Read Kivunjo New Testament 1999 Waroma 6 Bible Online

Waroma 6 - Kivunjo New Testament 1999 bible

Waroma 6

¹Kyasia lugambe kyikyi-ng'u? Lukae wunyamaṟinyi kundu isaṟia lyiengyeṟe ifo?

²Maa ale! Soe lulawoṙe-se moo o wuta sha wunyamaṟi lochikaa-se luṙa wunyamaṟinyi?

³Muichi kye soe loose lulepatiso kyiiṙi kya Kristo Yesu lulepatiso upfunyi lokye?

⁴Kyasia luleṟiko hamwi na oe kui njia ya wupatiso upfunyi lokye, kundu luwaṙe moo ngyihya nakamwi chandu Awu aleṟutsa Kristo iwuka upfunyi kui pfinya yakye ing'anyi.

⁵Cha kyipfa chandu lulelungana na oe mfanonyi o upfu lokye na wuṙo lowelungana na oe mfanonyi o iṟuka lyakye.

⁶Luichi mbonyi-tsi kye, mkaṟo oṙu o kacha ulekapio msalabenyi hamwi na oe, kundu mmbiu o wunyamaṟi uilachikye lulachilyio-se nyi wunyamaṟi.

⁷Kyipfa oe alepfa naletalyio wusumganyi kuleshi na wunyamaṟi.

⁸Kyaindi lui kye lulepfa hamwi na Kristo, luiṙikyie kye lochiwaṙa moo hamwi na oe;

⁹luichi kye Kristo kamṟuka ko wapfu epfa-se-pfo, maa upfu lomchilyia-se-pfo.

¹⁰Kyipfa kui ipfa lyakye, wunyamaṟi woiṙima-se imchilyia-pfo; indi kulya oe iwaṙa moo, nawaṙa moo ko Ruwa.

¹¹Na wuṙo maa nyoe kutalenyi kye muwapfu ko mbonyi tsa wunyamaṟi, na wai na moo ko Ruwa kyiiṙi kya Kristo Yesu.

¹²Kyasia, wunyamaṟi wulachilyie mmbiunyi yanyu yekyepfa mṟasa mukoosha lango tsayo.

¹³Maa mulaengyeṟe iwuta shiwungo shanyu shiwe shisha sha mbaka ko wunyamaṟi. Indi kuwutenyi muwenyi ko Ruwa cha wai na moo numa ya ipfa, na shiwungo shanyu ko Ruwa iwa shisha sha wusumganyi.

¹⁴Kyipfa wunyamaṟi wochimuchilyia nyoe-pfo, cha kyipfa muwachilyie nyi mawawaso-pfo, indi muwachilyie nyi isaṟia.

¹⁵Kyasia ny'kyikyi-ngu? Luwute wunyamaṟi kyipfa lulawachilyie nyi mawawaso indi isaṟia? Ote!

¹⁶Muichi kye icho muiwuta mrima yanyu kokye iwa waṟundi wakye kyiiṙi kya imwindia, mowa waṟundi wakye ulya muimwindia, kokooya nyi wuṟundi wo wunyamaṟi wokyeende upfu, ang'u kokooya nyi wuṟundi wo wuindi wokyeende wusumganyi.

¹⁷Kyaindi Ruwa naano, cha kyipfa muwewachilyie nyi wunyamaṟi, indi muleindia kui mrima yanyu mbaṟe iya ya wuṟango wulewiko wumchilyie.

¹⁸Na mommbiko kuleshi na wunyamaṟi, mukochilyio nyi wusumganyi.

¹⁹Ngyiṙeṙa kui mbaṟe ya kyimndu kyipfa kya wufofo wo mmbiu yanyu. Cha kyipfa chandu mulewuta shiwungo shanyu shiṟunde mbonyi tsa ukoe na wunyamaṟi muiṙime iwuta wunyamaṟi, na wuṙo-ng'u wulalu wutenyi shiwungo shanyu shiṟunde sha wusumganyi muiṙime iyeṟemtso.

²⁰Kyipfa kyiyeri muwewachilyie nyi wunyamaṟi, muwekyeri kuleshi na wusumganyi.

²¹Kyasia nyi kyiira kyiha-ng'u mulewona mfiri iya ko shindo-sho shimuriisa sonu wulalu? Kyipfa mafurumionyi ga shindo-sho nyi upfu.

²²Kyaindi wulalu mukomlekyio, na iwa kuleshi na wunyamaṟi, na iwa waṟundi wa Ruwa, muwoṙe kyiira kyanyu, nyikyo iilyisho, na mafurumionyi gakyo nyi moo o mlungana.

²³Kyipfa wori wo wunyamaṟi nyi upfu, indi kyisumbo kya Ruwa nyi moo o mlungana kyiiṙi kya Kristo Yesu Mndumii oṙu.