¹Na wandu woose waleicho wakaṟiyio, wakagamba, “Ichu chi ulya awekyelyisa wukyiwa walya wawekyeterewa kui rina lya Yesu kulya Yerusalemu-pfoe? Na alecha na kunu Dameskyi awoṙe makusaṟo igo igo, nawapfungye na iwaṙuo ko wang'anyi-pfoe?”

²²Saulyi kaengyeṟa iwaṙa pfinya kyiiṙi kya ionguo mbonyi tsa Yesu, kaowesha Wayuda wawekyekaa Dameskyi, echiloṟa na pata kye ulya aweionguo mbonyi tsakye nyi oe Kristo.

²³Na mfiri ifoi yamuiṙe, Wayuda wakachila chandu wembaaga;

²⁴kyaindi ngyeṟo tsawo Saulyi katsimanya. Wakamwotia kyingoto na kyio kundu waiṙime immbaaga.

²⁵Wanalosho wakye wakammbika mkunjenyi kyio na imsotsia wanda wechimwitsa dirishenyi.

²⁶Na kyiyeri Saulyi aleshika Yerusalemu, nalepfuṟukana ikulunga na wanalosho, nawo wawemwowuye woose walaiṙikyie kye oe nyi manalosho.

²⁷Kyaindi Barinaba kaṙuo Saulyi ko wasu, kawawia chandu alewona Mndumii Yesu njienyi, na kye naleṙeṙa na oe, na chandu aleonguo mbonyi ngyicha tsa Yesu kulya Dameskyi kui wuṟango na wukari.

²⁸Na Saulyi kakaa hamwi na wasu kulya Yerusalemu echioshana nawo kyiiṙi kya shoose waweiwuta.

²⁹Kaonguo mbonyi tsa Mndumii Yesu kui wukari, echiṙeṙa na igaluana na Wayuda wawekyeṙeṙa mṙeṙie o Kyikyiṟikyi. Nawo wakatambagana immbaaga.

³⁰Kyaindi kyiyeri walya waweiṙikyie Yesu walemanya mbonyi-tsi wakamṙuo Kaisaria, wakamṙuo nayende Tariso.

³¹Kyasia Siṟi ikawona sia urukyenyi lo Uyuda na Galyilaya na Samaria. Siṟi ikawaṙa pfinya, ikaengyeṟika, yechiindia Mndumii Yesu na iwiyiṟio moo nyi Mumuyo Mweele.

³²Na kyiyeri Petiro aweitenga-tenga ngyuura tsoose kayenda ko wandu wa Ruwa wawekyekaa Lyida.

³³Kawona mndu umwi kulya, awekyelago Ainea. Mndu-cho nawelee kyitaṟenyi kyiyeri kya maka nyanya; kyipfa nawepfiie ngapfu ura lumwi.

³⁴Petiro kammbia, “Ainea, Yesu Kristo amkukyiṟa. Amka, uale kyitaṟa kyapfo.” Cha ilyi kaamka.

³⁵Na wandu woose wawekyekaa Lyida na Sharoni wakammbona, wakaiṙikyia Mndumii Yesu na imwosha.

³⁶Na kulya Yafa kuwewoṙe manalosho umwi ekyelago Tabita (kyimwi na igamba Dorikasi ang'u moṟinyi). Mndu mka-chu nawewoṙe mawuto mecha na ienengyia shienengo shetarama wakyiwa.

³⁷Kyiyeri kyilya Tabita kaluo, kapfa; na wamumsanje, wakamṙuo kai.

³⁸Na kyipfa mṟi o Lyida uwekyeri kufuhi na Yafa, na wanalosho waleicho kye Petiro nakyeri pfo, wakaṙuma wandu wawi kokye, imterewa wechigamba, “Ulakyelyio icha na koṙu.”

³⁹Petiro kafuma kaoshana nawo. Kyiyeri aleafukyia, wakamṙuo kulya kai; wakusu woose wakagoṟoka kufuhi na oe, welyia na imloṟa kanzu na nguwo tsilya Dorikasi alepfuma kyiyeri kyilya awekyeri hamwi nawo.

⁴⁰Petiro kawawia woose wafumie nja, kapfiria ndi, katerewa, numa ya iho kapaaya mnying'a ulya o Dorikasi, kagamba, “Tabita, amka.” Dorikasi ulya awepfiie kaambuo, kawona Petiro, kaamka, kaṙamia.

⁴¹Petiro kalesha kuwoko, kamwira. Na amlage wandu walya wa Ruwa na wakusu kawikyia Dorikasi mbele yawo, ai na moo.

⁴²Mbonyi-tsi tsikaṙunganana ko wandu woose wa mṟi o Yafa; wandu wafoi wakaiṙikyia Yesu.

⁴³Kyasia Petiro kakaa mfiri ngyaangu kulya Yafa, kanyi ko mndu umwi ekyelago Simion, awekyeachikyia njonyi.