Read Kivunjo New Testament 1999 1 Wakorinto 2 Bible Online

1 Wakorinto 2 - Kivunjo New Testament 1999 bible

1 Wakorinto 2

¹Kyasia, wana wa wama, kyiyeri ngyilecha na konyu, ngyilecha imuongoya shiṟika sha Ruwa kui maṙeṙo mecha ang'u wuṟango-pfo.

²Kyipfa ngyileṙumbuo mrimenyi ngyilamanye kyindo kyoose konyu sile Yesu Kristo, na oe nalekapio msalabenyi.

³Na inyi ngyiwekyeri konyu wufofonyi na wuowunyi na iṙeṙema lying'anyi.

⁴Na mbonyi tsako na ilosha lyako lya Ṙeṙo lya Ruwa kuwei kui maṙeṙo ga wuṟango wokyekuruo ngyuuṟango tsa wandu-pfo, indi kui iloṟa kye Mumuyo o Ruwa naweiṟunda na pfinya,

⁵kundu iiṙikyia lyanyu lyilawe wuṟangonyi wo wandu, indi pfinyenyi tsa Ruwa.

⁶Kyaindi kuwoṙe wuṟango luwuonguoe ko walya wapfulukyie kyimrima; indi chi wuṟango wo wuyana-wu-pfo, maa wo iwo waichilyia wuyana-wu, wekyeilachika-pfo.

⁷Indi lokyeonguo wuṟango wo Ruwa kui kyiṟika, wuṟango wulya wuwuṟikye, wulya Ruwa awekundi luuonguo wookyia mawookyionyi, kundu lung'anyiso.

⁸Wuṟango walya wachilyie wuyana-wu walawuichi maa umwi; kyipfa kokooya wawewuichi, wawechikapia msalabenyi Mndumii o mng'ano-pfo.

⁹Kyaindi, chandu kyikyiṟeie, “Shindo shilya riso lyilaleshiwona, maa kuṙwi kulaleshiicho (Maa iiṙa na mrimenyi ko mndu), shindo shilya Ruwa aleṟeyeṟia wamkundi.”

¹⁰Kyaindi Ruwa nalushukuya soe kui Mumuyo. Kyipfa Mumuyo nekyeruwa-ruwa shoose, maa shindo sha Ruwa shikuokyie-okyie.

¹¹Cha kyipfa nyi wui kyiiṙi kya wandu aichi mbonyi tsa wandu sile mrima o mndu ukyeri kyiiṙi kyakye? Na wuṙo na mbonyi tsa Ruwa kuwoṙe atsiichi sile Mumuyo o Ruwa-pfo.

¹²Kyaindi soe luleambilyia mrima o wuyana-pfo, indi Mumuyo awukyie ko Ruwa, kundu luiṙime imanya shilya Ruwa akusaṟie.

¹³Na isho lushionguo, chi kui maṙeṙo gamaloshe kui wuṟango wo kyimndu-pfo, indi gamaloshe nyi Mumuyo, lochitambuluo mbonyi tsa mrimenyi kui maṙeṙo ga mrimenyi.

¹⁴Kyasia mndu alakyeri o kyimrima ekyeambilyia shindo sha Mumuyo o Ruwa-pfo; cha kyipfa kokye icho nyi wutondo, maa eiṙima ishimanya-pfo, cha kyipfa shekyemanyika kui njia ya kyimrima.

¹⁵Kyaindi mndu o kyimrima nekyemanya shoose, maa oe kuwoṙe mndu ekyemmanya-pfo.

¹⁶Kyipfa chandu shiṟeio shiele shigambie, “Nyi wui alemanya kyindo Mndumii akundi, namloshe?” Kyaindi soe luwoṙe makusaṟo ga Kristo, kyipfa lokyekusaṟa cha Kristo.