Read Kivunjo New Testament 1999 1 Wakorinto 15 Bible Online

1 Wakorinto 15 - Kivunjo New Testament 1999 bible

1 Wakorinto 15

¹Kyasia, wana wa wama wako, ngamukumbuṟa mbonyi tsa Ndumi Ngyicha ngyilemuongoya; iya muleiambilyia, na kyiiṙi kyayo mugoṟokyi;

²na kui yo muikyiṟo; kokooya muiosha mbonyi tsilya ngyilemuongoya; sile kokooya muleiṙikyia kya wulya.

³Cha kyipfa ngyilemuenenga iho mawookyionyi shilya ngyileambilyia inyi ngyimonyi, kye Kristo nalepfa kyipfa kya ngyuunyamaṟi tsaṙu, chandu shiṟeio shiele shagamba.

⁴Na kye naleṟiko; na kye naleṟuka mfiri o kaṟaaṟu, chandu shiṟeio shiele shagamba.

⁵Na kye nalewonekyia Kyefa; lyingyi-se na walya ikumi na wawi.

⁶Numa ya iho nalewonekyia wandu wekyeosha Yesu ngoseṟa ya magana gataanu; na kyiiṙi kya iwo wafoi wai na moo mṟasa wulalu; indi waata walempfa.

⁷Numa ya iho kachia Yakobo; lyingyi-se na wasu woose.

⁸Na mafurumionyi ga wandu woose nalengyichia inyi, cha mndu alefeo kyilakyeri kyiyeri kyakye.

⁹Kyipfa inyi ngyimtutu kuta wasu woose, ngyilawaṟi ilago msu, cha kyipfa ngyilelyisa Siṟi ya Ruwa wukyiwa.

¹⁰Kyaindi kui isaṟia lya Ruwa ngawa kuṙi chandu ngyikyeri; na isaṟia lyikyeri koko chi wulya-pfo, indi ngyileengyeṟa mnu iṟunda kuta wo woose; maa chi inyi-pfo, indi nyi isaṟia lya Ruwa hamwi na inyi.

¹¹Kyasia, kokooya nyi inyi, kokooya nyi walya, nyi wuṙo lokyeonguo mbonyi, na nyi wuṙo muleiṙikyia.

¹²Kyasia, kokooya mbonyi tsa Kristo tsigambo kye naleṟuka ko wapfu, ny'kyilyi wandu waata kyiiṙi kyanyu waigamba kye kuwoṙe iṟutso lya wapfu-pfo.

¹³Kyaindi kokooya kulawoṙe iṟutso lya wapfu, Kristo na oe aleṟuka-pfo.

¹⁴Lyingyi-se kokooya Kristo alaleṟuka, kyasia ionguo mbonyi lyaṙu nyi wulya na iiṙikyia lyanyu nyi wulya.

¹⁵Yee, na soe lowa cha waṟingyishi wa wongo wa Ruwa; cha kyipfa luleṟingyishia kye Ruwa naleṟutsa Kristo, ulya alalemṟutsa, kokooya wapfu walekyeṟutso.

¹⁶Kyipfa kokooya wapfu walekyeṟutso, Kristo na oe aleṟuka-pfo.

¹⁷Na kokooya Kristo alaleṟuka, iiṙikyia lyanyu nyi lya wulya; muwekyeri ngyuunyamaṟinyi tsanyu.

¹⁸Na iho walya walepfa waiṙikyie Kristo waleṙeka.

¹⁹Kokooya nyi kyiiṙi kya moo-chu tikyi lulekusuria Kristo, soe nyi wakyiwa kuta wandu woose.

²⁰Kyaindi wulalu Kristo naṟuka ko wapfu, iloṟa na pata kye na wuṙo Ruwa echiṟutsa walya wapfiie.

²¹Kyipfa kokooya upfu luleendo nyi mndu, na wuṙo iṟutso lya wapfu lyileendo nyi mndu.

²²Cha kyipfa kyiiṙi kya Adamu woose wekyepfa, na wuṙo kyiiṙi kya Kristo woose wechienengo moo.

²³Kyaindi orio umwi handu hakye; o kuwooka iṟuka ko wapfu nyi Kristo; numa walya wakyeri wa Kristo, kyiyeri echicha.

²⁴Iho nyiho mafurumionyi, kyiyeri echienenga Ruwa Awu Wumangyi wokye; kyiyeri echiwinga pfinya tsa mumuyo yekyechilyia wuyana.

²⁵Cha kyipfa kyiwaṟi nachilyie oe, mṟasa nawingye washituwa woose.

²⁶Mokyituwa o mafurumionyi echiwingo nyi upfu.

²⁷Chandu shiṟeio shiele shagamba, “Nalewika shindo shoose wanda ya wuchilyi wokye.” Kyaindi kyiyeri echigamba, “Shindo shoose shawingo,” nyi kyindo kyii na pata kye ulya alemmbingyia shindo shoose akyeri ho-pfo.

²⁸Kyasia, shindo shoose shikammbingo na iwiko wanda yakye, nyi lyo-ndu Mana o Adamu amonyi na oe echiwiko wanda ya ulya alewika shindo shoose wanda yakye, kundu Ruwa nawe shoose kyiiṙi kya shoose.

²⁹Ang'u ngyesa walya wekyepatiso kyipfa kya wapfu wewika kuṙa? Kokooya wapfu walekyeṟutso maa ale, kyitewe kyepatiso kyipfa kyawo nyi kyikyi?

³⁰Na soe kyitewe lukyeri ngataṟenyi orio saa ny'kyi?

³¹Yee, wana wa wama, ikushela-lyi lyako ngyikyeri nalyo kyipfa kyanyu kyiiṙi kya Kristo Yesu Mndumii oṙu, ngyekyepfa orio mfiri.

³²Kokooya, kui mboṟa ya kyimndu, kulya Efeso ngyilekapana na wandu wawicho cha mando ga saka, ngyiwoṙe kyiiṙa kyiha? Wapfu walandeṟutso, lulye na inyo, kyipfa ngama lochipfa.

³³Maa mulalembo nyi wandu. Wandu wawicho wekyenyamaṟa mkaṟo mcha.

³⁴Ambuyenyi necha; maa mulawute kya wunyamaṟi; cha kyipfa wengyi waichi Ruwa-pfo. Ngyigamba isho kundu ngyimuriise sonu.

³⁵Kyaindi kofia mndu negamba, “Wapfu wekyeṟutso kuṙa? Nawo wekyecha na mmbiu uha?”

³⁶Iyoe tondo! Kyilya okyeṙonga kyekyewaṙa moo kyilandepfe-pfo.

³⁷Na kyilya okyekyiṙonga, okyeṙonga mmbiu ulya uicha-pfo, indi nokyeṟonga mbeu tikyi, kokooya nyi ya nganu ang'u ingyi;

³⁸kyaindi Ruwa nekyeienenga mmbiu chandu akundi, na orio mbeu mmbiu oyo.

³⁹Mmbiu yoose chi mmbiu umwi-pfo; indi mmbiu ingyi nyi ya wandu, ingyi nyi ya mando ga saka, ingyi nyi ya shileye, ingyi ya makunga.

⁴⁰Lyingyi-se kuwoṙe mmbiu ya ruwewu, na mmbiu ya wuyanenyi; kyaindi mng'ano o iya ya ruwewu wufananyi na mng'ano o iya ya wuyanenyi-pfo.

⁴¹Kuwoṙe mng'ano o mnengyeṟi, na mng'ano o mori, na mng'ano ungyi o nyenyeri; kyipfa mng'ano o nyenyeri imwi na ingyi ufananyi-pfo.

⁴²Na wuṙo na iṟutso lya wapfu. Kyekyeṙongo kyinyamaṟikyie, kyekyeṟutso kyilanyamaṟikyie.

⁴³Kyekyeṙongo sonunyi, kyekyeṟutso mng'anonyi. Kyekyeṙongo wufafenyi, kyekyeṟutso pfinyenyi.

⁴⁴Kyekyeṙongo mmbiu o teri, kyekyeṟutso mmbiu o mumuyo. Kokooya kuwoṙe mmbiu o teri, na o mumuyo taa ukyeri pfo.

⁴⁵Nyi wuṙo kyikyiṟeie, “Mndu o kuwooka, Adamu, nalewa kyindo kyiwoṙe moo, Adamu o mafurumionyi nyi mumuyo okyeende moo.”

⁴⁶Kyaindi okyesongoya ulya o mumuyo-pfo, indi ulya o teri; numa ya iho okyecha ulya o mumuyo.

⁴⁷Mndu o kuwooka nalewuka urukyenyi, nyi o teri. Mndu o kawi nalewuka ruwewu.

⁴⁸Chandu akyeri ulya o teri, nyi wuṙo wakyeri walya wa teri; na chandu akyeri ulya o ruwewu, nyi wuṙo wakyeri walya wa ruwewu.

⁴⁹Na chandu luleṙuo fana yakye ulya o teri, na wuṙo lochiṙuo fana yakye ulya akyeri o ruwewu.

⁵⁰Wana wa wama wako, shindo ngyigamba nyi ishi, kye mmbiu na samu sheiṙima ioṟa Wumangyi wo Ruwa-pfo. Maa kyindo kyinyamaṟikyie ioṟa kyindo kyilanyamaṟikyie-pfo.

⁵¹Ngammbia kui kyiṟika; lochipfa loose-pfo, kyaindi loose lochiilachika,

⁵²na cha mndu akyema, kyiyeri kya iraa lya mafurumionyi; kyipfa iganda lyechikapo, na wapfu wechiṟutso, walanyamaṟikye, na soe lochiilachika.

⁵³Kyipfa kyiwaṟi mmbiu-chu okyenyamaṟika ulanyamaṟikye, na ichu okyepfa ulapfe.

⁵⁴Kyasia kyiyeri mmbiu-chu okyenyamaṟika ulechinyamaṟika, na mmbiu-chu okyepfa ulechipfa, nyi lyo-ndu kyeafukyia kyindo kyilya kyikyiṟeie, “Upfu lulemeṟo kui iwinga.

⁵⁵Iwinga lyapfo nyi kwi lyikyeri iyoe upfu? Iwawio lyapfo nyi kwi lyikyeri, iyoe upfu?

⁵⁶Iwawio lya upfu nyi wunyamaṟi, na pfinya ya wunyamaṟi nyi uwawaso.”

⁵⁷Kyaindi Ruwa naano, ekyeluenenga iwinga kui Mndumii oṙu Yesu Kristo.

⁵⁸Kyasia, wana wa wama wakunde, kuwanzenyi, mulalolome, muengyeṟe mnu iṟundia Mndumii mfiri yoose, cha kyipfa muichi kye iṟunda lyanyu chi wulya kyiiṙi kya Mndumii-pfo.