Read Kivunjo New Testament 1999 Waroma 13 Bible Online

Waroma 13 - Kivunjo New Testament 1999 bible

Waroma 13

¹Orio mndu naindie wuchilyi na wang'anyi wa uruka, kyipfa kuwoṙe wuchilyi wulawukyie ko Ruwa-pfo; na wulya wukyeri pfo wuwukyie ko Ruwa.

²Koikyo molega awoṙe wuchilyi urukenyi na iwingana na kyilya Ruwa awawasie, na walya wekyewingana na oe wechianduyo.

³Kyipfa walya wekyechilyia wekyeowesha wandu kyipfa kya mecha-pfo, indi kyipfa kya mawuto mawicho. Kyasia nukundi ulaowuo awoṙe wuchilyi? Wuta shindo shicha na iyoe nochienengo kyiṟumi na iyoe nochiwona kyiṟumi kokye.

⁴Cha kyipfa oe nyi mṟundi o Ruwa kopfo kyipfa kya mecha. Indi kyiyeri owuta shindo shiwicho, owuo, kyipfa aiṙuo ushu wulya-pfo; cha kyipfa nyi mṟundi o Ruwa, ekyetaa kyiṟaache ulya ekyewuta shindo shiwicho kyipfa kya nyashi.

⁵Koikyo kyikuwaṟi iindia, chi kyipfa kya nyashi iya tupu-pfo, indi na kyipfa kya kyilya mrima ukundi.

⁶Lyingyi-se kyipfa kya ikyo taa mokyetaa kodi; kyipfa wo nyi waṟundi wa Ruwa, wechikaa iṟundenyi-lyo ilyo.

⁷Enengyenyi woose kyilya kyiwawaṟi, mndu o kodi, kodi; mndu o ukamba, ukamba; awaṟi iṙeṙemio, iṙeṙemio; awaṟi wuindi, wuindi.

⁸Maa mulariko nyi mndu kyindo kyoose, sile ikundana; cha kyipfa mokunda oṙoe naafutsia mawawaso.

⁹Kyipfa kulya igamba, Ulaṟuguye ang'u ulaṟuguyo, Ulawaage, Ulaiwe, Ulalangye; na kuwoṙe iwawaso lyingyi lyoose, lyasanzo na ṙeṙo-lyi, kye, “Kunda momṟasa opfo cha iyoe kumonyi.”

¹⁰Ikunda lyekyewutia momṟasa kyindo kyiwicho-pfo. Kyasia ikunda nyilyo lyaafutsia mawawaso.

¹¹Yee, lukomanya kyiyeri, kye kyiyeri kyeamka maṙoenyi kyamwafukyia; cha kyipfa wulalu wukyiṟo woṙu wukyeri kufuhi na soe kuta lyilya lulewooka iiṙikyia.

¹²Kyio nyi iiṙa kyii kyingoto kyamtikyira kufuhi; kyasia luṙe mawuto ga meema, na iṟaa shisha sha ngyeela.

¹³Chandu kyiwaṟi iwuto kyingoto luchumie kui wuyendelyi wucha. Chi kui ilya na ielewetsa na wunanzi-pfo, chi kui ukoe na wuṟui-pfo, chi kui shiloyano na wunyenyi-pfo.

¹⁴Indi irenyi shisha sha Mndumii Yesu Kristo, maa mulaambuye mmbiu, mṟasa muamtse lango tsacho.