Read Kivunjo New Testament 1999 Waroma 7 Bible Online

Waroma 7 - Kivunjo New Testament 1999 bible

Waroma 7

¹Wana wa wama wako, muichi (kyipfa ngyiṙeṙa na iwo waichi mawawaso), kye mawawaso gekyechilyia mndu ilyi akyeri na moo?

²Kyipfa mndu mka awoṙe mii nampfungye nyi mawawaso ko ulya amwalyikyie kyiyeri akyeri na moo. Indi kapfa ulya amwalyikyie, nalekyio iwuka iwawasonyi lya wolyi.

³Kyasia kyiyeri mii okye akyeri na moo, kokooya mka-chu awaṙa mii ungyi nekyelago mṟui. Indi mii okye kapfa, nalekyio, eshingyio-se nyi iwawaso lyilya-pfo, na oe chi mṟui-se-pfo, maa kaalyiko nyi mii ungyi.

⁴Na wuṙo, wana wa wama wako, nyoe taa muwoṙe-se moo o osha uwawaso-pfo, kyipfa mukyeri kyoonyi kya mmbiu o Kristo, muiṙime iwa masaa ga ungyi, ulya aleṟuka ko wapfu, kundu soe lukumbie ndunda ko Ruwa.

⁵Kyipfa kyiyeri luwekyeri na mbaṟe ya mmbiu, lango tsa wunyamaṟi tsiwekyeri pfo kyipfa kya uwawaso, tsileṟunda mmbiunyi yaṙu lukopfa.

⁶Indi wulalu lolekyio iwuka uwawasonyi, luwoṙe-se moo o osha wunyamaṟi wulya wuleluchilyia-pfo, kundu soe luiṙime iṟunda mbaṟenyi ngyihya ya Mumuyo o Ruwa, chi mbaṟenyi ya kacha ya kyiṟeio-pfo.

⁷Kyasia lugambe kyikyi-ng'u? Uwawaso nyi wunyamaṟi? Ote! Indi ngyiweiṙima imanya wunyamaṟi sile nyi kui mawawaso-pfo; cha kyipfa kokooya uwawaso lulalegamba “Ulalangye” gyiwechimanya ilanga-pfo.

⁸Kyaindi wunyamaṟi wulewona ṙaawa ko iwawaso lyilya, wukowuta mrimenyi koko orio mbaṟe ya ilanga. Kyipfa wunyamaṟi kulawoṙe mawawaso upfiie.

⁹Na inyi ngyiwekyeri na moo ipfo mawookyionyi kulawoṙe mawawaso, indi kyiyeri iwawaso lyilya lyilecha, wunyamaṟi wulewaṙa pfinya na inyi ngapfa.

¹⁰Ngawona iwawaso lyilya lyekyeende moo kye koko inyi lyileende upfu.

¹¹Kyipfa wunyamaṟi, kui iwona ṙaawa ko iwawaso lyilya, wulengyilemba, koikyo wukongyiwaaga.

¹²Kyasia uwawaso lungyiele. Na iwawaso lyilya lyilyiele, na lya wusumganyi, na lyilyicha.

¹³Kyasia-ng'u ngyesa, lyilya lyikyeri lyicha lyiwekyeri upfu koko inyi? Ote! Indi wunyamaṟi, kundu wuwono kye nyi wunyamaṟi loi, wulengyiwaaga kui iwawaso lyilya lyicha, kundu kui iwawaso lyilya wunyamaṟi wuengyeṟe iwiha mnu.

¹⁴Cha kyipfa luichi kye uwawaso mawookyionyi galo nyi mrimenyi; indi inyi nyi mndu o mmbiunyi, ngyimchilyie nyi wunyamaṟi.

¹⁵Kyipfa ngyiichi kyindo ngyiwuta-pfo; cha kyipfa kyilya ngyikundi, ngyikyiwuta-pfo; indi kyilya ngyikyisuuye nyikyo ngyekyewuta.

¹⁶Kyaindi kokooya ngawuta kyilya ngyilakyikundi, ngaiṙikyia kye iwawaso lyilya lyilyicha.

¹⁷Kyasia wulalu chi inyi mrimenyi koko ngyiwuta ikyo-pfo, indi nyi wunyamaṟi wulya wukyeri mrimenyi koko.

¹⁸Cha kyipfa ngyiichi kye mrimenyi koko, lugambe mmbiunyi oko, kokyekaa kyindo kyicha-pfo cha kyipfa ikunda ngyikundi, indi iwuta kyindo kyicha ngiiṙima-pfo.

¹⁹Cha kyipfa kyilya kyicha ngyikyikundi ngyikyiwuta-pfo; indi kyilya kyiwicho ngyilakyikundi nyikyo ngyekyewuta.

²⁰Kyasia kokooya kyilya ngyilakyikundi nyikyo ngyikyiwuta, chi inyi mrimenyi koko ngyikyiwuta-pfo, indi nyi wunyamaṟi wulya wukyeri mrimenyi koko.

²¹Kyasia ngawona iwawaso-lyi, kye koko inyi ngyikundi iwuta kyindo kyicha, kuwoṙe lyilyiwicho.

²²Cha kyipfa mrimenyi koko ngyimchihiye kyipfa kya iwawaso lya Ruwa.

²³Kyaindi shiwungonyi shako, ngyiwonyi iwawaso lyikyeri kuleshi, lyikapana shiṙa na iwawaso lyilya lya wuṟango woko, na ingyiwaṙa ko pfinya kui iwawaso lyilya lya wunyamaṟi lyikyeri shiwungonyi shako.

²⁴Ochia loko, mkyiwa inyi, nyi wui echingyiletsa na mmbiu-chu o upfu?

²⁵Ngyiana Ruwa, kui Yesu Kristo Mndumii oṙu. Kyasia, kokooya nyi wuṙo, inyi ngyimonyi kui wuṟango woko ngyiṟundia iwawaso lya Ruwa, indi kui mmbiu oko iwawaso lya wunyamaṟi.