Read Kivunjo New Testament 1999 Waroma 1 Bible Online

Waroma 1 - Kivunjo New Testament 1999 bible

Waroma 1

¹Paruo-i yawuka koko inyi Paulo, mṟundi o Yesu Kristo, alelago nawe msu, na iteseṟo naonguoe Ndumi Ngyicha ya Ruwa;

²nayo nyiyo Ruwa alekoamwenenga kyaasa kui ṙumbu lya weonguo shisuku shiṟeionyi shiele.

³Mbonyi tsa Mono-kye alefeo kyisharinyi kya Dawidi,

⁴na iṟingyishio kui wuiṙimi iwa Mana o Ruwa, kui mbaṟe ya ngoo ya wuele, kui iṟutso lya wapfu, Yesu Kristo Mndumii oṙu.

⁵Icho ai kye kyiiṙi kyakye luleambilyia isaṟia na ndumo kundu masanga goose gaiṙime iindia kui iiṙikyia kyipfa kya rina lyakye.

⁶Na kyiiṙi kya iwo nyoe mulewa wasambuṟe wa Yesu Kristo;

⁷ko woose wakyeri Roma, wawakunde nyi Ruwa, walelago wawe wandu wa Ruwa. Isaṟia lyikae konyu na ufoṟo luwukyie ko Ruwa Awu oṙu, na ko Mndumii Yesu Kristo.

⁸Kuwooka ngyiana Ruwa oko kyiiṙi kya Yesu Kristo kyipfa kyanyu nyoe moose, kyipfa iiṙikyia lyanyu lyiongoyo wuyanenyi koose.

⁹Kyipfa Ruwa, ichu ngyekyemterewa na imwindia kui mrima oko kyiiṙi kya Ndumi Ngyicha ya Mono-kye, nyi mṟingyishi oko chandu ngyekyemukumbuo kulawoṙe itsia,

¹⁰mfiri yoose shiterewonyi shako, ngyechiterewa ngyiche na konyu mfiri ya kufuhi, Ruwa kakunda ingyigoṟokyia kyaronyi kyako.

¹¹Kyipfa ngyilangyie mnu immbona nyoe, ngyiiṙime imuenenga kyisumbo kya mrimenyi, kundu mukarisho mulalolome.

¹²Kyimwi na igamba, luwiyiṟiane moo inyi na nyoe, orio mndu kui iiṙikyia lya oṙoe, lyanyu na lyako.

¹³Kyaindi wana wa wama wako, ngyikundi muṙe mulamanya kye kafong'ui ngyilekunda icha na konyu; indi maa mṟasa wulalu ngyilalekyio, kundu ngyiiṙime igaluo wandu konyu wagalukyie Kristo taa. Chandu ngyiwoṙe wandu wagalukyie Kristo iwuka ko wandu wa masanga walai wa kunu Roma.

¹⁴Ngyiriko nyi Wakyiṟikyi na walakyeri Wakyiṟikyi, ngyiriko nyi waṟango na matondo.

¹⁵Koikyo, ko ura loko, inyi ngyikuṟeyeṟie ionguo Ndumi Ngyicha maa konyu nyoe mokyekaa Roma.

¹⁶Kyipfa ngyiwonia sonu Ndumi Ngyicha-pfo; kyipfa nyi wuiṙimi wo Ruwa wokyeende wukyiṟo, ko orio mndu aiṙikyie, ko Myuda kuwooka, na ko Mkyiṟikyi taa.

¹⁷Kyipfa wusumganyi wo Ruwa wuloṟo kyiiṙi kyakye; wookyia mawookyionyi ga iiṙikyia mṟasa mafurumionyi; chandu kyikyiṟeie, “Awoṙe wusumganyi nechikaa kui iiṙikyia.”

¹⁸Cha kyipfa nyashi ya Ruwa ilemanyika na pata iwuka Ruwewu kyipfa kya wunyamaṟi na wuwicho woose wo wandu wekyewingana na wuloi kui wuwicho.

¹⁹Kyipfa mbonyi tsa Ruwa tsiichio tsamanyika mrimenyi kowo kyipfa Ruwa nalewaloṟa na pata.

²⁰Kyipfa wookyia kyiyeri Ruwa alegumba wuyana wandu weiṙima imanya na pata kye pfinya tsakye nyi tsa mlungana na kye nai Ruwa loi. Mbonyi tsi tsekyeiṙima iwono-pfo kyaindi tsekyemanyika. Wandu weiṙima imanya mbonyi-tsi tsa Ruwa kyipfa kya shindo Ruwa agumbie. Kyipfa kya ikyo wechiiṙima ikuwaṙa na kyindo kyoose kyiiṙi kya shilya wawutie-pfo.

²¹Cha kyipfa kyiyeri walemanya Ruwa walemṟumisha cha kye oe nyi Ruwa maa imwana-pfo; indi waleṙekyia maloshonyi gawo ga wongo, na mrima yawo iwoṙe wutondo ikawiko meema.

²²Wechikuloṟa kye waṟango waletondoka.

²³Wakagaluo kyiṟumi kya Ruwa alekyepfa kui mafano ga mndu, shileye, na ga mando ga saka, na shekyekukuruo na ndewu.

²⁴Kyipfa kya isho Ruwa nalewaṙa langonyi tsa mrima yawo, waoshe ukoe, mṟasa wakawutiana shindo sha sonu kui mmbiu yawo.

²⁵Cha kyipfa walegaluo wuloi wo Ruwa iwa wongo, wakapfiria ndi kyindo Ruwa agumbie, wakawaṙima Ruwa ekyeṟumisho mlungana. Amen.

²⁶Koikyo Ruwa nalewaṙa waoshe lango tsawo tsa sonu. Waka wakailacha mkaṟo wakawutiana mbonyi tsa wolyi kui mmbiu yawo, kyindo kyilawaṟi iwa kuṙo.

²⁷Wasoṟo nawo na wuṙo wakaṙa iwuta mbonyi tsa wolyi na waka chandu kyiwaṟi wookyia mawookyionyi, wakalangana, wasoṟo wechiwuta shilawaṟi, wakaambilyia ngapo mrimenyi kowo, ngapo ikyeri wori wawaṟi.

²⁸Na chandu walelega iwika Ruwa ngyuuṟangonyi tsawo, Ruwa nalewaṙa waoshe ngyuuṟango tsawo tsilawoṙe kyiira, wawute shilawaṟi iwuta.

²⁹Wawoṙe wuwicho wo orio mbaṟe, wunyamaṟi na lango na wuwicho. Wawoṙe wunyeng'i, na uwaagi, na wuṟiingyi, na wulembi; wandu wa makusaṟo mawicho, wekyeṙeṙa wengyi.

³⁰Wekyeiria woṙiawo wongo, wasuuye Ruwa, wawoṙe tiri, wekyekushela, wekyeṙamia kyiṙombo kyeṙeṙa wongo, walekyeindia wafee wawo.

³¹Walaichi kyindo, walekyeafutsia shilya wateṟie, walakundi wandu wa kanyi kowo, walawoṙe isaṟia.

³²Waichi mnu ianduyo lya wusumganyi wo Ruwa, kye wekyewuta isho wawaṟi upfu, wekyewuta isho; maa chi isho tupu-pfo, indi wakaiṙikyiana na walya wekyewuta waṙo.