Read Kivunjo New Testament 1999 Waroma 14 Bible Online

Waroma 14 - Kivunjo New Testament 1999 bible

Waroma 14

¹Mndu awoṙe iiṙikyia lyifofo, mwambilyienyi, indi mulamwanduye makusaṟo gakye.

²Mndu umwi nawoṙe iiṙikyia, nekyelya shoose; kyaindi ulya akyeri mfofo nekyelya mboka tsa maṟa.

³Ulya ekyelya alaanduye ulya alailya; kyipfa Ruwa naiṙikyiana na oe.

⁴Iyoe nyi wui uianduya mṟundi o mndu ungyi? Ko mndumii okye amonyi ulya nekyegoṟoka ang'u ioloka. Yee, nechigoṟotso cha kyipfa Mndumii neiṙima imgoṟotsa.

⁵Mndu umwi nekyewona kye mfiri yoose ifananyi-pfo. Ungyi nekyewona mfiri yoose ifananyi. Orio mndu nawute chandu wuṟango wokye womloṟa.

⁶Ulya mong'anyisa mfiri, nekyeung'anyisa ko Mndumii; na molya, nekyelya ko Mndumii, cha kyipfa naana Ruwa; lyingyi-se, ulya alekyelya ailya ko Mndumii-pfo, na oe taa naiana Ruwa.

⁷Kyipfa kuwoṙe mndu kyiiṙi kyaṙu ai na moo kyipfa kyakye amonyi, maa kuwoṙe mndu ekyepfa kyipfa kyakye-pfo.

⁸Cha kyipfa kokooya lokaa na moo, lui na moo kyiiṙi kya Mndumii, ang'u kokooya lopfa, lopfa ko Mndumii. Kyasia kokooya lokaa na moo ang'u kokooya lopfa, soe nyi masaa ga Mndumii.

⁹Kyipfa Kristo nalepfa kawaṙa-se moo kyipfa kya ikyi, nachilyie wapfu na wai na moo taa.

¹⁰Kyaindi iyoe ngyesa ny'kyilyi uianduya mono-womoo? Ang'u ngyesa iyoe ny'kyilyi uimina mono-womoo? Cha kyipfa soe loose lochigoṟoka mbele ya kyiṙi kya ianduyo kya Ruwa.

¹¹Cha kyipfa kyikyiṟeie, “Chandu ngyikyeri na moo, Mndumii nagamba, orio mndu nepfiria ndi mbele yako, na orio ulumi lochisenda Ruwa.”

¹²Kyasia nyi wuṙo, orio mndu kyiiṙi kyaṙu echiwuta mbonyi tsakye amonyi mbele ya Ruwa.

¹³Kyasia lulaengyeṟe ianduyana, indi nanga mowuta ianduya lya mbaṟe-i, mndu alawute kyindo kyetewe mono-wamae ang'u kyemwolotsa.

¹⁴Ngyiichi, ngoseṟa ngyimṟingyishie mnu kyiiṙi kya Mndumii Yesu, kye kuwoṙe kyindo kyifanyi kyimṟumoe wookyia mawookyionyi gakyo-pfo; kyaindi ko ulya awona kyindo kyifanyi kyimṟumoe, ko mndu-cho kyindo kyilya kyifanyi kyimṟumoe.

¹⁵Na mono-womoo kawoṙo nyi fowa kyipfa kya kyelya, noṙa ichumia ikundenyi. Kui kyelya kyapfo ulanyamaṟe mndu ulya Kristo alepfa kyipfa kyakye.

¹⁶Kyasia, wucha-wo wonyu wulasendo kui wuwicho.

¹⁷Kyipfa Wumangyi wo Ruwa chi ilya maa inyo-pfo, indi nyi wusumganyi na ufoṟo na sia Mumuyonyi Mweele.

¹⁸Kyipfa ulya aiṟundia Kristo mbonyi-tso tsekyechihiṟa Ruwa, na lyingyi-se nekyeiṙikyio nyi wandu.

¹⁹Kyasia kokooya nyi wuṙo, luoshe mbonyi tsa ufoṟo na mbonyi tsiwoṙe kyiira kui ikarishana.

²⁰Kyipfa kya kyelya ulanyamaṟe iṟunda lya Ruwa. Loi, shoose shishicha; indi nyi uwicho ko mndu ilya na ikuicho uwicho mrimenyi.

²¹Nyi kyicha iṙa ilya nyama maa inyo mpfinyo maa iwuta kyindo kyoose kyetewe mono-womoo naolokye.

²²Iiṙikyia lyilya uwoṙe ukae nalyo mrimenyi kopfo mbele ya Ruwa. Nanga mndu ulya alekyekuanduya mrimenyi kokye kui kyindo kyilya ekyekyiiṙikyia.

²³Kyaindi awoṙe ikapa kawi, kokooya alya naanduyo kye nanyamaṟie, kyipfa alya kui iiṙikyia-pfo. Na orio kyindo kyilawukyie iiṙikyienyi nyi wunyamaṟi.