Read Kivunjo New Testament 1999 1 Wakorinto 11 Bible Online

1 Wakorinto 11 - Kivunjo New Testament 1999 bible

1 Wakorinto 11

¹Ngyioshenyi chandu na inyi ngyekyeosha Kristo.

²Kyasia ngyimuiring'isha nyoe, cha kyipfa mulengyikumbuo shindonyi shoose, na nyoe muleosha shilya muleambilyia ko waku wanyu wuṙo chandu ngyilemuenengyia shilya ngyileambilyia.

³Kyaindi ngyikundi mumanye kye msongoru o mndu msoṟo nyi Kristo, na msongoru o mndu mka nyi mndu msoṟo, na msongoru o Kristo nyi Ruwa.

⁴Orio mndu msoṟo kyiyeri aiterewa Ruwa, ang'u kyiyeri aiṙeṙa mbele ya wandu, na oe namshikyie mṙoe, nairiisa mṟoe okye sonu.

⁵Indi orio mndu mka kyiyeri aiterewa Ruwa, ang'u kyiyeri aiṙeṙa mbele ya wandu, mṙoe okye ulamshikyie, nairiisa mṙoe okye sonu; cha kyipfa nyi kyimwi na ulya ammbute njui.

⁶Kyipfa mndu mka alandeshikyio nawuto njui. Ang'u kokooya nyi sonu mndu mka iwuto njui tsakye ang'u iṟemo nashikyio.

⁷Kyipfa loi mndu msoṟo awaṟi ishikyio mṙoe-pfo, kyipfa oe nyi mfano o mng'ano o Ruwa. Kyaindi mndu mka nyi mng'ano o mndu msoṟo.

⁸Kyipfa mndu msoṟo alewuto ko mndu mka chandu mndu mka alewuto ko mndu msoṟo-pfo.

⁹Maa mndu msoṟo alegumbo kyipfa kya mndu mka chandu mndu mka alegumbo kyipfa kya mndu msoṟo-pfo.

¹⁰Kyipfa kya ikyo mndu mka nawaṟi ishikyia mṙoe okye iloṟa kye namwenengye momu o wuta shilya malaika wekyeambuya.

¹¹Kyaindi kyiiṙi kya Mndumii kuwoṙe mndu mka kulawoṙe mndu msoṟo-pfo; maa kuwoṙe mndu msoṟo kulawoṙe mndu mka-pfo.

¹²Kyipfa chandu mndu mka alewuka ko mndu msoṟo, na wuṟo mndu msoṟo na oe nekyefeo nyi mndu mka; na shindo shoose shiwukyie ko Ruwa. Anduyenyi nyoe muwenyi mrimenyi konyu.

¹³Ngyesa kyichihiṟie mndu mka naterewe Ruwa mṙoe okye ulamshikyie?

¹⁴Ngyesa chandu mndu amugumbe kyimlosha kye mndu msoṟo kawaṙa njui tsileshi nyi sonu kokye-pfoe?

¹⁵Kyaindi mndu mka kawaṙa njui tsileshi nyi kyiṟumi kokye. Cha kyipfa namwenengye njui-tso tsileshi kundu tsikae handu ha nguwo.

¹⁶Kyaindi mndu oose kakunda iende wuṟiingyi, soe luwoṙe mkaṟo cha iyo-pfo, maa siṟi tsa Ruwa.

¹⁷Kyaindi kyiiṙi kya immbia ishi, ngyimuiṟing'isha nyoe-pfo, kyipfa kyiyeri-kyo mokyesanzia handu hamwi mokyewuta kuṙo kyipfa kya wucha-pfo indi kyipfa kya wuwicho.

¹⁸Cha kyipfa kuwooka kyiyeri mokyesanzia handu hamwi cha siṟi ngyiichuoe kye mukyeri kyindo kyimwi-pfo; na inyi ngyiiṙikyie ikyo piu-pfo;

¹⁹cha kyipfa kyiwaṟi konyu kuwaṙe iṙeṙa wongo; kundu walya wawalage loi wamanyikye konyu.

²⁰Kyasia kyiyeri mosanzia handu hamwi moiṙima ilya kyilaayo kya Mndumii-pfo;

²¹cha kyipfa orio umwi nekyesonguo iwuta kyelya kyakye kyiiṙi kya ilya-lyo; mṟasa kyikawa ichu nawoṙo nyi njaa na ichu namnanzi.

²²Ngyesa muwoṙe numba yelyiia kyelya kya Mndumii na yenyooya shindo shenanza-pfoe? Ang'u mumina Siṟi ya Mndumii, na iriisa sonu iwo walawoṙe kyindo? Ngyimmbie? Ngyimuiring'ishe nyoe? Ote! Ngyimuiring'isha kyipfa kya isho-pfo.

²³Cha kyipfa inyi ngyileambilyia ko Mndumii shilya ngyilemuenenga nyoe. Kye Mndumii Yesu kyio kyilya aleṟiingo naleira mkate,

²⁴na oe amwane Ruwa kaupeṟenguo, kagamba, “Ichu nyi mmbiu oko ummbute kyipfa kyanyu; wutenyi kuṙi kui ingyikumbuo inyi.”

²⁵Na wuṙo numa ya ilya kaira kyiṙoo, echigamba, “Kyiṙoo-kyi nyi mma mhya samunyi yako; wutenyi kuṙi orio kyiyeri muinyo, kui ingyikumbuo.”

²⁶Kyipfa orio kyiyeri muilya mkate-chu na inyo iwuka kunu kyiṙoonyi, muonguo mbonyi tsa upfu lo Mndumii mṟasa kyiyeri echicha.

²⁷Kyasia orio mndu alawaṟi alya mkate-cho, ang'u inyo iwuka ipfo kyiṙoonyi kya Mndumii, nalahia Ruwa ko mbonyi tsa upfu lo Yesu msalabenyi.

²⁸Kyaindi mndu nakuwese mrimenyi kokye kokooya mbonyi tsikyeri necha, naaho nalye mkate na inyo iwuka kyiṙoonyi.

²⁹Kyipfa alya na inyo, nekyelya na inyo ianduyo lya mrima okye, kokooya alemo imanya mmbiu o Mndumii nyi kyikyi.

³⁰Kyipfa kya ikyo kuwoṙe wandu wafoi konyu waluoe na wafafa, na waata walempfa.

³¹Kyipfa kokooya loambuya kuwooka kyilya kyikyeri mrimenyi koṙu kuwoṙe kyindo kyeiṙima iluenenga ianduyo kyiyeri-kyo luilya Kyilaayo kya Mndumii-pfo.

³²Indi kyiyeri loanduyo, lotoṟisho nyi Mndumii, kundu nyashi ya Ruwa wawaṟi wandu wa wuyana ilacheluolokyia.

³³Koikyo, wana wa wama wako, kyiyeri mosanzia handu hamwi muiṙime ilya, muweṙane.

³⁴Mndu kawoṙo nyi njaa, nalye kanyi kokye; kundu kyiyeri-kyo mosanzia handu hamwi mulachewuta shindo shechienenga Ruwa imuolotsia ngapo yakye. Na isho shatsugaa ngyechishiachikyia kyiyeri-kyo ngyechicha.