Read Kivunjo New Testament 1999 Waroma 15 Bible Online

Waroma 15 - Kivunjo New Testament 1999 bible

Waroma 15

¹Kyasia kyiluwaṟi soe luwoṙe pfinya iṙuo wufofo wo iwo walawoṙe pfinya, maa kyiluwaṟi iwuta shindo sheluchihiṟa soe luwenyi-pfo.

²Orio mndu kyiiṙi kyaṙu nachihiṟe momṟasa okye, naambilyie wucha, kundu naiṙime ikarisha iiṙikyia lyakye.

³Cha kyipfa Kristo alewuta shindo shekuchihiṟa amonyi-pfo; indi chandu kyikyiṟeie, “Shilahio shawo walekulahia iyoe shilengyikooya inyi.”

⁴Cha kyipfa shoose shilesonguo iṟeio shileṟeio kundu shiluloshe soe; kundu kui wusimiri na iwiyiṟio moo lya shiṟeio luiṙime iwaṙa ikusuria.

⁵Na Ruwa ai o wusimiri na iwiyiṟia moo namuenengye ikusuria kyindo kyimwi nyoe wenyi ko wenyi kui mfano o Kristo Yesu;

⁶kundu kui mrima umwi na kui ṙumbu lyimwi muiṙime iṟumisha Ruwa, Awu o Mndumii oṙu Yesu Kristo.

⁷Koikyo muambilyiane nyoe wenyi ko wenyi, chandu na Kristo aleluambilyia, kundu Ruwa nang'anyiso.

⁸Kyipfa ngyigamba kye Kristo ammba mṟundi o mma o iṙino kyipfa kya wuloi wo Ruwa, kundu naṟingyishie shiteṟio waku waṙu waleenengo.

⁹Lyingyi-se kundu wandu walakyeri Wayuda waṟumishe Ruwa kyipfa kya ihooṟia lyakye; chandu kyikyiṟeie, “Koikyo ngyekuana wandunyi walakyeri Wayuda, na inyi ngyeimbia rina lyapfo.”

¹⁰Lyingyi-se nagamba, “Chihiyonyi, wandu walakyeri Wayuda, hamwi na wasambuṟe wa Ruwa.”

¹¹Lyingyi-se, “Nyoe wandu moose mulakyeri Wayuda, ṟumishenyi Mndumii nyoe wandu moose, mng'anyisenyi.”

¹²Na lyingyi-se Yesaya nagamba, “Kochiwaṙa mndu kyisharinyi kya Yese, na oe nechichilyia wandu walakyeri Wayuda, nawo wechikusuria kokye.”

¹³Kyasia-ng'u Ruwa mokusuria namuichuṟe nyoe sia yoose na ufoṟo iiṙikyienyi, kundu muengyeṟikye mnu iwaṙa ikusuria, pfinyenyi tsa Mumuyo Mweele.

¹⁴Wana wa wama wako, inyi ngyimonyi ngyileṟingyishio kui mbonyi tsanyu kye mui wandu wecha, muwaenengye wuṟango woose; lyingyi-se moiṙima itutumana.

¹⁵Indi ngyimuṟeia, kui wukari ngoseṟa ngyuurenyi tsingyi tsa paruo-i, cha imukumbuṟa, kui isaṟia lyilya ngyileenengo nyi Ruwa,

¹⁶kundu ngiwe mṟundi o Kristo Yesu wandunyi walakyeri Wayuda. Ngyiṟundie Ndumi Ngyicha ya Ruwa iṟunda lya wukohanyi, kundu wandu walakyeri Wayuda wawe kyiano kyechiambilyio, kyikamwilyiṟo nyi Mumuyo Mweele.

¹⁷Kyasia, ngyiwoṙe kyimaṙuma kyewona kyiṟumi kyiiṙi kya Kristo Yesu mbele ya Ruwa.

¹⁸Kyipfa ngyekaria igamba kyindo Kristo alakyiwutie kui iṟunda lyako-pfo, wandu walakyeri Wayuda waiṙime iindia kui iṙeṙa ang'u kui mawuto,

¹⁹kui pfinya tsa kyiṟingyishio na maṟiyisho, pfinyenyi tsa Mumuyo Mweele; mṟasa kyikawa wookyia Yerusalemu, na mṟasenyi mṟasa Ilyiriko, ngamwonguo Ndumi Ngyicha ya Kristo chandu kyiwaṟi.

²⁰Na wuṙo-se ngyechitambagana ionguo Ndumi Ngyicha, ngyilaonguo handu rina lya Kristo lyammarise igambo, ngyilachewika numba wuye ya mndu ungyi.

²¹Indi chandu kyikyiṟeie, “Walya walandeongoyo mbonyi tsakye wechiwona, na walya walandeicho wechimanya.”

²²Ny'kyo kyitewe ngyileimo kyiyeri kyifoi ngyilache na konyu.

²³Kyaindi wulalu, cha kyipfa kulawoṙe-se kyindo kyingyishingyie ngyuura tsa kunu, lyingyi-se wookyia maka ifoi ngyilangyie icha na konyu;

²⁴kyiyeri kyoose ngyechipfunga kyaro kyeyenda Spania [ngyeecha na konyu]. Cha kyipfa ngyikusurie immbona nyoe kyaronyi kyako, na iṙoo kyaro na nyoe, mrima oko uchihiyo kyitutu kyipfa kyanyu.

²⁵Indi wulalu ngyiyenda Yerusalemu, ngyechiṟundia wandu wa Ruwa;

²⁶kyipfa kyachihiṟa wandu wa Makyedonia na Akaya wasanie kyindo kyetarama wandu wa Ruwa wai wafofo ipfo Yerusalemu.

²⁷Yee, kyachihiṟa wandu wa Makyedonia, lyingyi-se wairiko nyi wandu walya wafofo wa Yerusalemu. Cha kyipfa kokooya wandu walakyeri Wayuda waleambilyia iwuka kowo shindo sha mrima, kyawakooya wo iwatarama kui shienengo sha kyiwuyana.

²⁸Ngammarisa iṟunda-lyo na iwaenengyia kyilya kyilesanio kyipfa kyawo, ngyeiṙia konyu ngyechiyenda Spania.

²⁹Ngyiichi kye ngacha na konyu ngyemuendie mboṟa ing'anyi ya Kristo.

³⁰Kyasia-ng'u, wana wa wama wako, ngyimuterewa kyipfa kya Mndumii oṙu Yesu Kristo, na kyipfa kya ikunda lyekyeendo nyi Mumuyo, pfuṟukanenyi hamwi na inyi shiterewonyi shanyu kyipfa kyako mbele ya Ruwa.

³¹Terewenyi kundu ngyilakapo nyi walya walaiṙikyie Yesu urukyenyi lo Uyuda, na lyingyi-se kundu iṟunda ngyiwoṙe ipfo Yerusalemu lyiiṙikyio nyi wandu wa Ruwa.

³²Ngyiiṙime ishika konyu kui sia, chandu Ruwa akundi, ngyiiṙime ionyonya hamwi na nyoe.

³³Ruwa o ufoṟo nawe na nyoe moose. Amen.