Read Kivunjo New Testament 1999 Waroma 10 Bible Online

Waroma 10 - Kivunjo New Testament 1999 bible

Waroma 10

¹Wana wa wama wako, kyindo ngyilangyie mnu mrimenyi koko, na kyiterewo kyako ko Ruwa, nyi kyipfa kyawo kundu wakyiṟo.

²Cha kyipfa ngyiwaṟingyishia kye wawoṙe wuragari kyipfa kya Ruwa, indi chi kyiiṙi kya wuṟango-pfo.

³Cha kyipfa, walaichi wusumganyi wo Ruwa, na wakundi iṟingyishia wusumganyi wowo wawenyi, walechilyio nyi wusumganyi wo Ruwa-pfo.

⁴Cha kyipfa Kristo amche kuwoṙe-se kyimaṙuma kya uwawaso-pfo; kundu orio aiṙikyie natalyio wusumganyi.

⁵Cha kyipfa Mose naleṟeia kui wusumganyi wuwukyie kui mawawaso, kye mndu ekyewuta isho nechiwaṙa moo kui isho.

⁶Indi wusumganyi wulya wokyewono kui iiṙikyia wogamba kuṙi: “Maa ulagambe mrimenyi kopfo, nyi wui echiṙo iyenda Ruwewu?” (Nyi kyimwi na isotsa Kristo na wanda).

⁷Ang'u, “Nyi wui echisoka iyenda ko waṟumu?” (Nyi kyimwi na iṙosia Kristo wuye, iwuka ko wapfu.)

⁸Kyaindi wusumganyi wogamba kuṙa? Ṙeṙo lyilya lyikyeri kufuhi na iyoe, ṙumbunyi lyapfo, na mrimenyi opfo, nyi ṙeṙo lyilya lya iiṙikyia lokyelyionguo.

⁹Cha kyipfa, koṟingyishia Yesu kui ṙumbu lyapfo kye nyi Mndumii, na iiṙikyia mrimenyi kopfo kye Ruwa nalemṟutsa ko wapfu, nochikyiṟo.

¹⁰Cha kyipfa kui mrima mndu nekyeiṙikyia mṟasa kawona wusumganyi, na kui ṙumbu nekyeṟingyishia kawona wukyiṟo.

¹¹Cha kyipfa kyiṟeio kyagamba, “Orio momwiṙikyia echiwona sonu-pfo.”

¹²Cha kyipfa kuwoṙe mbaṟe ingyi ko Myuda na Mkyiṟikyi-pfo, kyipfa oe nyi Mndumii o woose, awoṙe wunjama ko woose wekyemlaga;

¹³kyipfa orio mndu echilaga rina lya Mndumii nechikyiṟo.

¹⁴Kyasia wamlage kuṙa icho walamwiṙikyie? Lyingyi-se wamwiṙikyie kuṙa icho walandemwicho? Lyingyi-se wamwicho kuṙa icho kulawoṙe moonguo mbonyi?

¹⁵Lyingyi-se weonguo mbonyi kuṙa walawaṙume? Chandu kyikyiṟeie, “Gamecha cha kyikyi maṙende ga iwo wekyeonguo mbonyi tsa mecha.”

¹⁶Kyaindi chi woose waleindia mbonyi iya ngyicha-pfo, kyipfa Yesaya naigamba, “Mndumii, nyi wui aleiṙikyia mbonyi tsaṙu?”

¹⁷Kyasia iiṙikyia lyekyecha kui kyilya mndu aiicho; na kyilya mndu aiicho kyekyecha kui ionguo Ṙeṙo lya Kristo.

¹⁸Kyaindi ngyigamba, ngyesa wo waleicho-pfoe? Yee waleicho. “Ṟui lyawo lyileṙunganana wuyanenyi koose, na maṙeṙo gawo mṟasa matsitsionyi ga wuyana.”

¹⁹Indi ngyigamba, ngyesa Waisiraelyi walemanya-pfoe? Kya kuwooka Mose naigamba, “Ngyewawika wunyenyi kui wandu walakyeri Isanga, kui isanga lyilaichi kyindo ngyewapfulutsa nyashi.”

²⁰Na Yesaya awoṙe wuṟango na wukari wung'anyi, naigamba, “Ngyilekooyo nyi iwo walekyengyipfula, ngyileṟingyishio ko iwo walaiwesa mbonyi tsako.”

²¹Indi ko Isiraelyi naigamba, “Kyingoto puti ngyilewaleshia mawoko wandu walawoṙe wuindi na walekyeicho.”